Read Wancho Naga Juhan 11 Bible Online

Juhan 11 - Wancho Naga bible

Juhan 11

¹Bethani nok ma Lazar le amünkya mixsün tuita kakle ngokya. Bethani a Meri hia hona Martha hokhi ngokya tingsho changkya.

²(Meri a, Jisu cha to ongan müikya müngae pa ilaxle ma kho füi ija fwotle fakya mixcha changkya; ilaxle kakle ngokya Lazar a honao changkya).

³“Jowanpa, nange mongkünkya khünak pi kakle ngole”, le hona honao nyie Jisu hato kaxhole apao.

⁴Otue Jisu-e ija atatpuix, chixe thüi: “Ija kak a Lazar zongto zik kak münchang, ikoxle Zang fuazang angkya hanpakma; ija makhange Zang Hosa fuazang ang kop angkya hanpakma changpu.”

⁵Jisu-e Martha hia honao Meri tamchu Lazar hwom to tüle mongkün.

⁶Ikoxle Lazar kakle ngokya kaxho kopkya füima chix ojong khato asukya hex ikhato chatlechu nyix anyi jao nuile tox.

⁷Ifüima chixe ma wangshembu ang thüi: “Kem Jehudi haxtok to chatle tam chathax.”

⁸Wangshembue thüi: “Rabai, shongnyix tangtang Jehudi khünakbue nang to long füi thup ang lomle ngokya; ikoxle ikhato nang chatle tamchat ang hi?”

⁹Jisu-e lan: “Hanpak nyixta ma khonta bün anyi müntüi dai hia? Anyi ningle ahamkya mix chikho münasua; chemthüikoxle chixe ija chaxwannu zangngai ngün ang kople.

¹⁰Ikoxle zangnak ma owa ahamüi hex, chix asua angkya changle; chemthüikoxle chix ma zangngai müntüi.”

¹¹Chixe ija akax füima hwom ang thüi: “Kem zuikhui Lazar jipüna; chix jip azwot ang ku pao angkya changle.”

¹²Ikhoma wangshembue chix ang thüi: “Chix jiplankya jangchangba, chix müilax ang khato.”

¹³Ikoxle Jisu-e a hwom hama Lazar zikya kaxho fakya kax changkya. Wangshembue opo jiple ngokya ang thüipuix le thüt.

¹⁴Ikhoma Jisu-e angaile hwom ang thüi: “Lazar pi zidaoa.

¹⁵Hünzome mongong angkya kuxma ku ikhato chiasukya khoma mongmüile. Hai, kem pi chix hato paohax.”

¹⁶Ija koxle Thoma owa ang (apyetkya nao) le nyakpuix, chixe hozui wangshembu ang thüi: “Kemchu nwotmix füito, chix füi tomle naxzi ang paohax.”

¹⁷Ikoxle Jisu ngui pongma chix zule toxkya füima hanpak nyix ali jao sütdaoa le bang.

¹⁸Bethani ting a Jerusalem tokhange mai anyi tukux atsaile tüikya.

¹⁹Honao zikya khoma mang sople ngokya, hona hia honao nyi mong asom ang, Meri hia Martha nyi hato Jehudi khünakbu huanuma nguile tüikya.

²⁰Ikoxle Jisu hüile ngokya zing atatkya zuma, Martha nonokhaile chix füi apong ang lai; ikoxle Meri a hom ma wüi nui.

²¹Martha-e Jisu ang thüi: “Jowanpa, nang ikhato asupuix thüikoxba, kunao chizi haxkux;

²²Athaxchu kue ongpu, nange chem jupuix, ija Zange nang ang faüi.”

²³Jisu-e she füi akax: “Hünnao a chatle azangle zoüi.”

²⁴She-e lan: “Oshuk nyix, chixchu wüi chatle azangle zo angkya kuechu awanle.”

²⁵Jisu-e she ang thüi: “Chatle zokya tamchu khüzün ku changle; ku to ongkyabu zi koxlechu ozün ma ngoüi.

²⁶Ilaxle ozün ma tüikyabu opange ku to ongüihex, hwom tamchu münziüi. Nange ija to ongcha mi?”

²⁷She-e lan: “Ongpu, Jowanpa, Chaxwannu to hüiüi tüikya Khrista nang changpu le kue ongle.”

²⁸She-e ija kax tsuak füima hom to chat, honao Meri nyaklaxle ahuxle thüi: “Nwotmix a ikhama tüile, ilaxle chixe nang nyakle.”

²⁹Ija kax atatkya füi tomle Meri ajong laxle chix füi apong ang pao.

³⁰(Iponge Jisu a tingkhua to madong le, Martha apongkya khama wüi tüitan changkya).

³¹Ikoxle Jehudi khünakbu, she hom ma, she mong asom ang nguile ngokyabue, nonokhaile Meri ajongle paokya ngünlaxle, she a zuk to sop ang jukya changüi le thütlaxle azuile hüi.

