Read Wancho Naga Tsaitong-Kaxtong 32 Bible Online

Tsaitong-Kaxtong 32 - Wancho Naga bible

Tsaitong-Kaxtong 32

¹“Ding hia hax, ku zangwünbu apalax, kue akaxkya to soxle apalax.

²Ku hwon-nwotbu a zangwat ti ningle dütüi ilaxle chaxwan tok ma nyenti ningle achangüi. Pünsom ding to zang anyaikya ningle ku zangwünbu dütüi, hingzang tok to watshoja jukya ningle.

³Kue JOWANPA mün achuakle changüi, ilaxle chix khünaknue chix chuak-chongkya mo wünüi.

⁴“JOWANPA a pangnu tsuakkya hünzom khowapa changpu, chix lom ma nguiwangkya hia sukyakya wüi; hünzom Zang a mongong tüikya tamchu otsingtsing changpu; chixe chem supuix ilaxle oja otyatya hex ija mokle.

⁵Ikoxlechu hünzom a mongong chitüikyabu, chix khünaknu ang chang koxle chiasukyabu, ochax tamchu tsetselopkya jat-li.

⁶Hünzome JOWANPA to ile hwon angkya olom changcha, hünzom ongat, tutex mong chizaikyabu? Chix a hünzom hopa, hünzom zingpupa, jat-li tuita ang hünzom chixe zingpu.

⁷“Kaidaokyabu ajangle anolax, kaitokyabu a; chemle changdaopuix ija nang hama apua angkya manu-mapa hwom ma atüilax, kaipongkyabu bama wün ang taiko hwom füi akaxlax.

⁸Khüthak Zang-e jat-libu ang ma haxtoktokle ahanle koxpu; khünaknu chem khama ngo angkya hex chixe tix tsuakle fapu. Chixe pangnu jat-li ang wüi hua ang zangkangting nokpu hwom tsanpu,

⁹Ikoxlechu Jakop sixli hwom ang chixe jaoe chix kux ang süile koppu.

¹⁰“Chixe hwom a sak-hax to hamhamle ngokya atakle lax, khünak chingokya kha, zangwin wuwukya faokha. Chixe hwom kho awa ilaxle akox-akomle hume, chixe ma khosün pupule.

¹¹Ola lashoe hosa hwom ang opik anole ma ozangbu pünlaxle ibu hale koppupule, JOWANPAe Israel nok düt ang chikoxle kople thom.

¹²JOWANPA chix tatae chix khünaknu lom azüi mixnok baozang tokhange fongkya chemchu chilax homtoxle.

¹³“Chixe hwom ang haxhua nokbu apün ang tom, ilaxle hwome haxtok ma chem laipuix ibu sax ang kop. Hwome longtsyentua to nax-tibu atak; hwome olip pünbu a longfix tüikya haxtok to nyem ang tom.

¹⁴Hwom maihu hia zwonbue tsomti huanuma kox; sümüipu chun, zwon hia maihu, ibu hwom ma tüi, tüle owan müikya wonglai tsax, tamchu tüle müikya grep tibu a.

¹⁵“JOWANPA KHÜNAKBU HUANUMA AHAK-ALUALE CHANG, IKOXLECHU CHIX ZAN TO KALE TÜI; hwom a tüle nutle ilaxle osüt füi wokbu afwot. Hwome hwom zingpupa Zang chilaxle awüt üntoxle tsak-zong füikya hwom khosünpa chilaxle awüt.

¹⁶Hwome chapabu to shwomkyae JOWANPA ang mongma ang tom; hwome mokkya ochaxe chix ang mongtsik ang tom.

¹⁷Otsing chichangkya baozangbu ang hwome tö kox, hwom pupa hwome otuechu chitik toxkya baozangbu ozün, Israel noke otuechu ibu kax ma chilaxle tüikya baozangbu.

¹⁸Hwome hwom Zang, tsak-zong chongkya füi tüikya khosünpa alakle asam, hwom hanpakma tsün koxkya Zang a chix changkya.

¹⁹“Ija ngünkya zuma JOWANPA ang mongma ilaxle chix sasün hia sacha hwom chilaxle awüt.

²⁰Chixe thüi: ‘Kue hwom to münfongpu; kue hwom to chemle changüihex ija to shong-hu hüi ang, kheba chithüile mongtsakle hia mongong chitüile ngokya khünakbu to-a.

²¹Hwom chapabu füi hwome ku ang mongtsik ang tom, hwome baozangle nyakkyabu to huanuma khax-khu, Zang chichangkya baozangbu a. Ikhoma kue jat-li tuita hwom mong atsik ang twonüi; kue hwom ang ongat jat-libu to osingle tüi ang tomüi.

²²Ku mongtsik a wünle laile jao chuale dongüi ilaxle chaxwantok angkya pangwüi zokle ashunüi. Ijae ama-lum jao alople changüi ilaxle haxnubu otsing komkaile zokle ashunüi.

²³“‘Kue hwom hato oshuk chitüikya thama ahüiüi ilaxle ku sanhapbu pangwüi hwom to hap ang twonüi.

²⁴Hwome a woknuak hia kak-lak ma ziüi; hwom a khomtsikya kak-lakbu chak ma ziüi. Kue faomüibu hwom zan to akatüi, ilaxle oje füikya pubu hwom to tu ang ahüiüi.

