Read Wancho Naga Juhan 13 Bible Online

Juhan 13 - Wancho Naga bible

Juhan 13

¹Athax, Kaitox Pangpwon manguiba, Jisu-e, chix ija chaxwannu dantoxlaxle Hopa hato pao angkya otu nguile hüiüna le awanlaxle, chaxwannu ma tüikyabu, opang chix kux changkya hex, chixe hwom to tüle mongkün; chixe hwom to oshuk kople akhex.

²Jisu hia chix wangshembu fongsax ang thungle tüikya. Simon sasün Juda Iskariot mong ma, Jisu owüiole kox angkya, baoe mongkho adünle kox.

³Hopae chix chak to pangnu tsakzong koxdaoa le Jisu-e awan; chix Zang tokhange nguikya changpu ilaxle chix Zang hato chat angkya changle le chixe awan.

⁴Idaile sax ngokya kha angkya chix ajong, otok ma laxkya chix nyi sikle tox, ilaxle chixe tsangtsa fwot nyi apüilaxle, ija khiadax ma ahinle kop,

⁵Ifüima chixe khua tuita ma ti thok, ilaxle wangshembu cha tsuxle kox tamchu chix khiadax ma ahinle thomkya tsangtsa fwot nyi füi hwom chabu fwotle kox ang süt.

⁶Simon Pitar hato hüi, ikoxle chixe Jisu ang thüi: “Jowanpa, nange ku cha so ang hi?”

⁷Jisu-e chix ang thüi: “Kue chem mokpuix, athax nange münawan; ikoxle nange füichi ma awanüi.”

⁸Pitar-e chix ang thüi: “Otuechu nange ku cha chisoüi.” Jisu-e chix kax to lan: “Kue nang sole chifa thüikoxle athax nang ku füizuimix ang münchang.”

⁹Simon Pitar-e chix ang thüi: “Nwotmix, cha tata chichangle ku chak hia khangchu sole fahüi.”

¹⁰Jisu-e chix ang thüi: “Owae ti ajodaopuix, chixe cha boma mama so ngo angkya oli münchang, chix a pangnu kha wüi tsaole ngole. Mixhuak tuita boma hünzom pangnu wüi tsaole tüile.”

¹¹Owae chix khohang angkya hex, Jisu-e awanle ngo; Idaile chixe “Tuita boma hünzom pangwüi tsaole tüile”, le thüi.

¹²Jisu-e hwom cha sole fakya füima, chixe ma nyiza lax üntoxle anaole chix ngwotnui ma thung ilaxle hwom ang thüi: “Athax kue hünzom ang chem mokle aho koxdao puix, ija awanchami?

¹³Hünzome ku ang Nwotmix tamchu Jowanpa le nyakle; ija a hünzome otsingtsing wüi nyakpu; chemthüikoxle ku a ija changkya jao.

¹⁴Ku, Nwotmix tamchu Jowanpa-e athax hünzom ang cha sole koxpu; ilailaile hünzomechu tata cha sole kox angkya changle.

¹⁵Chemthüikoxle kue hünzom ang mokle koxkya ningle hünzomechu mok angkya hanpakma, kue hünzom ang olom tuita ahopu.

¹⁶Otsingtsingma kue hünzom ang thüipu, ma hopunu füi da wüi achongkya münchang tamchu owae tsanpuix, chix füi tsanle apaokya mix wüi achongkya chichang.

¹⁷Athax hünzome ija otsingtsing bama awandaoa ilaxle ija mwot ang achangle twonkya zuma hünzom ang mong otukux müiüihex!

¹⁸“Kue hünzom pangnu bama akax ngokya münchang; kue kamle kopdaokyabu kue awanle; ikoxlechu Otsao Lai kax ija otok to ngaile aho angkya changpu: Ku füi tomle fongsax ngokya tuita ku zan to ka angkya changle.

¹⁹Ija otue ngaile laiüi hex, ‘Ku a Ku changpu’ le hünzome ongkya hanpakma, ngaile machang tanto wüi kue hünzom hama apuale thompu.

²⁰Otsingtsingma kue hünzom ang thüipu: Kue mwot tsanle apaokya mix owae pongle kopüi hex, chixe ku pongle kopkya changpu; ilaxle owae ku pongle kopüi hex, chixe ku tsanle ajokya mix pongle kopkya changpu.”

²¹Jisu-e ile akax füima, chix mongshunle hüi ilaxle angaile akax: “Otsingtsingma kue hünzom ang thüipu, hünzom kha angkya mixhuak tuitae ku khohang angkya changle.”

²²Chixe opupu ang thüipuix le hwom ang khosam. Wangshembue tata to ahu.

²³Wangshembu khama, owa to Jisu-e mongkünle tüikya hex, chix a Jisu hama apiale ngole tüikya.

²⁴Simon Pitar-e chix chito hüilaxle thüi: “Chixe owa bama akaxpuix, kwom hama apua hüile thüihu.”

²⁵Ikhoma ija füizuimix Jisu hato soxle hüilaxle atüi: “Jowanpa, ija a owa hex?”

²⁶Jisu-e lan: “Kue an som laxle owa ang koxüi hex, ija a chix changüi.” Jisu-e an som laxle Simon sasün Juda Iskariot ang kox.

²⁷An kopkya füi tomle bao chix ma nop. Jisu-e chix ang thüi: “Nange chem mok angkya tüipuix momle moklax.”

²⁸Ija kax chix füi chem khoma akaxpuix le süt saxle ngokya kha angkya owaechu chiawan.

²⁹Juda Iskariot ma ngun suak thomkya daile, pangpwon hanpakma hwom mwotkat shak angkya chichangba mixshix-zasabu ang tütali laxkoxle akaxkya changüi le züizüie thüt.

³⁰An pongle koplan laxle Juda Iskariot ima wüi homtho to laile pao; iponge zang nakle changünkya.

³¹Ile chix homtho to laile paokya füima, Jisu-e thüi: “Athax Khünak Hosa fuazangle tamchu chix ma Zang fuazangle aho daoa.

³²Chix makhange Zang fuazang angaile jangchangba, Zangechu chix ma wüi Khünak Hosachu fuazang ang tomüi. Ija ile chixe athax wüi mok angkya changle.

³³Ku naosombu, athaxpi ku hünzom füi aluile ngoüi münchang. Hünzome ku lomüi; kue Jehudi nok pünpa-chongwangbu füi akaxdaokya ningle hünzom angchu thüipu, ku pao angkya khato hünzom ngui ang münthoüi.

³⁴Ikoxle athax kue kaxtom hozün hünzom ang koxpu: tata to mongkünle tüilax; kue hünzom to mongkünkya ningle hünzomchu tata füi mongkün ma ngo angkya changle.

³⁵Hünzom ma tata to mongkünkya jangtüiba, hünzom a ku wangshembu changpu le pangnusae awan ang kopüi.”

³⁶Simon Pitar-e chix ang thüi: “Jowanpa, nang ojong khato pao ang?” Jisu-e lan: “Athax ku pao angkya khato nange ku füito ngui ang münthoüi; ikoxlechu füima tho angkya changle.”

³⁷Pitar-e chix ang thüi: “Jowanpa, chem khoma kue athax nang man to ang chitho angkya? Ku nang bama zi angkya kople achwon ngopu.”

³⁸Jisu-e lan: “Nange ku bama nang tsün kox ang thoüi nyi? Otsingtsingma kue nang ang thüipu, awün o haüi thoto wüi, nange ku owa hex müntsing le othom azom ma akax angkya changle.”