Read Wancho Naga Juhan 17 Bible Online

Juhan 17 - Wancho Naga bible

Juhan 17

¹Jisu-e ibu akaxle tsuakkya füima, dingchi to hulaxle thüi: “Apa, hanpak nguiüna, Hünsa ang fuazang laxkox, ile Hünsae nang ang fuazang koxtsuak angkya hanpakma.

²Nange chix ang afafa pangnusa ang, oshuk chitüikya tsün khüzün koxtsuak angkya hanpakma, nange chix ang khünaknüsa thakma tsakzong koxpu.

³Oshuk chitüikya tsün khüzün le thüikoxle, tuita otsingtsing Zang, nang awankya tamchu nange tsanle ajokya Jisu Khrista tsingkya ang thüipu.

⁴Kue chaxwannu hato nang fuazang ahodaoa; nange ku ang koxkya mwot kue tsuakdaoa.

⁵Ikoxle athax a, O Apa, chaxwannu mazing tanto wüi, nang füi tomle ngo tanto ku ma oja fuazang tüikya hex, ija fuazange, ku nang füi womle tüipongma fuazang ang tomhüi.

⁶“Chaxwannu angkya khünak nange ku ang opang koxdao laxpuix, hwom hama kue nang tsing ang koxdaoa. Hwom a nang kux changkya, ikoxle nange ku ang koxpu; hwome nang Kax pongle kopdaoa.

⁷Idaile athax nange ku ang fale tüikya pangnu nang makhange hüikya changpu le hwome awan ang kopdaoa.

⁸Nange ku ang akoxkox kaxho kue hwom ang koxdaoa, ilaxle hwome ija pongle kopdaoa; ilaxle ku a nang makhange hüikya changpu le hwome ongle.

⁹“Kue hwom hanpakma joppu; kue chaxwannu bama jopkya münchang ikoxle nange ku ang fadaokyabu hanpak ang joppu; chemthüikoxle hwom a nang kux changle.

¹⁰Ku ma chempang tüipuix, ibu abakle nang kux changle; ilaxle nang ma chempang tüilaxpuix, ibu bakle ku kux changpu; üntoxle ibu makhange ku fuazang ahole.

¹¹Athax ku nang hato hüile ngopu; ku a chaxwannu ma chitüi; ikoxle hwom a chaxwannu ma ngo angkya changle. Otsao Apa, kem chemle tuita hex, ija ningle hwomchu wüi tuita ma naxngo ang, nange ku ang koxkyabu ang nang mün ma tüikya tsakzong füi sünle thomhüi.

¹²Ku hwom füi ngotanto, nange ku ang fakya je füi kue hwom sünle thompu; kue hwom nyepu ilaxle Otsao Lai Kax kotok to ngaile lai angkya kuxmale max angkya sasün boma hwom kha angkya tuitachu chiamüt.

¹³“Ikoxlechu ku athax nang hato hüipu; ilaxle hwom mong khama ija ku mongmüi okhongui le tüi angkya kuxma, chaxwannu ma kue ijabu akaxpu.

¹⁴Kue hwom ang nang kax fadaoa; chaxwannue hwom thua anule, chemthüikoxle chemle ku chaxwannu kux chichangpuix, ija ningle hwomchu wüi chaxwannu kux ang chichang koxle.

¹⁵Nang ma kue chaxwannu angkya paofa le jukya münchang, ikoxle kue nang ang bao chak tokya hwom sünle thomfa le thüi wüi.

¹⁶Chemle ku chaxwannu kux chichang puix, ija ningle hwomchu wüi chaxwannu kux münchang.

¹⁷Otsingtsingma hwom atsaokox; Nang kax a otsingtsing changle.

¹⁸Nange ku chemle chaxwannu to tsanle ajopuix ija lailaile kuechu hwom chaxwannu to tsanle apaopu.

¹⁹Üntoxle hwom hanpakmale ku kulualua to atsaole nang chak to danpu; ija ningle hwomchu wüi nang hato otsao ma naxngui.

²⁰“Kue ibu hanpak tata ma jopkya münchang, ikoxle hwom kaxho makhange opange ku to ongüi hex, ibu hanpakmachu kue joppu. Hwom pangnu tuita ang naxngo le kue joppu.

²¹Apa, chemle nang ku ma ngo, ku nang ma ngopuix, ija ningle hwomchu wüi kem ma naxngo. Nange ku tsanle ajopu le chaxwannue awan ang tom angkya kux male hwom tuita ang naxngo kox.

²²“Künyi chemle tuita hex, ija ningle hwomchu wüi tuita ang naxchangle nange ku ang fakya fuazang tuitata wüi kue hwom ang koxdaoa;

²³Ku hwom ma ilaxle nang ku ma, ikoxle hwom owüiole tuita ang naxachang; ile tix nange ku tsanle ajopu tamchu nange ku to chemle mongkün puix ija lailaile hwom tochu wüi mongkünpu le chaxwannue awan angkya hanpakma.

²⁴“Apa, nange ibu ku ang koxdaoa, idaile ku ojong to ngoüi hex, hwomchu wüi ija khato ngo angkya a ku mongtex changle. Ile oja fuazang nange ku ang koxdaopuix, ija hwome naxngün; chemthüikoxle chaxwannu mazing tanto wüi nange ku to mongkünpu.

²⁵Otsao Apa! Chaxwannue nang chitsing, ikoxlechu kue nang awanpu; ilaxle ku a nange tsanle ajokya changpu le hwome awanle;

²⁶nang ma ku to künkya mongkün oja tüipuix, ija mongkün hwom ma naxngo; ile ku chuwüi hwom ma naxngo ang, kue nang hwom hama apuale fadaoa. Tamchu kue ile othuithuima mokle ngo angkya changle.”