Read Wancho Naga Juhan 4 Bible Online

Juhan 4 - Wancho Naga bible

Juhan 4

¹Juhan füi süluile Jisu-e wüi khünaknu kop ang tho ilaxle bapti ang tomle le farisibue atat.

²(Jisu chix tomtatae baptikya chichang; chix wangshembue bapti ang tom).

³Otue Jisu-e ija zangwün atat puix, chixe Jehudi haxtok danle toxlaxle Galili to chat.

⁴Ija ma chix Samaria akaile le angkya lai.

⁵Samaria ma chix Saikar tingnu to ngui. Ija tingnu a, Jakop-e sasün Jusep ang fakya haxtok füi aluile chiatsai le tüikya. Jakop tiküi ikhama tüikya.

⁶Jisu hame nalaxle, ija tiküi kax ma thung. Ija a tungto shene changkya.

⁷Ikhato Samaria mixcha tuita tikho ang za. Jisu-e she ang thüi: “Kue ling ang ti laxhüi.”

⁸(Iponge chix wangshembu a tingkhua to sütling shak ang paole asu).

⁹Samaria mixchae chix ang thüi: “Nang a Jehudi khünak changtüi, ikoxle ku Samaria mixcha tuita ma lingti büle jupu?” (Chemthüikoxle Samaria noke lingdaokya wansa hia pe ma Jehudi khünake ling angkya oli chichang).

¹⁰Jisu-e lanle she ang thüi: “Nange Zang hingho hia nang ma ‘Ku ang lingti laxhüi’, le jukya khünak jang awan laxba, nange chix ma mix ija ti juse ilaxle chixe nang ang khüzün ti fasedai.”

¹¹She-e chix ang thüi: “Nang ma tikho angkya oli chemchu chitüi üntoxle tiküi nang müima male zu; jangchangba nange ija khüzün ti nange ojong tokya kopüi?

¹²Kwom hopa Jakop, owae kwom ang ija tiküi koxle toxpuix, ilaxle oja angkya chixechu ling ilaxle chixsu chixsabu angchu tamchu chix müibu angchu wüi aling, chix füi nang wüi achongkya hia?”

¹³Jisu-e she ang thüi: “Ija ti lingkyabu pangnusa ang wüi tamchatle ti alan angkya changle;

¹⁴Ikoxle opange kue fakya ti linglaxüi hex, ibu ang ti tamchatle münlanüi; ikoxle kue chix ang fakya ti a, chix ma otuechu chizople fuakle lai ngokya timik ang achangüi.”

¹⁵Ija mixchae chix ang thüi: “Nwotmix! Ku ang ija ti laxhüi! Ile jangchangba ku ang tamchatle ti münalanüi ilaxle ikhato ti kho ang ku chatle chihüi ngoüi.”

¹⁶Chixe she ang thüi: “Paolax, nang kakopa nyakle kop laxle ikhato nguihüi.”

¹⁷Ija mixchae lanle thüi: “Ku ang kakopa müntüi.” Jisu-e she ang thüi: “Nange kakopa müntüile otsingtsing akaxdaoa.

¹⁸Chemthüikoxle nang a mixsün aga füi kako ang ngodaokya changle; ilaxle athax owa füi ngopuix, chixchu wüi nang kakopa münchang; ija nange changle wüi akaxdaoa.”

¹⁹Ija mixchae chix ang thüi: “Nwotmix, kue nang a ajepa changa le ngünle;

²⁰Kwom pupa hwome ija haxhua ma shwompu, ikoxle hünzom Jehudi khünak pangnusae shwom angkya nui a Jerusalem changpu.”

²¹Jisu-e she ang thüi: “Mixcha, ku to onglax! Ija haxhua ma tamchu Jerusalem machu wüi khünaknue Zang chishwom angkya tunu nguile hüile.

²²Hünzom Samariabue mae ngaxchu chitsingkya to shwompu; ikoxle kwom Jehudi khünakbue, kwome oja awanpuix chix to shwompu; chemthüikoxle khosün a Jehudi nok makhange tix hüipu.

²³Ikoxle shwom mixbue Hopa Chasa hia otsingtsing ma shwom angkya tunu nguile hüiüna, ija athax changle; chemthüikoxle Hopae chix shwom ang ija ningkya khünakbu lomle;

²⁴Zang a Chasa changpu, Idaile khünaknue chix Chasa zong makhange tix, Chasa hia otsingtsing ma shwom ang thoüi.”

²⁵Ija mixchae chix ang thüi: “Kue Messaiah (Khrista) ngui angkya le awanle; Chix nguikya zuma chixe kwom hama pangwüi apuale faüi.”

²⁶Jisu-e chix ang thüi: “Nang füi akaxle ngokya ija ku a Chix changpu.”