²⁵Ochax-ozan ma hwom tingjang lomnu to zikmüt mangkho atak ang tomüi; hwom homkhabu to tuma-wanshixkyae chakmok ang tomüi. Naocha hia naosünbu zile paoüi; Süshix-naosa hia taiko owachu shanle chitoxüi.

²⁶Kue hwom a komkaile olithu ang tomse, ikoxtix owaechu hwom texle atak angkya chitüiüi.

²⁷Ikoxlechu ku khünaknu to anaole tsuakdaoale kue hwom zanpabu ang mongngam ang tomse chitsu, chemthüikoxle hwom a ku jaojaoe thuple akhixkya changpu.’

²⁸“Israel a tutex ma mongkho chinguikya jat-li tuita changpu; hwom ma je-hwon ojao müntüi.

²⁹Hwom to büthüikoxle lütpuixle hwome chingüntsuak; chempangle changpuix hwome ojao chitsing.

³⁰Tutae hajat to büthüikoxle lüt ang tho? Hajat bün to mixhuak anyie büthüikoxle lüt ang tho? JOWANPA, hwom Zang-e hwom dandao koxpu; hwom Khüthak Zang-e hwom chilaxle awütdaoa.

³¹Hwom zanpabue hwom baozangbu ma zong müntüile awanle, Israel nok Zang lailaile janzüi chitüile.

³²Hwom zanpabu a, Sodom hia Gomorah nok ningle laxli chitüikyabu, oje füikya hia khaxkya oziak ziakkya grep zubu ningle,

³³pu jebu makhange zingkya juti ningle.

³⁴“Hwom zanpabue chem mokdaopuix ija JOWANPAe akhax thomle; hwom sikangün angkya hanpakma asukya hanpakma chixe tan-ngole.

³⁵JOWANPAe hwom to olüix khomüi ilaxle sikangünüi; hwom nguak angkya hanpak nguile hüiüi; hwom max angkya hanpak soxle tüile.

³⁶JOWANPAe chix khünaknu khosünle kopüi chixe hwom ang janzüi müntüile ngünkya zuma a. Chix thothale changkyabu to chixe chingchakya tüiüi, chingcha ashukle hwom max-samle ngünkya zuma a.

³⁷Ifüima JOWANPAe chix khünaknu ma atüiüi: ‘Hünzome mongongle changkya janzüi füikya baozangbu omaxüi?

³⁸Hünzome tö ang koxkya müizaobu füi hünzome hwom tux ilaxle hwom ang ju thokle kox. Athax hwom nguilaxle hünzom to asunhüi thüilax; hünzom kho awa ang hwom zik ang tomkox.

³⁹“Ku, Ku tata tix, Zang changpu; mama baozang otsingtsing tuita müntüi. Mik kue amütpu ilaxle khüzün kue koxpu, mak kue khapu ilaxle kue wüi amüile koxpu, ilaxle kue mokkya mwot owaechu abax ang chitho.

⁴⁰Chemle ku ozün ma ngokya Zang hex, ilailaile kue ku chak ajongpu ilaxle tsaopu

⁴¹kue ku changlo wunle anaxtüi ilaxle sukya mwot mokle ahoüi. Ku zanpabu to kue olüix khomüi ilaxle ku thua anule changkyabu to sikangünüi.

⁴²Ku sanhapbu a hwom aji ma somüi, ilaxle ku zongto zan pangwüi ku changlo füi langüi. Ku füi alünle ajongkya kue tuita chu shanle müntox; mak-kha daokya hia kun ma ngokyabu chu ziüi.

⁴³“Jat-libu, hünzome JOWANPA khünaknu achuak angkya changpu— hwom mik amütkyabu to chixe sikangünle. Chixe chix zanpabu to olüix khomle ilaxle chix khünaknu ochaxbu thailak tüile.”

⁴⁴Mosa hia Nun sasün Jihusua nyie ija tsai zex, Israel khünaknue ija atatle lax angkya hanpakma.

⁴⁵Chemtue Mosa-e khünaknu hama Zang bama anwot-anokya tsuakle hüipuix,

⁴⁶chixe thüi: “Anyix kue hünzom ang koxkya kaxtom pangwüi kax ma laxle-ole thüilax. Hwome chu mongong tüikya füi Zang hwon-nwot pangwüi kax ma laxle naxtüi lax ang ibu naosombu hama chatchatnaole wünkox.

⁴⁷Ibu hwon-nwot a zangwün ohuabu münchang; ibu a hünzom khüzün tomtata changpu. Ibu kax ma laxlax ilaxle Jordan shuanu talaxle hünzome kop angkya haxtok ma hünzom tsünlo-khothole ngoüi.”

⁴⁸Ija nyixnyix wüi JOWANPAe Mosa ang thüi:

⁴⁹“Jeriko tingnu füi atale tüikya Moab haxtok ma tüikya Abarim Haxnu to paolax; Nebo Haxnukho to ngolax ilaxle kue Israel khünaknu ang kox angkya Kanan Haxtok to atale hulax.

⁵⁰Hur Haxnu ma hüntüi Arun zikya ningle nang chuwüi ija haxkho ma ziüi,

⁵¹chemthüikoxle Israel khünaknu pomtho ma hünkhi pangnyie ku to mongong chithom tsuak. Chemtue hünzom a Meribah ti ma tüikya hex, Zin faonu angkya Kadesh tingnu zui ma-a, khünaknu tunthoma nange ku ada.

⁵²Nange ija haxtok to tsailo tokhange atale huüi, ikoxle kue Israel khünaknu ang koxle ngokya haxtok to nang ngui ang müntho.”