Read Wancho Naga Juhan 21 Bible Online

Juhan 21 - Wancho Naga bible

Juhan 21

¹Ija füima Tiberia Shinthuk-titung ma Jisu-e anaolechu wangshembu hato chix ngaile aho; ija a ile chang:

²Simon Pitar, Thoma (apyetle puxkya mix) Nathanel (Galili tokya Kana angkya), Zebedi sasün hwom tamchu Jisu wangshem mama anyi, hwom bibi tomle asukya.

³Simon Pitar-e hwom ang thüi: “Kupi nyax dao ang kaüi.” Hwome chix ang thüi: “Kwom chuwüi nang füito kaüi.” Hwom khua ma ka. Ija ja hwome tuita ngaxchu chikop.

⁴Ikoxle zanghan chüdüne Jisu shua kax ma ajong, ikoxle wangshembue ija a Jisu changpu le chitsing.

⁵Ikoxle Jisu-e hwom ang thüi: “Naosombu, hünzome chemchu münkop hia?” Hwome chix ang thüi: “Jangta ngaxchu münkop.”

⁶Ikoxle chixe hwom ang thüi: “Khua zongma chichi kao ma sha fulax, jangchangba hünzome tükopüi hex.” Ikoxle ijongkha ma hwome sha fu. Izuma nyax huanuma wom, ikhoma hwom zongto sha wai ang tüle tsak.

⁷Wangshembu khama owa to Jisu-e mongkün puix, chixe Pitar ang thüi: “Ija a Jowanpa changpu.” Ikoxle ija a Jowanpa changpu le atatkya zuma, Simon Pitar-e nyi lax (chemthüikoxle chix ipongma ohua ma asukya), ilaxle ti khato füt.

⁸Ikoxle wangshem mamabue khua ahixkya ma sha a nyaxe awang le bele jen (chemthüikoxle hwom a fa makhange fak hota tukux atsai lanle tüikya).

⁹Otue hwome fa alop, izuma wünhan dingma nyax hia an hiadaole le ngün.

¹⁰Jisu-e hwom ang thüi: “Hünzome athax kopkya kha angkya nyax tüjen hüi.”

¹¹Simon Pitar khua ma ngalaxle nyax chongkyakya hota punyi bün azome awangle tüikya sha fako to bele alai; ile ibibi nyax tüikox ngaxchu sha chikyet.

¹²Ilaxle Jisu-e hwom ang thüi: “Hüilax üntoxle saxlax.” Chix a Jowanpa changpu le awanlaxle “Nang a owa?”, le atüi angkya wangshembu khama owa ang mong chichong.

¹³Jisu hüilaxle ija nyax hia an hwom ang kox.

¹⁴Jisu zidaokya anaole zokya füima wangshembu hato laile ahokya ija a othom azom lükya.

¹⁵Hwome süt saxle tsuak füima Jisu-e Simon Pitar ang thüi: “Juna sasün Simon, ijabu to nüile nange ku to künpuix nyi?” Simon Pitar-e lanle thüi: “Changpu Jowanpa, kue nang to künle le nange awan ngopu.” Jisu-e Pitar ang thüi: “Ku chun hosabu to hume kox.”

¹⁶Jisu-e chix ang anaolechu wüi thüi: “Juna sasün Simon, nange ku to künpuix nyi?” Simon-e lan: “Changpu Jowanpa, kue nang to künle le nange awan ngopu.” Jisu-e thüi: “Ku chunbu nyekox.”

¹⁷Jisu-e chix ma othom azom lekya machu atüi: “Juna sasün Simon, nange ku to künpuix nyi?” Chixe Jisu to mongkün puix nyi le othom azom ma akaxkya khoma Pitar ang mongtsik dong. Ilaxle chixe Jisu ang thüi: “Jowanpa, kue nang to künle le nange bakle awan ngopu.” Jisu-e chix ang thüi: “Nange ku chunbu tuxkox.”

¹⁸“Otsingtsingma kue nang ang thüipu, nang naosün ma ngopongma nange nang lualua to züpak apakpu, tamchu nang ochito paose tsupuix ichito paopu; ikoxle ongai nang mixpa ang achangüi hex, nange nang chak thuiüi ilaxle owawae nang chak ma khaüi ilaxle nang paose chitexkya chito syetle paoüi.”

¹⁹Chix chemle zikya makhange Pitar-e Zang hato fuazangkya apüi angkya hex; Jisu-e chix füi ija bama akaxkya changkya. Ilaxle chixe ija kax akax füima Pitar ang thüi: “Ku füito azuilax.”

²⁰Pitar-e aküile hu, ikoxle Jisu-e mongkünkya wangshem tuita, owa ajaning fong sax pongma Jisu thünkhux ma ana laxle ngokya hex, tamchu “Jowanpa nang khohang angkya mix owa?”, le atüikya wangshemchu füichi ma ngün.

²¹Chix ngünlaxle Pitar-e Jisu ang thüi: “Jowanpa, ija mixsün a chemle changüi?”

²²Jisu-e chix ang thüi: “Ku mahüi tanto chix a ozün ma ngo ang tom koxle nang to chem pox, nange a ku man tolax!”

²³Ikoxle ija wangshem a münzi angkya ta le Jisu wangshembu khama zangwün pu. Ikoxle Jisu-e chix ang münzi angkya le thüikya chichang. Ikoxle chixe thüikya a: Chix mahüi mahüile ija mixsün ang ozün ma wüi tanle ngo ang tom angkya Jisu mongtex namchang thünba Pitar to chem pox, le thüikya kax changkya.

²⁴Ijabu bama kaxkhi fa tamchu owae zale kop, ija füizuimix a chix changpu. Chix kaxkhi a otsingtsing changpu le kwome awanle.

²⁵Jisu-e mokkya mama mwotbuchu wüi tüihukya. Ibu pangnu zale koppuix thüikoxle, zangfang awang le lai sha koxle ngaxchu okho münnguise le kue thütle. Amen.