Read Wancho Naga Tsaitong-Kaxtong 4 Bible Online

Tsaitong-Kaxtong 4 - Wancho Naga bible

Tsaitong-Kaxtong 4

¹Ifüima Mosa-e khünaknu ang thüi: “Kue hünzom ang anwot-anole ngokya wanlombu pangwüi kax ma laxle tüilax, ilaxle hünzome, JOWANPA, hünzom putong hwom Zang-e hünzom ang koxle ngokya haxtok kop ang thoüi.

²Kue hünzom ang fakya kaxtom boma janbo taxtüi ilaxle ikha angkya tütalichu awütle taxchang. Kue hünzom ang fadaokya JOWANPA hünzom Zang kaxtombu kax ma laxle tüilax.

³Peor Haxnu ma JOWANPAe mokkya hünzome ma mik füi ngünle laxdaoa. Ikhato Bal baozang to shwomle ngokyabu chixe pangwüi max ang tompu,

⁴ikoxle hünzom opange JOWANPA hünzom Zang to mongong thomtsuak puix, athax kople pangwüi ozün ma tüipu.

⁵“Kue wanlombu pangwüi hünzom hama anwot-anole fadaoa, ija a JOWANPA, ku Zang-e ku füi akaxkya lailaile mokpu. Hünzome tingtakle koplaxle tingtan-nokzingle ngo angkya haxtok ma hünzom ibu kax ma laxle tüilax.

⁶Mongongkya füi ijabu kax ma laxle tüilax, ilaxle ija makhange mama mixnokbu hato, hünzom chemtukuxle jetüi-hwonlangkyabu hex, aho ang tsuaküi. Ibu wanlom pangnu bama chemtue hwome atatle changüihex, hwome thüiüi, ‘Ija tüle chongkya jat-li tuita ma jetüi-hwonlangkya huanu changa!’

⁷“Jat-li owa angchu, hwom tütatukux chongle tüikoxchu, keme lom pongma JOWANPA kem Zang kem hato nguikya lailaile, hwome lom pongma hwom hato soxle hüikya baozang owa angchu müntüi changa.

⁸Jat-li owa angchu, hwom tütatukux chongle tüikoxlechu, anyix kue hünzom ang anwot-ano koxkya ningkya sukya wanlom owa angchu müntüi.

⁹Hünzom khünzaile hunga ngolax! Hünzome ma mik füi ngünle laxdaokya oli, mazi tanto alakle münawüt-ole amonglax. Hünzome su-sabu hama,

¹⁰‘Khünaknu sele asoxhüi. Hwom mazi tanto ku kax ma laxle tüi angkya awanle naxkoplax ang tamchu ilailaile mok angkya hwom su-sabu hama anwot-anole naxtoxlax ang, kue hwom füi wünse lükya zangwün hwome apale naxkop’ le Sinai Haxnukho ma hünzom JOWANPA chix ngwotnui ma ajongkya bama wünle laxkox.

¹¹“Chemle tüle shixkya zangfwome joxle thomkya tamchu zangkho alople wünle laile wünchuale ngokya haxnu chithong ma hünzom chemle ajongkya dai ibu bama hünzome su-sa hwom hama wünkox.

¹²JOWANPAe hünzom füi wün makhange chemle zangwünpuix, ikoxlechu hünzome tüta ningle chu chix ngün ang chikop, ija bama wünle laxkox.

¹³Chixe hünzom ang koxle tüikya Tsaotsüt otya ma thom angkya bama tsingang tomkox: ija a, longkhuabu ma zale tüikya Kaxtom Bün bama.

¹⁴Ipongma hünzom tingtak laxle ikha kop ilaxle tingtan-nokzingle chang angkya haxtok to hünzome twon angkya wanlombu anwot-anole chang angkya chixe ku füi akax.

