Read Wancho Naga Juhan 3 Bible Online

Juhan 3 - Wancho Naga bible

Juhan 3

¹Farisi othom khama Nikudema le amünkya mix Jehudi khünak tuita tüikya.

²Jata chix Jisu hato nguilaxle atüi: “Kwome nang a Nwotmix tuita ningle Zang tokhange hüipu le awanle; Zang womle chingo thüikoxle nange mokkya mwotlom owaechu münmok tho.”

³Jisu-e chix kax to lanle thüi: “Otsingtsingma kue nang ang thüipu, tamchatle chipux jangthüiba owaechu Zang Wangting ngün ang münkopüi.”

⁴Nikudema-e chix ang thüi: “Khünak tuita owüi ole tsong füima, chix tam chatle chemle puxüi? Chix anaole honu wokkha to donglaxle tam chatle pux ang tho angkya fang münchang.”

⁵Jisu-e lan: “Otsingtsingma kue nang ang thüipu, khünak tuita ti ma hia Otsao Chasa ma chipux jangthüiba chix zangkang ting to nop ang tsuak angkya fang münchang.

⁶Khünak tuita tsangtsa ma honu hopa makhange puxpaile; ikoxlechu chix chasa ma Chasa makhange puxpaile.

⁷Hünzom pangwüi anaole pux angkya changle lekya ku kax thoto nang taxabüt.

⁸Zangwine chix mongtex ma jeple; hünzome ija ozing ma atatle, ikoxlechu hünzome ija ojong tokya ngui ilaxle ojong chito pao angkya hex müntsing. Chasa ma puxkyabu pangwüi ija ningle changpu.”

⁹Nikudema-e lanle chix ang thüi: “Ija chemle chang ang thoüi?”

¹⁰Jisu-e chix ang thüi: “Nang Israel khama achongkya nwotmix tuita chang üntoxle ibu ngaxchu chitsing le hi?

¹¹Otsingtsingma kue nang ang thüipu, kwome chem awanpuix ija akaxpu, ilaxle kwome ngündaokya bama kaxkhi fapu; ikoxlechu hünzom opupue ngaxchu pongle kop ang chitsu.

¹²Kue hünzom hama chaxwannu mo wün pongma ngaxchu hünzome ku to chiong, kue zangkangting mo jangwün tomning ku to chemle ongüi?

¹³Khünak Hosa owa zangkangting tokya nguipuix, chix boma owaechu zangkangting mangün.

¹⁴“Mosa-e faokha to pu chemle nwonpuix, ija lailaile Khünak Hosa chuwüi ding to nwon angkya changle;

¹⁵Ikoxletix chix to ongkyabu ang khüzün atak angkya hanpakma,

¹⁶Zange chaxwannu to tüle mongkün laxle chix to ongkya mix chimax le oshuk chitüikya khüzün tsün atak angkya hanpakma chix ang Hosa tuita wüi tüikya chaxwannu ang kox;

¹⁷Chemthüikoxle Zange chix Hosa chaxwannu to, kaxfün fa ang chichangle, chix makhange chaxwannu khosün angkya hanpakmale ajo.

¹⁸“Hosa to ongkya mix ang kaxfün müntüi; ikoxle chix to chiongkya mix bama kaxfün fadaoa; chemthüikoxle chixe Zang Hosa tuita wüi tüikya to chiong.

¹⁹Ilaxle kaxfün a ija changle: Zangngai chaxwannu to hüidaoa, ikoxle khünake zangngai füi zangnak towüi sükün, chemthüikoxle hwom mwotbu a ochax chang.

²⁰Chemthüikoxle opange ochax mwot mokpuix hwome zangngai thua anule ilaxle chix mwotbu ngaiüi daile zangngai to münlai.

²¹Ikoxle owae otsingtsing mwot mokpuix, chix mwot Zang mün ma mokpu le ngai ang tom angkya hanpakma zangngai to laile.”

²²Ifüima Jisu hia chix wangshembu Jehudi chaxwan to pao; ikhato chix noxta nuilaxle bapti fa.

²³Juhan-echu Salim zui angkya Aenon ma bapti fale ngokya, chemthüikoxle ikhatochu ti okhongui le tüikoxle khünaknu chix hato nguile chixe hwom ang bapti fale ngo.

²⁴Chemthüikoxle iponge Juhan kun kha to masho changkya.

²⁵Juhan wangshem züizüi hia Jehudi khünakbu bama, sole atsaole khongaikya zom bama ala ang süt.

²⁶Hwom Juhan hato ngui ilaxle thüi: “Nang füi tomle Jordan shua tachi to owa ngokya hex, owa bama nange kaxkhi fale hüipuix; hulax, chixe bapti fale ngole, ilaxle pangnusa wüi chix hato nguile!”

²⁷Juhan-e lanle thüi: “Zange fakya chichang thüiningle khünake chemchu kop ang müntho.

²⁸Kue ku ‘Khrista münchang’ ibachu ku chix thoma achale hüikya mix changpu le thüikya bama kaxkhi hünzom changpu.

²⁹Tuinu zongto Tuipa tix hopupa changpu; ikoxlechu tuipa hozui owae ajong laxle chix kax apale ngopuix, tuipa kaxzing atatlaxle chix mong sisi huanuma müiüi; ku mongmüi okho anguikya a ija lailaile changpu.

³⁰Chix a chong angkya changle, ikoxle ku a hix angkya changle.

³¹“Owa thak tokya nguipuix chix a pangnu thakma achongkya changle. Owa chaxwannu angkya hex chix a chaxwannu kux changpu. Idaile chixe chaxwannu kux füikya sütmwot bama zangwünle. Owa zangkangting tokya nguipuix, chix a pangnu thak tokya changle.

³²Chixe chempang ngündao laxpuix ilaxle atat dao laxpuix, ibu bama chixe zangwünle; ikoxchu chix kaxkhi owaechu pongle chikop.

³³Ikoxle owae chix kaxkhi pongle kop, chixe Zang otsingtsing changkox a le chix mong ma shingmongle kopdaoa.

³⁴Owa Zange tsanle apaopuix, chixe Zang kaxbu akaxle, chemthüikoxle Zange chix ma ma Chasa okho anguile fale.

³⁵Hopae Hosa to mongkün ilaxle pangnu li wüi chix chak to dandaoa.

³⁶Hosa to mongongkya khünak ma oshuk chitüikya khüzün tüile; owae Hosa kax ma chilax puix, chix ma khüzün müntüi; ikoxle Zang mongtsik chix füi ngoüi.”