Read Wancho Naga Juhan 1 Bible Online

Juhan 1 - Wancho Naga bible

Juhan 1

¹Chaxwannu zingüi thoto wüi, Kax tüikya; Chix Zang füi ngokya, ilaxle chix Zang füi tuita changkya.

²Pongwang tokhange wüi kax a zang füi ngokya.

³Chix makhange Zange pangnu li zingle alai; zingkya khama oli tuitachu chix chichang homtoxle zingkya chitüi.

⁴Ija Kax a khüzün otong changkya üntoxle ija khüzüne khünaknünsa hato zangngai apüi.

⁵Ija zangngaie zangnak khato nyan ilaxle zangnake ija amüt ang chitho.

⁶Zange chix kaxho mix Juhan le amünkya mix

⁷khünaknu hato zangngai bama apua ang tsanle apao. Pangnusae atat tamchu ong angkya kuxma chix hwom hato ngui.

⁸Chix tomtata a ija zangngai chichang; chix a ija zangngai bama apua ang nguikya mix.

⁹Chix a zangngai tsingtsing, zangngai ojae chaxwannu hato nguilaxle khünaknusa to nyanlaxpuix.

¹⁰Ifüima ija kax chaxwannu ma ngo. Chaxwannu Zange chix makhange zingle alai; ikoxlechu chaxwannue chix chitsing.

¹¹Chix a ma khünaknu hato hüi, ikoxlechu ma khünaknue chix pongle chikop.

¹²Bachutix züizüie chix pongle koplaxle chix to ong; ija khoma chixe hwom ang Zangsu Zangsabu ang achang angkya tsakzong kox.

¹³Hwom a zangjang khünak hopa tuita makhange puxkya khoma Zangsu Zangsabu ang achangkya chichang; Zang chix tomtata hwom Hopa ang achang.

¹⁴Ija kax khünak ang achang laxle chingcha hia kaxtsinge awangle chix kem khama ngo. Hopa ang Hosa tuita wüi tüikya fuazang ningle kwome chix fuazang ngün.

¹⁵Juhan-e chix bama kaxkhi fa, ilaxle akhongle thüi: “Ku füima hüile ngokya mix a ku füi ngaxchu achongkya changpu; chemthüikoxle chix a ku puxüi thoto wüi tüile ngoünkya changle, le kue owa bama akaxpuix, ija a chix changpu.”

¹⁶Chemthüikoxle okhonguile tüikya chix chingcha kha angkya, tuita füima tuita le chixe kem to mohimanle.

¹⁷Zange Wanlom a Mosa makhange fa; ikoxlechu chingcha hia otsingtsing a Jisu Khrista makhange hüipu.

¹⁸Owaechu Zang ongaichu mangün tox; ikoxle Hopa hama chix füi tomwüi ngokya, tuita wüi tüikya Hosa etix chix apuale fapu.

¹⁹Jerusalem angkya Jehudi pünpa-chongwangbue chix ma “Nang Owa?”, le atüi ang nguapabu hia Liwibu tsanle apao.

²⁰Chipyen homle Juhan-e tsaotha le ngaile lan: “Ku a Messaiah münchang.”

²¹Hwome atüi: “Jangchangba nang a owa? Nang Elija hia? Nang ajepa hia?” Juhan-e lan: “Ku münchang!”

²²Ikoxle hwome thüi: “Kwome tsanle apaokyabu hama kwome wüntsuak angkya oli changle; jangchangba nang a owa? Nange nang bama chemle thüiüi?”

²³Chixe Isaia ajepa taile akax: “Jowanpa le angkya lom atangle zingle banglax, le faokha to akhongkya kaxzing a ku changpu!”

²⁴Ifüima farisibue tsanle apaokya kaxho mixbue Juhan ma atüi,

²⁵“Nang Khrista chuwüi chichang, tuita ajechu chichang, jangthüiba nange chemthüikoxle baptipu?”

²⁶Juhan-e hwom ang thüi: “Kue ti ma baptipu ikoxlechu hünzome chitsing tsuakkya khünak tuita hünzom khama ajongle tüile.

²⁷Chix a ku füima hüile ngole; ku a chix chisox zu da ang ngaxchu chiasukya mix changle.”

²⁸Ijabu pangnu Juhan-e baptile ngokya Jordan shuanu tachi to Bethani ma chang.

