Read Wancho Naga Juhan 16 Bible Online

Juhan 16 - Wancho Naga bible

Juhan 16

¹“Hünzome ma mongong chidan angkya kuxma kue hünzom hama ibu akaxdaoa.

²Hwome hünzom sinagok tokya alaiüi, changpu; opange hünzom langüi hex, hwome Zang mwot mokpu le tex angkya tunu nguile hüiüi.

³Hwome ku wüi changkoxlax chichangba Apa wüi changkoxlax chiawankya khoma hünzom to ile hwonüi.

⁴Ikoxlechu ibu mwot bama otue hwom ang hanpak nguile hüiüi hex, kue hünzom hama akax ngokya ibu hanpakma akax ngokya changpu le awanle kop angkya kuxma kue ibu pangwüi hünzom hama apuadaoa. “Kue pongwang tokhange wüi ibu bama hünzom hama chiwünkya a, ku hünzom füi tomle ngokya khoma chiakaxpu.

⁵Ikoxlechu athax ku a, ku tsanle ajokya mix hato chatüi, ikhoma hünzom khama owaechu ‘Nang ochi to pao angkya?’ le ku ma chiatüi.

⁶Ikoxlechu kue hünzom ang thüipu; hünzom ang mong ma mongmaxkyae awangle tüile.

⁷Ikoxchu kue hünzom ang otsingtsing akaxpu, ku paokoxle wüi hünzom zongma amüikya ang changüi, chemthüikoxle ku chipao thüikoxle Fongmix hünzom hato chihüiüi; ku jangpao thüikoxle kue chix hünzom hato ahüi ang tomüi.

⁸Ilaxle chix nguikya zuma, chixe ochax bama, sukya bama, kaxfün bama; ibu bama chaxwannu angkya khünaknu thaikya kaxkhi faüi.

⁹Ochax bama hwom thaile ngo; chemthüikoxle hwome ku to chiong.

¹⁰Sukya bama hwom thaile ngo, chemthüikoxle ku Apa hato paoüi ilaxle hünzome ku ngün ang chikopüi;

¹¹kaxfün bama thaile ngo, chemthüikoxle ija chaxwannu wanghom hanpak ang kaxfün fadaoa.

¹²“Ku ma hünzom füi akax angkya zangwün tüihu le; ikoxlechu athax hünzome ibu adu ang münthoüi.

¹³Ile changkoxchu, Otsao Chasa nguikya zuma, otsingtsing pangnu hato chixe hünzom zun angkya changle. Chixe ma mongtex ma chiakaxüi, ikoxle chempang chixe atat puix, ijabu bama tamchu hüi angkya chempang tüipuix, ijabu bama chixe hünzom ang awan ang tomüi.

¹⁴Chixe ku fuazang ang tomüi, chemthüikoxle chixe kue akoxkox laxlax tox angkya changle, ilaxle ijabu hünzom hama wünüi.

¹⁵Apa kux chempang tüipuix, ibu pangnu ku kux; ija khoma chixe, kue akoxkox laxlaxle tox angkya changle. Üntoxle kue thüipu, chixe ibu hünzom ang awan ang tomüi.

¹⁶“Hanpak noxta ngokya füima hünzome ku münngünüi; ikoxlechu hanpak noxta ngo füima hünzome ku ngün ang kop angkya changle.”

¹⁷Ija khoma chix wangshembu kha angkya züizüie tata füi akaxle zangwün: “Hanpak noxta ngokya füima keme chix ngün ang chikop angkya tamchu hanpak noxta ngokya füima tamchatle keme chix ngün ang kop angkya; ija a chix Hopa hato pao angkya daile, le chixe chem hanpak ang akaxpuix?

¹⁸Hanpak noxta, le a chem ang thüi? Chixe chem hanpak akax ngopuix keme ojao müntsing hex!”

¹⁹Hwome chix ma atüise le tsukya Jisu-e awanle lax üntoxle chixe hwom ang thüi: “Hanpak noxta ngo füima hünzome ku münngünüi chatlechu hanpak noxta ngokya füima hünzome ku chatle ngün ang kopüi, le thüikya ku kax khoma hünzome tata bama zangwün atsat ngopia?

²⁰Otsingtsingma kue hünzom ang thüipu; hünzom sopüi ilaxle mong maxüi, ikoxlechu chaxwannu a mongmüiüi; hünzom ang mongmaüi ikoxlechu hünzom mongma a mongmüi ang achangüi.

²¹Sheko tuita ang naoput wok kak pongma mongtsikle, chemthüikoxle she hato sikngün angkya otu ngangle hüikoxle. Ikoxlechu nao ngünle khangkho zangngai füima, she-e ija sikngün alakle asamüi, ikoxle she-e nao ngün ang kopkya khoma mong mix tüle müiüi.

²²Ija lailaile athax a hünzom hanpakma mongma tüile; ikoxlechu kue hünzom chatle ngün ang kopüi, ija pongma hünzom ang mongmüi hüiüi, ija mongmüi a hünzom angkya owaechu pale pao ang chithoüi.

²³“Ilaxle ija nyix nguile hüikya zuma hünzome ku ma chemchu chijuüi. Otsingtsingma kue hünzom ang thüipu, Ku mün ma ajuju Apae hünzom ang pangnu koxüi.

²⁴Athax kople hünzome ku mün ma chemchu maju; julax ija hünzome kopüi, ile hünzom mongmüi okhonguikya ang achangüi.

²⁵“Kue kaxpan füi ibu hünzom hama akaxpu; ikoxle kaxpan chilax homtoxle kue Apa bama hünzom hama ngaitho le akax angkya tunu nguile hüiüi.

²⁶Ija hanpak nguikya zuma hünzome ku mün ma chix ma juüi; ilaxle kue Apa ma hünzom mün ma juüi le Münthüi;

²⁷Chemthüikoxle Apa chix jaojaoe hünzom to mongkünle. Hünzome ku to mongkün tamchu ku a Zang tokhange hüikya changpu le mongongkya khoma Apae hünzom to mongkünkya changle.

²⁸Ku a Apa tokhange hüipu ilaxle chaxwannu to nguipu; ikoxle athax a kue chaxwannu dantoxüi ilaxle Apa hato paoüi.”

²⁹Chix wangshembue akax: “Hulax, athax nange kaxpan füi chichang homtoxle ngaitho le akaxle.

³⁰Nange pangnu awanle le kwome tsingdaoa; athax owawae nang ma atüi ngo angkya fang jao münchang. Ibu makhange kwom ang, nang a Zang tokhange hüikya changpu le ong ang koxle.”

³¹Jisu-e hwom kax to lan: “Athax a hünzome mongong ünpuix nyi?

³²Hulax, hünzom a mahomhom to afa le paoüi ikoxle ku tata danle toxüi; iningkya hanpak nguile hüile. Ija hanpak a athax changle. Ikoxlechu ku a kutata le chichang; chemthüikoxle Apa a ku füi tüile.

³³Ku füikya notom ma hünzome mongsom kop angkya kuxma, kue ibu hünzom füi akax ngopu; chaxwannue hünzom to sikngün zolit ang tomüi, ikoxlechu mong chonglax; chemthüikoxle kue chaxwannu to anao daoa!”