Read Wancho Naga Tsaitong-Kaxtong 6 Bible Online

Tsaitong-Kaxtong 6 - Wancho Naga bible

Tsaitong-Kaxtong 6

¹“Ija a JOWANPA kem Zang-e hünzom hama anwot-anole chang angkya hanpakma fakya kaxtombu changle. Athax hünzome kop angkya haxtok to hünzome ibu kax ma laxle tüilax.

²Hünzom ozün ma ngokya kople, hünzom tamchu hünzom su-sa hwome hünzom Zang JOWANPA achuak-achenle tüi angkya oli changle. Hünzom ija haxtok ma tsün-khothole ngo angkya hanpakma kue hünzom ang fakya chix wanlombu pangwüi kax ma laxle tüilax.

³Ibu kax ma laxle tüilax, hünzom Israel khünakbu, ilaxle ibu kax ma laxle tüilax! Ile jangchangba hünzom füi pangwüi müile hüiüi, ilaxle hünzom a chongkya jat-li tuita ang changüi ilaxle ija ahak-aluale haxzao füi tüikya haxtok ma ngoüi; ija a kem putong hwom Zang, JOWANPA chix kaxtsao ningle changüi.

⁴“Israel, ija texle ataklax! JOWANPA —tamchu JOWANPA chix tata tix—kem Zang changpu.

⁵Nang mongtsang pangnu füi, nang chamua pangnu füi, ilaxle nang tsak-zong pangnu füi JOWANPA nang Zang to mongkünkya tüilax.

⁶Anyix kue nang ang koxle ngokya ija kaxtombu otuechu taxalak.

⁷Nang hom ma ngopongma tamchu nang kotho to ngopongma, nange nazak laxle ngopongma tamchu nange mwot mokle ngopongma, ibu a nange naosombu hama anwot-anole changkox.

⁸Texle-atak ang tom angkya kuxmale nange ibu suakto ma khale thomlax ilaxle nang khangpong ma khale thomlax.

⁹Nang hom angkya fülombu hia zünkaibu ma ibu zale thomlax.

¹⁰“JOWANPA hünzom Zang-e chemle hünzom putong Abraham, Isak hia Jakop hwom füi, chongkya hia ahak-aluale tüikya tingnubu oja hünzome zingle alaikya münchanghex, ibu füi tüikya haxtok koxüile tsaosaxkya ningle changpuix,

¹¹Hom-haxbu a hünzome chidankya tuina müikyabu füi awangle tüiüi, ilaxle hünzome chithokya tüküibu ikhama tüiüi, ilaxle hünzome küi-thwomle chichangkya grep hia olip manzai haxtokbu tüiüi. Chemtue JOWANPAe hünzom ija haxtok to apüiüihex tamchu hünzome saxsele atsutsu komle tüile ngoüihex,

¹²hünzom da ang achangle ngokya Ijip nok chak tokya hünzom khosünle apüikya JOWANPA münalak-o thüilax.

¹³JOWANPA hünzom Zang chathua zale tüilax, chix tata tong shwomlax, ilaxle hünzome chix mün tata ma tsaosaxle changlax.

¹⁴Hünzom akhople tüikya khünakbue shwomkya baozang chemtochu hünzome taxshwom.

¹⁵Hünzome mama baozangbu to shwomle jangchang, hünzom hato JOWANPA mongtsik wün ningle nguiüi ilaxle hünzom komkaile amütüi, chemthüikoxle JOWANPA hünzom Zang-e, athax owa hünzom füi ngole tüipuix, chixe chix zongto zanpabu füi münadutsuak.

¹⁶“Hünzome Massah ma changdaokya ningle JOWANPA hünzom Zang to thwontsingle taxchang.

¹⁷Chixe hünzom ang koxle thomkya wanlom pangwüi kax ma laxle tüi ang-o thüilax.

¹⁸JOWANPAe changle tamchu sule le athüithüi pangwüi moklax, ile jangchang thüiningle hünzom a kuimüi-zangmale ngoüi. Hünzom putong hwom ang JOWANPAe tsaosaxle changdaokya haxzao füikya haxtok hünzome kop ang thoüi,

¹⁹ilaxle chix kax lailaile hünzome zan-nokbu jwonle apao ang thoüi.

²⁰“Athax füichi ma hünzom su-sabue hünzom ma atüiüi, ‘Chemthüikoxle JOWANPA kem Zang-e ibu wanlombu pangwüi kax ma laxle tüi angkya kem ang kaxtom koxle tüipuix?’

²¹“Ipongma hwom ang thüikox, ‘Kem a Ijip nok to da ang ngole hüikya changle, ikoxle chixtsak chixzong chongkya füi JOWANPAe kem khosünle kopkya changle.

²²Chixe ohünotün mwotbu mokkya tamchu Ijip nok hia hwom wanghom hwom hia nguakax-wangkhobu to abütsünsünle ohünotün mwot mokkya kwom mik füi kwome ngündaoa.

²³Kem putong hwom füi tsaotsütkya tüikya ningle kem ang ija haxtok koxangle kem ikhato apüi angkya hanpakmale kem dan ang tom.

²⁴Ifüima JOWANPA kem Zang-e wanlom ibu to ilaxle chix to achuak-achenle tüi angkya kem ang kaxtom kox. Keme ile jangmok thüiningle chixe kemjat kemli to nyele ngoüi ilaxle ahak-aluale ngo ang tomüi.

²⁵Keme mongong tüikya füi Zang-e fakya kaxtom pangwüi kax ma laxle jangtüi, chix ang kem füi mongmüikya tüiüi.’