²⁹Ofüi nyix Juhan-e Jisu chix hato hüile ngokya ngün ilaxle thüi: “‘Chaxwannu ochax pao ang nguikya Zang Chun Hosa to hulax!

³⁰Ku füima mixhuak tuita hüile ngole; chix a ku füi ngaxchu akhokya changpu, chemthüikoxle chix a ku mapux tanto wüi tüile ngoünkya changpu’, le kue akax ngokya mix a chix changpu.”

³¹Chix owa changüihex kue chiawan, ikoxlechu Israel khünakbu hama chix awanle kox angkya kuxma ti ma bapti fale ku nguipu.

³²Ilaxle Juhan-e ija kaxkhi fa: “Osu ningle Chasa julaxle chix khangkho ma paxkya kue ngündaoa.

³³Kue chix ija mix changle le chiawan; ikoxlechu Zang owae ku tima bapti le fa ang ngui ang tsanpuix, chixe ku ang thüi: ‘Nange owa ma chasa julaxle paxkya ngünüi hex, Otsao Chasa ma baptile fa angkya mix chix changpu!’

³⁴Ikoxle kue ngünle laxdaoa, ilaxle kaxkhi fapu; Chix a Zang Hosa changle.”

³⁵Anaole ofüi nyixchu wüi Juhan chix wangshem anyi füi ikhama ajongle ngokya.

³⁶Chixe Jisu ahamle hüiüi ngünlaxle thüi: “Hulax! Chuja Zang Chun Hosa a!”

³⁷Ija kax atatlaxle ija Juhan wangshem nyi Jisu füito pao.

³⁸Jisu-e aküile hu koxle chix füito hokhi hüile ngokya ngünlaxle atüi: “Hünkhie chem lompu?” Okhie chix ang thüi: “Rabai (thüikoxle Nwotmix), nang ojong ma ngopu?”

³⁹Chixe hokhi ang thüi: “Oman. Hüilaxle hulax.” Idaile hokhi hüilaxle chix ngokya nui ngün. Iponge hansong ali baji tuk changkoxle hokhichu ija ja chix füi tomle pom.

⁴⁰Juhan kax atatlaxle Jisu füito azuikya nyi khama tuita a Simon Pitar honao Andriw changkya.

⁴¹Pongwang ma chixe hotüi Simon atak ilaxle chix ang thüi: “Kwome Messaiah (Khrista) atakdaoa.”

⁴²Ifüima Simon Jisu hato apüi. Jisu-e chix to hulaxle thüi: “Nang a Juhan sasün Simon; nang ang Kefa le nyaküi.” (Ija a Pitar mün long changpu le thüikya tha).

⁴³Ofüi nyix Galili to paosele tsu. Ikhato chixe Filip atak. Jisu-e chix ang thüi: “Ku füito oman.”

⁴⁴Filip chuwüi Pitar hia Andriw hokhi ngokya Bethsaida nok angkya changkya.

⁴⁵Filip-e Nathanel atak ilaxle chix ang thüi: “Mosa-e wanlom laipex ma tamchu ajebue hwom laipexbu ma owa bama zale tüipuix, kwome chix ngündaoa. Chix a Nazareth angkya Jusep sasün Jisu changle.”

⁴⁶Nathanel-e chix ang thüi: “Nazareth angkya tuita müikya oli laitsuak angchami?” Filip-e chix ang thüi: “Hüilax ilaxle hulax.”

⁴⁷Jisu-e Nathanel chix hato hüikya ngün ilaxle chix bama thüi: “Israel khünak tsingtsing to hulax; chix ma thaikya chem müntüi!”

⁴⁸Nathanel-e chix ang thüi: “Nange ku chemle awanpu?” Jisu-e chix kax to lanle thüi: “Filip-e nang nyaküi thoto wüi, fupsa pün fangma ngopong ma wüi kue nang ngünpu.”

⁴⁹Nathanel-e chix ang thüi: “Rabai, nang a Zang Hosa; nang a Israel wanghom changle.”

⁵⁰Jisu-e chix kax to lanle thüi: “Nang fupsa pün fangma ngopong ma kue nang ngünpu le thüikya khoma nange ongkya changdaicha? Ifüichu süchongkya nange ngün angkya changle.”

⁵¹Ilaxle chixe hwom ang thüi: “Kue otsingtsing ma akaxpu, nange zangding ka dapkya tamchu Khünak Hosa ma kaxtaimixbu dongkya hia jukyabu ngünüi.”