¹⁵“Chemtue Sinai Haxnukho tokhange JOWANPAe hünzom füi wün makhange akaxle changpuix, hünzome tütali ningkyachu chingün. Hünzom zongma müi angkya hanpak ang malualua to khünzailax,

¹⁶ija a hünzome chapa tüta ningle chu: lüka ningle wüi changlax sheko ningle wüi changlax,

¹⁷müi ningle wüi changlax, o ningle wüi changlax,

¹⁸flo-fyensang chichangba nyax tüta ningle wüi changlax, ma hanpakmale chapabu chizing angkya changle.

¹⁹Hünzome ding to ngünkya: lyetnu, zanghan hia lyettsibu to shwom angkya thwontsing ma hato hüi ang taxtom. JOWANPA hünzom Zang-e ibu bama khünakbue shwom angkya hanpakma fawüi.

²⁰Ikoxle hünzom a Ijip nok to lekya okham-wün chak tokya chix azünkya changle. Anyixkya lailaile chix khünaknu ang lax ang chixe ikhatokya alaipu.

²¹Hünzom khoma hexle JOWANPA ku füi mongtsik ilaxle ku a Jordan shua tale, chixe hünzom ang kox angkya haxzao füikya haxtok to münnguipu-ole ngaidaoa.

²²Ku a chemtuechu shuanu tale le angkya münchang ikoxle ikhato zi angkya changle, ikoxlechu hünzome a shuanu talaxle ija haxzao füikya haxtok laxüi khakha.

²³JOWANPA hünzom Zang-e hünzom füi Tsaotsüt tüidaokya hünzome chemtuechu taxalak. Hünzome ma hanpak ang chemchem chapa zingle chichang angkya bama chix kaxtom kax ma laxle tüilax,

²⁴chemthüikoxle JOWANPA hünzom Zang a ole füikya wün ningle changpu; chixe chix füi apüile changkya oli chemchu münadutsuak.

²⁵“Hünzom chaxwan ma okuilole ngole hüidaokyabu chu tamchu su-sabu huanuma tüihuünbachu, hünzome ma hanpak ang tütali chapa zingüntoxle ochax kople taxchangünlax. JOWANPA miksho ma ija a ochax changpu, ilaxle ijae chix ang mongtsik adünüi.

²⁶Anyix kue mikngün-kaxkhi ang ding-hi-hax sepu: Hünzome ku kax ma laxle chitüi, hünzom a chwonchwonle wüi chaxwan tok angkya amuale paoüi; athax hünzome tingtak laxle kopüi tüikya Jordan Shuanu tachi angkya haxtok ma hünzom ngo angkya münchang. Hünzom a bakle amütüi.

²⁷Hünzom a JOWANPAe mix jat-libu khato chiakle sam ang tomüi, ikhato hünzom hidaole ozün ma ngoüi.

²⁸Ekhato hünzome khünak chakzing baozangbu to shwomüi: pün baozangbu hia long baozangbu, baozang ojae ngün ang chithopuix, tamchu sax ang hia atum ang chithopuix ibu a.

²⁹Ekhato hünzome JOWANPA hünzom Zang lomüi, ilaxle hünzom künbak-mongbakle janglom, hünzome chix ataküi.

³⁰Chemtue hünzome sikngün apong ilaxle ibu pangnu changle hüipuix, ifüimatix hünzom JOWANPA hato chatüi ilaxle chix kax ma laxle tüiüi.

³¹Chix a chingchajaja füikya Zang. Chixe hünzom danle müntox chichangba münamüt, ilaxle chix jaojaoe hünzom putong hwom füi zingkya Tsaotsüt münalaktox.

³²“Kaile dantox daokyabu lomlax, hünzom mapux tantokya hanpak, anongle lomle Zang-e ija chaxwannu ma khünak zingle alaikya kople chatlax. Chaxwannu pangnukha lomlax. Ija lailaile amiba tüchangdaima hex? Owawae ija lailaile tütali zing atatle changdaima hex?

³³Hünzom lailaile, kaitanto owawae wün makhange Zang-e zangwünkya atatkya mix tütüichahex?

