Read Wancho Naga Juhan 5 Bible Online

Juhan 5 - Wancho Naga bible

Juhan 5

¹Ija füima zanglom pangpwon to hak ang Jisu Jerusalem to ngui.

²Jerusalem ma chun zünkai hama Ibri kax ma Bethesda le nyakkya, pomsa aga füikya tiküi tuita tüikya. Pomsa aga füi; Ibri ma ija ang Bethzatha le nyakle.

³Ija pompsabu ma kakmixbu tüle tüikya; mikduak, chafai tamchu faishokle kakkya, ibue ti aloxkya tanle ngo.

⁴Chemthüikoxle onoxnox ma Jowanpa kaxtaimix tiküi khato julaxle ti to lüixle tox; ilaxle tüta mix wüi changlax, ija ti aloxkya füi tomle pongwang ma ti to ting ang kopkya mix, chix ma tüta ningkya kak tüikoxchu müi.

⁵Ikhama zanglao tsübün achyet kakle ngokya mix tuita tüikya.

⁶Otue Jisu-e chix ngün, tamchu chix ile ozulole kakle ngokya mix changle le awanlaxle, Jisu-e chix ang kak müise tsucha le atüi.

⁷Kakmixe chix kax to lan: “Nwotmix, tiküi ti lüixle alox füima ku ikhato somkox angkya mix owawachu müntüi; ilaxle ku ikhato thai ang azong pongma ku thoma mix wüi sütle bangle.”

⁸Jisu-e chix füi akax: “Zolax, nang lya koplaxle ahamlax.”

⁹Ija ma wüi thuile chix kak müi; chix lya kop ilaxle aham ang süt. Athax ija nyix a nazak nyix kha changkya.

¹⁰Ija khoma Jehudi nok pünpa-chongwangbue kak müikya mixsün ang thüi: “Anyix a nazak nyix changle, Idaile nange nang lya pai angkya kem wanlom füi apüikya mwot changpu.”

¹¹Ikoxle chixe hwom kax to lan: “Nang lya koplax ilaxle ahamlax le ku kak amüikya khünak akaxkya changpu.”

¹²Hwome chix ang thüi: “Nang ang nang lya koplax ilaxle ahamlax le thüikya mix a owa?”

¹³IKoxle kak müikya mixsüne ija opupu changkya hex chitik. Chemthüikoxle ikhama khünaknu asox pongma Jisu a dangjale laile pao bang.

¹⁴Ofüima chix Jisu thoma Zangshwom hom ma bangle, Jisu-e chix ang thüi: “Hulax, nang kak müidaoa, chatle fünma chiatak angkya hanpakma ochax taxlyen.”

¹⁵Ija mixsün pao ilaxle Jehudi nok pünpa-chongwangbu hato, chix kak amüikya mix a Jisu changpu le awan ang tom.

¹⁶Ija khoma Jehudi khünakbue Jisu to zothup ang süt, chemthüikoxle chixe ija mwot a nazak nyix mok.

¹⁷Ikoxchu chixe hwom ang hüi: “Apaechu athax kople mokle ngopu, ilaxle kuechu mok angkya changpu.”

¹⁸Ija khoma Jehudi nok pünpa-chongwangbue chix lang ang onüi tung. Chemthüikoxle chixe nazak nyix tata amakya chichangle, Zang ang chixe Hopa changpu le akax; ile chix Zang füi tuita ang achang.

¹⁹Ija khoma Jisu-e hwom kax to lan: “Otsingtsingma kue hünzom ang thüipu, Hosae lita olom ma Hopa mwot ngünle laxkya chichang thüikoxle chix lualua to chemchu mok ang müntho; chemthüikoxle Hopae chemle mokpuix, Hosaechu ija ningle mokpu.

²⁰Chemthüikoxle Hopae Hosa to mongkün ikhoma chixe mokkyabu pangnusa ahole kox; ilaxle hünzom abütkya lima chixe ijabu füi süchongkya chix hama aho angkya changle.

²¹Chemthüikoxle chemle Hopae zidaokyabu chatle zo ang tom le hwom ang khüzün hoxpuix, ija ningle chix mongtsukyabu ang Hosaechu khüzün koxtsuak angkya changle.

²²Hopa chix tatae owa kaxchu mafün, ikoxle kaxfün angkya pangwüi Hosa ang koxle thomle; ikhoma hwome Hopa achuakkya ningle Hosachu wüi achuak angkya changle.

²³Owae Hosa chathua chizaüi hex, chix tomle ajokya Hopa chathua chuwüi münza.