³²Meri Jisu ngokya khato ngui. She-e chix ngünlaxle chix chitong ma akhuxlaxle chix ang thüi: “Nang ikhato asupuix thüikoxle ku nao münzise.”

³³Ikoxle Jisu-e she tamchu she füi tomle azuile hüikya Jehudi khünakbuchu wüi sopkya ngün, ilaxle chix mongto po, tamchu chingcha dongle bang.

³⁴Chixe hwom ma atüi: “Hünzome chix ojong ma thompuix le?” Hwome chix ang thüi: “Jowanpa, hüilaxle hulax.”

³⁵Jisu sop.

³⁶Ija koxle Jehudi khünakbue thüi: “Hulax, chixe ija mixsün to otukux mongkünkya hex!”

³⁷Ikoxlechu hwom kha angkya züizüie thüi: “Ija khünake mikduak mix ang mik daple koxkya changcha? Chixe ija khünakchu wüi zing ang münfase dai nyi?”

³⁸Ikoxle Jisu mongto zule po; tamchatle zuk hato hüi. Ija zuk a longlua changkya ilaxle longkhao tuita füi oka hakle tüikya.

³⁹Jisu-e thüi: “Long apaokox.” Zikya mixsün hona Martha-e chix ang thüi: “Jowanpa, athax chix nomle ngoün angpuix, chemthüikoxle chix zi füima athax nyix ali nguipu.”

⁴⁰Jisu-e she ang thüi: “Nange mongongle jangchangba, nange Zang fuazangkya ngün ang kopüi, le kue nang füi maakax daimi?”

⁴¹Ikoxle hwome long apao; ijama Jisu-e dingchi to hulaxle thüi: “Apa, nange ku kax atat koxle kue nang ang münchong fapu.

⁴²Ilaxle nange ku kax jento atatle le kue awanpu; ikoxlechu ikhama ajongle ngokyabue, ku a nange tsanle ajokya mix changpu le awan ang kop angkya kuxmale, kue ija kax akaxpu.”

⁴³Ijabu akax füima chixe akhongle nyak: “Lazar laiün.”

⁴⁴Zidaokya khünak, tsangtsa pangnu to nyi füi lople khadao le chatle azangle zo; ilaxle chix thünchu wüi nyi füi lople khathomkya. Jisu-e hwom ang thüi: “Da kox, ilaxle chix aham ang laxkox.”

⁴⁵Meri hom to nguile tüikya Jehudi khünakbue ija ohünotün mwot ngünlaxle chix to ong.

⁴⁶Ikoxle züizüi farisibue chatlaxle, hwome Jisu mwot chempang ngün ang kopdao laxpuix, ibu pangnu wünle kox.

⁴⁷Ija khoma nguakhobu tamchu farisibue nguawangbu kartzua lax ang nyakle asoxlaxle thüi: “Keme chemle wünüi? Chemthüikoxle ija khünake ohünotün mwotbu huanuma wüi ahole ngole;

⁴⁸Ilele wüi naxmok ngolax le keme chix danle jangthom, khünaknu noke wüi chix to ongüi, ikoxle Roman pünpa-chongwangbu nguilaxle kem Zangshwom-Hom tamchu kem ngaxchu wüi amaüi!”

⁴⁹Ikoxle hwom khama Kaifa le amünkya mixsün, ija zanglao ma Nguakho ang ngokya mix, chixe hwom ang thüi: Hünzom chem ningkya ongatbu hex!

⁵⁰Khünaknu hanpakma mixhuak tuita zi ang koxlaxle chaxwannu khosünkya wüi kem zongma amüikya changpu le hünzome müntsing hexnyi?

⁵¹Ija khünake ma mongkha tokya akaxkya chichang, ikoxchu ija zanglao ma chix Nguakho ang ngo laxle, Jehudi khünaknu kuxma Jisu zi angkya changle;

⁵²Tamchu hwom tata bama le chichangle, chiakle tüikya Zangsu Zangsabu afox-azoxle tuita ang achang angkya kuxmale, Zange chix ile fyetle angao.

⁵³Ija nyix makhange Jehudi nok pünpa-chongwangbue Jisu lang angkya bama oshua lomle ngo.

⁵⁴Ifüima Jisu a Jehudi khünakbu khato ngaitho le chiaham; ikoxle hoxhox le tüikya Efraim le nyakkya ting to achexle pao; ikhato chix wangshembu füi nui.

⁵⁵Jehudi khünakbu ang Kaitox Pangpwon chwonle hüingokya; ikoxle ija pangpwon mahüikya bama, tingkhua tokya khünakbu malualua to atsao ang Jerusalem to ngui.

⁵⁶Idaile hwome Jisu lomle ngo; ilaxle Zangshwom-Hom ma asoxle ngopongma hwome tata füi ile akax: “Hünzome chemle texpu? Chix a pangpwon to münhüiüi hia?”

⁵⁷Chix kop angkya hanpakma, chix ojong to tüipuix, ija bama owawae jang awan thüiningle, ija hwom hama apuale fa angkya wüi hexo le nguapabu hia farisibue kax tsuakle thom.