Read Wancho Naga Juhan 2 Bible Online

Juhan 2 - Wancho Naga bible

Juhan 2

¹Ifüima nyix azom lükya nyix, Galili angkya Kana ting ma aju-asomkya tüikya. Jisu honuchu wüi ikhato tüikya;

²ilaxle ija som to Jisu hia chix wangshembuchu wüi ahyen.

³Ikoxle ju abakkya zuma, Jisu honue chix ang thüi: “Hwom ang ju müntüi.”

⁴Ikoxle Jisu-e honu ang thüi: “Ija bama künyi khosam angkya chem tüi? Ku ang hanpak mahüi!”

⁵Jisu honue dabu ang thüi: “Hünzome chix kax ma laxle moklax.”

⁶Jehudi noke khongai zom ma lax ang ti thomkya, tupong to zebün pong shakya long füi zingkya ti tikkux thua azok ikhama atuakle tüikya.

⁷Jisu-e hwom ang thüi: “Tikkux ibu ma awangle ti jekox.” Hwome ibu pangnu ma okax alyep le ti je.

⁸Ifüima chixe hwom ang thüi: “Athaxpi ikha angkya ti muale kho laxle mopa akhokyabu hato laxkox.” Ilaxle hwome ile mok.

⁹Iponge ija ti a ju ang achangle ngoünkya; chixe ija hidaole wanle ano ikoxchu ojong khatokya hex chiawan (Ija a ti khokya dabu tatae awan); chixe tuipa nyak ilaxle chix ma atüi,

¹⁰“Pongwang ma ju amüimüi koxle kopkya wanlom; mixwünbue iwüi lingüi le ling füima tix süchimüikya faüi; ikoxle nange a athax kople ipong müikya ju khomle thompia?”

¹¹Ile pongwang lekya chix ohünotün mwot Jisu-e Galili angkya Kana ting ma mok; ile chix fuazangkya kotok to ngai; ilaxle chix wangshembue chix to ong.

¹²Ifüima chix honao hia honu hwom tamchu wangshembu füi tomle chix Kaparnaum to ju. Ikhato hwom hanpak hidaole nui.

¹³Athax a Jehudi nok khosün atakkya Kaitox Pangpwon tu nguile hüi, idaile Jisu Jerusalem to ngui.

¹⁴Chix thoma Zangshwom-Hom ma maihu, chun tamchu osubu hangkya khünakbu ilaxle ngun alüixkyabu ma tüntong ma thungle nui.

¹⁵Chixe fit angkya zu apüi, ilaxle chun hia maihubu Zangshwom Homkha angkya jwonle alai; tamchu ngun alüixle ngokyabu angkya tüntongbu khole ngun chiakle awüt.

¹⁶Ilaxle chixe jua-o hangkyabu füi akax: “Ibu a ikha angkya paodaoa; Ku Apa hom a thalex hom ang achang thomkya zakün!”

¹⁷Chix wangshembue ile zale thomkya Otsao Laikax texle atak: “Nang Hom hanpakma sungkyae ku mong wün ningle achuale.”

¹⁸Jehudi nok pünpa-chongwangbu chix hato chatlaxle atüi: “Nange ile mok angkya olom tüipule aho ang nange kwom hato ohünotün mwot ang chem mokle ahoüi?”

¹⁹Jisu-e hwom kax to lan: “Ija Zangshwom-Hom pünlax, ilaxle nyix azom ma wüi kue zingle alaiüi.”

²⁰Ikoxle Jehudi khünakbue thüi: “Ija hom zing ang zang punyi azom laxpu, ikoxle nange nyix azom ma wüi ajongüi o?”

²¹Ikoxle chixe Zangshwom-Hom bama wünkya a chix pum hanpakma akaxkya changkya.

²²Ija khoma chix anaole zokya füima tix wangshembue ija chix kax texle atak; ilaxle Otsao Lai Kax to tamchu Jisu-e akaxkya kax to ong.

²³Kaitox Pangpwon tuke Jisu Jerusalem to ngui pongma chixe mokkya ohünotün mwotbu ngünlaxle khünaknue chix to mongong.

²⁴Ikoxlechu Jisu-e hwom pangnusa mong wüi awanle ngokya daile, hwom ang chix to ong ang chitom.

²⁵Chixe khünaknu nok thwonlop laxle ngokya daile owaechu chix hama hwom bama apuale fango angkya mwot chitüi.