³⁴JOWANPA hünzom Zang-e hünzom hanpakma Ijip nok to mokkya lailaile baozang owawae mama jat-li chak tokya alailaxle khünakbu chix khünak ang zingle dan ang mongchongkya baozang tütüichahex? Hünzom mikngün ma chixe chix tsak-zong chongkya twon; chixe kaknu-laknu hia zanhok alai, ohünotün mwotbu mok, ilaxle khompua-atsikle abütkyabu ngai ang tom.

³⁵JOWANPAe hünzom hato ija ahodaoa; ija a: Zang chix tata wüi, chix boma mama owachu müntüile aho angkya hanpakma changle.

³⁶Chixe hünzom ang zangkangting tokya chix zing atat ang tom ikoxtix chixe hünzom ang jali adangle fa ang tsuakpu; ilaxle ija chaxwan tokma chixe hünzom ang chix otsao wün ngün ang tom, ilaxle imakhange chixe hünzom füi zangwün.

³⁷Chixe hünzom putong hwom to mongkünkya khoma chixe hünzom zünle kop, ilaxle chix tsak-zong chongkya makhange chixe hünzom Ijip nok tokya alaile apüi.

³⁸Hünzom süsox-süsoxle soxle hüikya zuma, chixe hünzom füi süchong tamchu tsak-zongle tüikya jat-libu jwonle apao, ikoxtix chixe hünzom ang ibu haxtok kox ang tsuak angkya daile, ija haxtok a athaxchu hünzom haxtok hex-olejao ngo angkya changpu.

³⁹Idaile anyixkya texle ataklax ilaxle JOWANPA a zangkangting hia chaxwannu ma Zang changpule chemtuechu taxalak. Chatle mama Zang tümüntüi.

⁴⁰Anyix kue hünzom ang koxkya chix wanlombu pangwüi kax ma laxle tüilax, ile jangchangba hünzom tamchu hünzom su-sabu hanpakma shomüimüi angwüi changüi. JOWANPA hünzom Zang-e hünzom kuxhex-ole koxkya haxtok ma hünzom othuithuima ngo ang kopüi.”

⁴¹Ifüima Mosa-e Jordan shuanu zongma handünchi ma pünpaobu nguile azang angkya tingnu azom zünle kop.

⁴²Ija a owawae ma zongto zanpa chichangkya khünak owawa chakchax-jansax ma mik max ang tomle jangchang thüiningle, ija khünak ikhato paole azangtsuak angkya hanpakma. Ija khünak, tingnu azom ibu tütapu ma thüichu paole azangle jangchang thüiningle chix mik max ang müntomüi.

⁴³Reuben homjen hanpak ang pünpao tingnu a sak-hax ma Bezar tingnu tüikya; Gad homjen hanpak ang Gilid haxsüt ma Ramoth tingnu tüikya; ilaxle Manasseh homjen hanpak a Bashan haxsüt ma Golan tingnu tüikya.

⁴⁴Mosa-e Israel khünaknu ang Zang wanlom hia hwon-nwot jaonobu fa.

⁴⁵Ija a hwom Ijip nok tokya laile paokya füima, Jordan shuanu zongma handünchi kao haxcha ma Bethpeor tingnu zongma jannongchi ma, Mosa-e hwom ang wanlom ibu kox. Ija a Heshbon tingnu makhange apün-awangle ngokya Amor nok wanghompa Sihon haxtok ma changkya. Ijip nok angkya laile paopongma Mosa hia Israel khünaknue chix to anao.

⁴⁶

⁴⁷Hwome chix haxtok lax iboma Bashan angkya wanghompa Og haxtok chuwüi lax. Chix chuwüi Jordan shuanu zongma handünchi kao ma tuita Amor nok wanghompa wüi changkya.

⁴⁸Ija haxtok a ibibile tüikya: Arnon shuanu kax ma tüikya Aroar tingnu makhange shuakux chito dongle Hermon Haxnu angkya Sirion haxhua alople.

⁴⁹Shuathongchi ma Arabah haxsüt alople ilaxle handünchi ma Piska Haxnu chithong alople, Jordan shuanu zongma handünchi haxtok pangwüi ima womle tüikya.