Read Wancho Naga Juhan 12 Bible Online

Juhan 12 - Wancho Naga bible

Juhan 12

¹Pangpwonüi ma nyix azom tüile le, Lazar, owa Jisu-e zidaokya chatle azang ang tomkya hex, chix ngokya Bethani to Jisu ngui.

²Hwome chix hanpak ang ajaningkya fongsüt achwon, ilaxle Martha-e humele kox. Lazar chuwüi chix füi tomle fongsax ang thungkya khama tüikya.

³Ija koxle Meri-e otha tüle lixkya, ongan müikya münga pua anyi apüi ilaxle Jisu cha to pale kox; ibu she-e ma khülang füi fwotle kox. Ija münga ongan müikyae homkha awang.

⁴Ikoxle Juda Iskariot, wangshembu khama tuita, owae Jisu khohang angkya hex, chixe thüi:

⁵“Münga hünzome ngun ho-azom ang hang laxle. Ija chitüi chinangkyabu ang wüi chikoxle büthüipu?”

⁶Chixe ija kax zasabu bama mongkak laxle akaxkya chichang, ikoxle chix ahuxmix changlaxle akaxkya changpu. Ngun suak chix ma kople aham, ikoxle ikhama atüitüi komle chixe ahuxle lax.

⁷Jisu-e chix kax to lan: “She to taxtsa ngokox. Ija she-e ku zu angkya nyix hanpakma naxthom kox.

⁸Zasabu a hünzom füi jento ngoüi; ikoxle ku a hünzom füi jento ngo angkya chichang.”

⁹Jehudi khünakbue chix a Bethani to tüileta le atat. Jisu bama tata le chichangle zidaokya chatle azangle zokya Lazar chu ngünse le hwom ikhato ngui.

¹⁰Ilaxle nguapabue Lazar chuwüi lang angkya azua;

¹¹chemthüikoxle chix khoma hexle Jehudi khünakbue hwom dantoxlaxle Jisu to ong.

¹²Ngainyix ningle Jisu Jerusalem to nguiüi ta le atatlaxle, pangpwon to nguile tüikya khünaknu othom chongkya tuitae;

¹³Pam pünchakbu koplaxle chix pong to za, ilaxle azax, “Hosana! Hosana! Israel wanghom owa Zang mün ma nguipuix, chix mün achuakkox!”

¹⁴Jisu-e Gatho hosa tuita atak, ija ding ma chix thung; ija a zale thomkya tüikya ningle chang:

¹⁵“Taxza, Zaion naocha, hulax! Nang wanghom, Gatho tok ma ngalaxle nguitüia!”

¹⁶Ipongma chix wangshembue ija chitsing; ikoxle Jisu fuazangle zo ang tomkya füima tix, ibu chix bama zale thomkya changa tamchu ibu hwome chix kux ang mokle fakya changdao laxle le tsingle lax.

¹⁷Chixe Lazar chatle azang ang tom pongma chix füi tomle asukya khünaknu othome chix bama ibu kaxwün wang.

¹⁸Ija khoma khünaknu chix füi apong, chemthüikoxle ija ohünotün mwot chixe mokpu ta le hwome atat.

¹⁹Farisibue tata ang thüi: “Keme a chemchu mok ang chitho; hulax, chaxwannu pangwüi chix füito azuiüna!”

²⁰Pangpwon tukma Zangshwom angkya hanpakma Jerusalem to dongkya khama züizüi Grik nokchu wüi tüikya;

²¹Hwome Galili ma tüikya Bethsaida nok Filip hato nguilaxle atüi: “Alixachong, kwome Jisu ngünse tsule.”

²²Filip nguilaxle Andriw ang wün, ilaxle hokhi pangnyi nguilaxle Jisu füi akax.

²³Jisu-e lanle hwom ang thüi: “Athaxpi Khünak Hosa fuazang angkya hanpak chwonle hüiüna.

²⁴Otsingtsingma kue hünzom ang thüipu: Tsaxtsang tuita chaxwan tok to dütle chizi thüikoxle ija a chix tata ngole; ikoxle ija jangziba, ijae oziak huanuma dünüi;

²⁵Owae ma tsün to akhex puix, chixe ija amütüi; owae ija chaxwannu angkya matsün thua anule changüihex, chixe ija oshuk chitüikya khüzün hanpakma sünle thomüi.

²⁶Owawae ku thothase jangtsuba, chix ku füito azui angkya changle; ikoxtix ku ojong khato ngoüihex, ikhato ku dachu ngoüi. Owae ku thotha laxpuix, Apae chix achuaküi.

