Read Wancho Naga Juhan 20 Bible Online

Juhan 20 - Wancho Naga bible

Juhan 20

¹Hatdang owang nop kaile, huazung ma wüi Meri Magdalen zuk to ju ikoxle zuk angkya long a nwonle pao bang.

²She momle chatlaxle Simon Pitar tamchu mama füizuimixbu opang to Jisu-e tüle mongkün, hwom hato hüilaxle thüi: “Hwome zuk angkya Jowanpa paodaoa. Hwome chix ojong to toxdopuix kwome münawan!”

³Ikoxle Pitar hia mama wangshembuchu wüi zuk chito ju.

⁴Okhi pangnyi tomle zik; ikoxle mama wangshem mixe Pitar tholüile le. Chixe zuk ha thoma alop.

⁵Chixe aku le hu koxle Jisu to lopkya nyidax adütle toxkya ngün; ikoxchu chix omongkha to dongle chihu.

⁶Simon Pitar a chix füifüima azuile hüi, chix a tangthole zuk khato dongle hu; ilaxle Jisu khang ma ngüikya nyidax adüt toxkya ngün.

⁷Chix khangkho ma toxkya nyi a nyidax füi tomle chichang homtoxle mama khama ashyeple bang.

⁸Ija ma pongwang ma zuk ha alopkya wangshemchu wüi ikhato dong ilaxle ong.

⁹Chemthüikoxle “chix a zidaokya chatle azangle zo angkya oli changpu”, le thüikya Otsao lai kax athaxchu hwome matsing.

¹⁰Ifüima wangshem nyi mahomhom to chat.

¹¹Meri a zuktho ma sople ajong ngokya. She-e sopngale zuk kha to nople huno.

¹²Ija ma she-e kaxtaimix anyi, tuita Jisu mang dankya khangchi ma ata mix a chachi male thungle ngokya ngün.

¹³Okhie she ang thüi: “Mixcha, nang büthüikoxle sople ngopu?” she-e hokhi ang hüi: “Hwome ku Jowanpa paodaoa ilaxle hwome chix ojong to thom daopuix kue münawan!”

¹⁴Ifüima she-e füichi to aküile hukya ma Jisu ajongle ngokya ngün. Ikoxlechu she-e ija a Jisu changpu le chitsing.

¹⁵Jisu-e she ang thüi: “Mixcha, nang büthüikoxle soppu?” She-e chix a tsawat nyet mix changüi le thütlaxle thüi: “Alixachong, chix a nange paokya jangchangba, chix thomkya kha ku hama apuahüi.”

¹⁶Jisu-e she ang thüi: “Meri.” She-e chix kax to lanle thüi: “Rabai!” Ija a Nwotmix le thüikya tha.

¹⁷Jisu-e she ang thüi: “Ku to taxtwon; chemthüikoxle athax kople ku Apa hato machat! Ikoxle kutüi kunao hwom hato paolaxle ku a, owa hwom zongtochu Hopa tamchu Zang changpuix, ija Apa hato chatüi ta le thüikox.”

¹⁸Idaile Meri magdalene nguilaxle wangshembu hama thüi: “Kue Jowanpa ngündaoa.” Tamchu she-e chixe akaxkya kaxchu hwom hama taile apua.

¹⁹Ija a hatdang owang nyix hansong changkya. Jehudi nok pünpa-chongwangbu thua zalaxle wangshembu a hwom ngokya kha ka hak laxle ngopongma, Jisu hwom osung wama ngaile ajong. Chixe hwom ang thüi: “Hünzom füi mongsom naxtüi!”

²⁰Ile akax füima, chixe hwom ang chakwok angkya hia samba angkya makthün aho. Ikoxle Jowanpa ngünlaxle wangshembu ang tüle mongmüi.

²¹Jisu-e chatlechu hwom ang thüi: “Hünzom füi mongsom naxtüi! Apae ku chemle tsanle apaopuix ija lailaile kuechu hünzom tsanle apaopu.”

²²Chixe ija kax akax füima, hwom to zak füi mütle thüi: “Otsao Chasa koplax;

²³Hünzome opang ang ochax thailak koxüi hex ibu ang ochax thailak tüiüi; ikoxle opang ochax hünzome thailak chifale dantox üihex, hwom ang thailak müntüiüi.”

²⁴Ikoxle Jisu ngai pongma, bünba anyi kha angkya tuita, Thoma (owa ang apyetle puxkya nao le nyak) chix a hwom khama chiasu.

²⁵Ikoxle wangshem mamabue chix ang thüi: “Kwome Jowanpa ngündaoa.” Ikoxlechu chixe hwom ang thüi: “Kue chix chakfa angkya janman mangün tanto tamchu ija ma ku chakkhi masho tanto, ilaxle chix samba makthün ma ku chak masho tanto kue münong.”

²⁶Nyix achyet füima, chix wangshembu a hom mongto ngokya; ikhama Thomachu wüi tüikya. Hwom a kahak laxle ngokya. Jisu nguile osung wama ajong laxle thüi: “Hünzom füi mongsom maxtüi.”

²⁷Ija ma chixe Thoma ang thüi: “Ku chak to hulax ilaxle ikhama nang chakkhi sholax tamchu ku samba mak ma nang chak sholax; chiongle taxngo, onglax.”

²⁸Thoma-e lanle chix ang thüi: “Ku Jowanpa tamchu Ku Zang.”

²⁹Jisu-e chix ang thüi: “Nange ku ngün ang kopkya khoma ongpia? Ikoxle osün chingün homle ongkyabu tamtaikya mohiman.”

³⁰Ija laipex ma chizakya mama ohünotün mwotbuchu wüi wangshembu mike ngünle huanuma mok.

³¹Ikoxchu Jisu a Khrista, Zang Hosa changpu le hünzome ong angkya hanpakma, tamchu ong laxle chix mün ma hünzome tsün khüzün atak angkya kuxma, ija kax zapu.