²⁴“Otsingtsingma kue hünzom ang thüipu, Owae ku kax atat laxpuix, ilaxle ku tomle ajokya mix to onglaxpuix, chix ma oshuk chitüikya khüzün tüile. Chix bama kaxfün angkya müntüi, zik kaile toxlaxle azang angkya ha alopüna.

²⁵“Otsingtsingma kue hünzom ang thüipu, ziünkyabue Zang Hosa zing atat angkya tunu nguile hüidao, tamchu ija athax changle; ilaxle atatkyabu pangnu wüi ozün ang achangle chatüi.

²⁶Hopa chemle khüzün otong hex ija lailaile Hosachu wüi khüzün otong ang achangdaoa.

²⁷Chixe Hosa ang kaxfün angkya zong fadaoa, chemthüikoxle chix a Khünak Hosa changle.

²⁸Ija atatlaxle taxabüt; chemthüikoxle zidaokyabu pangnusae chix kax atat angkya tamchu zuk-kha tokya lai angkya tu nguile hüi ngole.

²⁹Ilaxle opange müikya mwot mokdao laxpuix, ibu ozün ma tamchatle zoüi; ilaxle opange oma mwot mokdao laxpuix, hwom omang kaxfün ma anaole zoüi.

³⁰“Ku mongtex ma kue chemchu mok ang müntho, kue chemle Zange ku füi akax puix, ija ningle kaxfün fapu; ikhoma ku kaxfün a sukya changpu; chemthüikoxle kue ku mongtex münlom. Kue ku tsanle ajokya mix mongtex lompu.

³¹“Kue alüile ku kaxkhi jangkox thüiningle ija ku kaxkhi a otsingtsing münchang. Ijae ku kax changpu le aho ang müntho.

³²Ku hanpakma kaxkhi fa angkya mix chatle mama tüile; ilaxle chix hanpakma fakya kaxkhi a otsingtsing changpu le kue awanle.

³³“Hünzome ma mwottsan mix owa hato apao ilaxle owae otsingtsing bama akax, chix a Juhan changpu.

³⁴Ikoxlechu kue khünak kaxkhi lax angkya wüile münchang; ikoxlechu kue ijabu hünzom khosün hanpakmale akaxpu.

³⁵Juhan a chuale tamchu nyanle ngokya wüntik ningle changkya ilaxle onox ma hünzomechu chix zangngai to mongmüise le tsuakya.

³⁶“Ikoxle ku ma tüikya kaxkhi a Juhan-e fakya kaxkhi füi ngaxchu süchongkya changle, chemthüikoxle oja mwot moktsuak angkya zong Apae ku ang koxpuix, ija a, kua a Apae tsanle ajokya changpu lekya kaxkhi changpu.

³⁷“Ilaxle Apa owae ku tsanle ajopuix, chixe ku bama kaxkhi fale. Hünzome tütatuechu chix kaxzing maatat, chichangba chix sün mangün;

³⁸ilaxle chix kax hünzome mong ma chithom, chemthüikoxle hünzome ku tsanle ajokya mix to chiong.

³⁹“Hünzome Lai Kaxbu lomle; chemthüikoxle ijabu ma oshuk chitüikya tsün khüzün ataküile hünzome ongle; ikoxle ija Lai Kax a ku hanpakma kaxkhi fakyabu Lai Kax changle.

⁴⁰Ikoxlechu hünzom a khüzün kop ang ku hato hüise le chitsu.

⁴¹“Kue khünak angkya münchong lomkya chichang,

⁴²Ikoxle hünzom chem ningkya hex kue awan ngopu; ilaxle tsingle ngopu.

⁴³Ku a Apa mün ma hüipu, ikoxle hünzome ku a pongle chikop; ikoxle mama mix owawa ma mün ma janghüiba hünzome chix pongle kopüi.

⁴⁴Hünzome tata angkya münchong kopse tsu ikoxlechu tuita wüi tüikya Zang tokhange münchong kop ang hünzom chiazong. Ile jangchangba hünzome ku to cheme ong manüi?

⁴⁵Ibachu Apa pomtho ma hünzom ang thaile le thüi angkya mix Ku changpu le hünzome taxthüt; hünzom ang thaile le thüi angkya a hünzome mongongle ngokya Mosa tix changpu.

⁴⁶Hünzome Mosa to jangong thüiningle ku tochu ongse, chemthüikoxle chixe zakya a ku bama zakya changpu.

⁴⁷Ikoxlechu hünzome chix chakza to chiongba, hünzome ku kax to chemle ong haxkux?”