²⁷“Athax ku mongto jepale; kue chemle thüiüi? Apa, ija hanpak ku hato hüi ang taxfaünfa, le thüiüi le hia? Münchang, ija ziamong akaile le angkya hanpakmale ku ija chaxwannu to nguikya changpu.

²⁸Apa, nang mün hato fuazang apüi ang tomhüi!” Ifüima ding tokya ozing tuita laile akax: “Kue ija fuazang apüidaoa, üntoxle anaolechu wüi fuazang ang tomüi.”

²⁹Ozui ma ajongle ngokya khünaknu othom züizüie ija atat pongma “zang adungle”, le thüi; mamabue thüi: “Kaxtaimix tuitae chix füi akaxle.”

³⁰Jisu-e thüi: “Ija kaxzing a ku hanpak münchang, ikoxle hünzom hanpak ang akaxpu.

³¹Ija chaxwannu kaxfün angkya athax changle; athax ija chaxwannu wanghom chilaxle awütüi.

³²Otue ku chaxwannu ma ngoüihex, kue khünaknu pangnu ku hato ahüiüi.”

³³(Ikoxle chixe ija a, chix chem ningkya sikngün ma zi angkya hex, ija ahole akaxkya changkya).

³⁴Khünaknue chix ang thüi: “Khrista a jento ngo angkya changle le kwome wanlom makhange atat ang kople; jangchangba ‘Khünak Hosa a nwon angkya changle’ le nange chem ang thüipu? Ikoxle ija Khünak Hosa a owa?”

³⁵Ikoxle Jisu-e hwom ang thüi: “Zangngai a noxta bama hünzom füi ngoüi. Zangnaknue chilop angkya kuxma, hünzom füi zangngai tüi pongma ahamlax; zangnak to ahamkya mixe, chix le ngokya lom müntsing.

³⁶Zangngai khünaknu ang achang angkya kuxma, hünzom füi zangngai tüipongma ija zangngai to onglax.” Jisu-e ijabu akax füima chix lualua to paole, chix a hwom thoto khün.

³⁷Chixe hwom pomtho ma ohünotün mwotbu mokle ahodaobachu, hwome chix to chiong;

³⁸Ija a, Isaia ajepae ile akaxkya ija kax changle ngai angkya hanpakma chang: “Jowanpa, kwom kaxho to owae ong? Owa hato Zang tsakzong ngaile aho?”

³⁹Ija khoma hwome chiong tsuak, chemthüikoxle Isaia ajepae chatlechu wüi akax:

⁴⁰“Zange hwom miksutbu ang achang daoa, ilaxle chixe hwom mongtsang atsakdaoa; ile chichang hwome mik füi ngünse; ma mongtsang füi ajang ang those; ilaxle hwom mong chatkoxle, kue hwom müi ang tomse.”

⁴¹Isaia-e ija kax Jisu fuazang ngünlaxle chix bama akaxpu.

⁴²Ile changkoxchu Jehudi nok pünpa-chongwangbue chix to ongkyabu lai; ikoxlechu sinagok angkya hwom mün züt angkya thua zalaxle farisibu tüikya khoma hwome ija chingai.

⁴³Hwome Zange sule le thüikya füi khünake sule le thüikya wüi lom.

⁴⁴Ifüima Jisu-e azaxle akax: “Owae ku to onglaxpuix, chixe ku tata to ongkya chichangle ku tsanle ajokya Apa to ongpu;

⁴⁵tamchu owae ku ngünpuix, chixe ku tsanle ajokya mix ngünkyachu changpu.

⁴⁶Ku to ongkyabu owachu zangnak to chingo angkya kuxma ku a chaxwannu zangngai ang nguipu.

⁴⁷Owae ku kax atat füima ija chitwonle tüilaxpuix, kue chix ang kaxfün münfa; chaxwannu to ku kaxfün kox ang chichangle ija sün angkya hanpakma nguipu.

⁴⁸Owae ku pongle chikop laxpuix, tamchu ku kax ma chilaxle tüilaxpuix, chix hanpakma kaxfün angkya tuita tüile; kue akax daokya kax, oshuk nyix, chix hanpakma kaxfünpa ang achang angkya changle.

⁴⁹Ija a otsing tomtata changle, chemthüikoxle kue ma mong tokhange münakax; ikoxle kue chem akaxpuix, ija a, ku tsanle ajokya Apa tokhange kopkya kaxtombu changle.

⁵⁰Chix kaxtome oshuk chitüikya khüzün tsün fale le kue awanpu, ija khoma kue chem akaxpuix, ijabu Apae ku hama chemle apuapuix, ija ningle akaxkya changpu.”