Read Wancho Naga Juhan 14 Bible Online

Juhan 14 - Wancho Naga bible

Juhan 14

¹Jisu-e thüi: “Hünzom ang mong taxma; hünzome Zang to onglax ilaxle ku tochu onglax mi.

²Apa hom to ngwotnui tüihu le; ku hünzom hanpakma ngwotnui achwon ang pao angkya changle. Ibu ile chichang thüikoxba kue hünzom hama ija chiakax ngose.

³Tamchu ku paolaxle ngwotnui achwon füima, ku tamchatle nguiüi, ilaxle ma hato hünzom laxlax tox angkya changle; ija khoma ku ojongto ngo angkya hex, hünzomchu ikhato ngo angkya changle.

⁴Ku pao angkya lomtang hünzome awan ngopu ilaxle ojong to pao angkya hex lechu awan ngopu.”

⁵Thoma-e chix ang thüi: “Jowanpa, nang ochito pao angkya hex kwome münawan; jangchangba ikhato ngui angkya lomtang chemle awan manüi?”

⁶Jisu-e chix ang thüi: “Lomtang; Otsingtsing tamchu Khüzün a ku changpu; ku makhange chichang thüikoxle Apa hato owachu ngui ang müntho.

⁷Athax hünzome ku awanpu, ilaxle Apa chuwüi awanpu; athax makhange hünzome chix awandaoa tamchu chix ngündaoa.”

⁸Filip-e chix ang thüi: “Kwom hama Hopa ahohüi; ijae wüi kwom mongzom müiüi.”

⁹Jisu-e chix ang thüi: “Filip, ku hünzom füi ibibile ngokox ngaxchu, nange ku matsing lehi? Owae ku ngündao puix, chixe Apachu ngündaoa; jangchangba hünzom hato Hopa ahohüi le nange büthüikya to thüipu?

¹⁰Ku a Apa ma ngopu ilaxle Apa ku ma ngopu; kue chempang kax hünzom füi akax daopuix, ijabu ku mongmong to akaxkya münchang; ikoxle ku ma ngokya Apae chix mwot mokpu, le nange ongchami, Filip?

¹¹Ku Apa ma ngopu ilaxle Apa kuma ngopule hünzome ija ku kax to onglax; chichangkoxchu kue mokkya mwot khoma thüichu ku to onglax.

¹²Otsingtsingma kue hünzom ang thüipu: Owae ku to ongpuix, kue chempang mwot mokpuix, chixechu ija mwot moküi; ilaxle ijabu mwot to lyemle ngaxchu chix ang mok ang tomüi; chemthüikoxle ku a Apa hato pao angkya changle.

¹³Ilaxle hünzome ku mün ma chempang juüi hex, ija kue moküi; ile Hosa ma Hopa fuazangle naxchang ang.

¹⁴Hünzome ku ma, ku mün ma tüta li jukoxchu, ija kue mokle koxüi.

¹⁵“Hünzome ku to mong jangkünba, hünzome ku kaxtombu kax ma laxlax.

¹⁶Kue Apa ma juüi ilaxle hünzom füi jento ngo angkya hanpakma, chixe hünzom ang fongmix mama tuita kox angkya changle.

¹⁷Chix a Zang otsingtsing bama ngaile aho angkya Chasa changle. Chix a chaxwannue pongle kop ang tho angkya oli münchang; chemthüikoxle chaxwannue chix münngün tamchu ojao münawan. Ikoxle hünzome chix awanpu, chemthüikoxle chix a hünzom füi ngole tamchu hünzom ma ngole.

¹⁸“Otue ku paoüi hex, kue hünzom tata danle müntox; ku hünzom hato tamchatle nguiüi.

¹⁹Noxta ngokya füima, chaxwannue ku münngünüi, ikoxlechu hünzome a ku ngün ang kopüi; tamchu ku ozün ma tüikoxle hünzom chuwüi ozün ma ngo angkya changle.

²⁰Otue ija nyix nguile hüiüi hex, hünzome ku Apa ma tüile, tamchu ku chemle Apa ma ngopuix ija ningle hünzomchu ku ma ngole le awan ang kopüi.

²¹“Owae ku kaxtombu pongle koppuix, üntoxle ija kax ma laxle tüipuix; changle chixe ku to mongkünkya a. Owae ku to mongkün puix, Apae chix to künüi; kuechu wüi chix to mongkünüi ilaxle ku lailai to chix hato ngaile ahoüi.”

²²Juda-e (Iskariot münchang) chix ang thüi: “Jowanpa, chaxwannu hato chingai homtoxle kwom tata hato nang ngaile aho angkya chemle changmanüi?”

²³Jisu-e lanle chix ang thüi: “Owawae ku to mongkünkya jangtüi thüiningle, chixe ku kax ma laxle tüiüi. Apae chix to mongkünüi; Apa kukhi chix hato nguiüi ilaxle chix füi ngoüi.

²⁴Owae ku to chikün puix, chixe ku hwon-nwot kax ma münlax. Hünzome hwon-nwot chem atat puix ija a ku hwon-nwot münchang ikoxle ku tsanle ajokya Apa tokhange hüikya changpu.

²⁵“Ku hünzom füi ngo tanto wüi ibu zangwün kue hünzom füi akaxdaoa.

²⁶Ikoxle fongmix ija Otsao Chasa, Apae owa ku mün ma ahüi angkya hex, chixe hünzom hama pangnusa apuale fa angkya changle, ile kue hünzom füi akax daokyabu pangnu texle atak ang tomüi.

²⁷“Kue hünzom füi mongsom toxpu; ku mongsom tuita kue hünzom ang koxpu; kue ija hünzom ang chaxwannue koxkya ningle koxkya chichang. Hünzom ang mong male tamchu abanle taxngo, tamchu taxza.

²⁸‘Ku paoüi ilaxle hünzom hato tamchatle nguiüi’ le akaxkya ku kax hünzome atatle laxdaoa. Hünzome ku to mongkün koxle hünzom ang mongmüi tüise, chemthüikoxle ku a Apa hato pao angkya changle; chemthüikoxle Apa a ku füi ngaxchu akhokya changle.

²⁹Ilaxle ija ile changkya zuma hünzome ong angkya kuxma, ile machangba wüi kue hünzom hama akaxle thompu.

³⁰Hünzom füi ku aluile akax ngo ang müntho; chemthüikoxle chaxwannu wanghom hüile ngole.

³¹Ku tu to chix a chemchu münchang, ikoxlechu kue Apa to mongkünkya khoma, kue, Apae ku ang fakya kaxtom ma mokpu le chaxwannu hato awan ang tom angkya kuxmale chix nguiüi. “Ajonghüi, kem a ikha angkya paohax.”