²⁷Ija pongkhae wangshembu nguile hüi; ilaxle sheko tuita füi chixe zangwünle ngokya ngünlaxle hwom abüt; ikoxlechu owaechu “Nange chem lompu?” chichangba “Nange she füi chem zang wünle ngopu?”, le chiatüi.

²⁸Ifüima ija mixcha titik danle toxlaxle tingkhua to chat. She-e khünaknu ang thüi:

²⁹“Oman, ku hama kue mokkyabu pangnu apuale fakya mix to hulax; chix Khrista changcha hex?”

³⁰Hwom tingkhua angkya laile Jisu hato hüi.

³¹Ija pongkhae wangshembue chix ang thüi: “Rabai, hidaole süt saxle koplax.”

³²Jisu-e hwom ang thüi: “Ku ang süt hünzome chiawankya tüile.”

³³Ikoxle wangshembu tata füi ahuxle akax: “Owawae chix hato süt apüile fadao koxpia?”

³⁴Jisu-e lanle hwom ang thüi: “Owae ku tsanle apaopuix, chix mongtex mwot mok angkya tamchu chix mwot ashuk angkya a ku süt changpu.

³⁵Hünzome münthüidai hia ‘Athax tsax züt ang lyet ali wüi’; hulax, kue hünzom ang thüipu, hünzome ngom nwonle hulax, zim angkya tsax a zütkoxle asule münle tüile;

³⁶Owae zütle ngopuix chixe omün kopdaoa, ilaxle oshuk chitüikya tsün hanpakma oli afoxle ngole; Idaile saikya mix hia zütkya mix tomle mongmüi angkya changle.

³⁷Ija bama wanwünkax a ija changle: ‘Tutae sai, ata mixe züt.’

³⁸Hünzome chimokya khato züt ang kue hünzom apaopu; mixe mokdaoa ikha angkya lap hünzome kopüi.”

³⁹“Kue chem mokpuix ibu pangnu ku hama apuadaoa”, le ija mixchae kaxkhi fale akaxkya khoma ija tingsho angkya khünakbue ija kax to ong.

⁴⁰Ija khoma Samaria khünakbu chix hato ngui ilaxle chix ang hwom füito ngohax le atwon; ilaxle chix ikhato hanpak nyi anyi nuile tox.

⁴¹Üntoxle chix kax khoma hexle khünaknue tamtaile ong.

⁴²Ilaxle hwome ija mixcha ang thüi: “Athax kwomechu ongpu, nang kax khomale chichangle kwom tomtatae chix zangwün atat ang kopkya khoma, athaxpi chix a otsingtsing chaxwannu khosünpa changpu le kwome awan ang kople.”

⁴³Hanpak nyix anyi azom füima chix ikha angkya Galili to pao.

⁴⁴Chemthüikoxle Jisu-e chix jaoe akax: “Ma chaxwan to ajepa achuak achenle münchang.”

⁴⁵Chixe Jerusalem ma mokkya ohünotünbu ngünlaxle Galili to chix nguikya ma hwome chix ponglekop; chemthüikoxle hwomchu wüi Jerusalem to ija pangpwon ma hak ang kadaokyabu chang.

⁴⁶Ifüima Jisu Galili angkya Kana ting, ojongkha to chixe ti ju ang achang, ija khato tam chatle ngui. Ija ponge alixachong sasün tuita kakle ngo.

⁴⁷Otue chixe Jisu Jehudi tokya Galili to nguile tüile le atat; chixe chix hato ngui, ilaxle chix kaparnaum to nguilaxle ziüi khakha le kakle ngokya sasün kak amüi toxfa le shwom.

⁴⁸Ikoxle Jisu-e chix ang thüi: “Hünzome münwan hia ohünotün mwot chingün thüiningle otuechu ong angkya fang münchang.”

⁴⁹Alixachonge chix ang thüi: “Nwotmix, kwom naosa mazizie nguihüi.”

⁵⁰Jisu-e chix ang thüi: “Paolax, nang naosa ozün ma wüi tüile.” Ija mixsüne Jisu kax to ong ilaxle chix pao.

⁵¹Chix hom to chatkya lomba to tüipongma chix da apong laxle naosa ozün ma wüi tüikya kax apua.

⁵²Idaile chixe, ija nao otu makhange müi ang sütpuix le atüi. Ikoxle hwome chix ang thüi: “Münyix anüt baji bato khange chix müikya changle.”

⁵³Idaile “Hünsa ozün ma wüi tüile”, le Jisu-e chix füi itu khae akaxkya changpu le hopae texle atak; ilaxle hwom kako pangnue wüi ong.

⁵⁴Ija a Jisu Jehudi tokya Galili to nguilaxle mokkya ohünotün mwot anyi lekya changpu.