Read Wancho Naga Juhan 6 Bible Online

Juhan 6 - Wancho Naga bible

Juhan 6

¹Ijabu füima Jisu Galili Shinthuk-titung tachi to pao (chichangba ija ang Tiberia Shinthuk-titung lechu wüi nyakle).

²Khünaknu othome chix man tole tüikya; chemthüikoxle chixe kakmixbu amüikya hia ohünotün mwotbu mokkya hwome ngünle ngo.

³Jisu haxkho to donglaxle chix wangshembu füi thung;

⁴Ipongma Jehudi khünakbu Kaitox Pangpwon ngangle tüikya.

⁵Jisu-e ngom nwonle hu koxle khünaknu othom chix hato hüile ngokya ngünlaxle Filip ang thüi: “Khünak ibu ang kox ang keme süt ojong to shaküi?”

⁶(Ija a chixe Filip to wanle atwon wüi, chemthüikoxle chixe chem mok angkya hex ija mwot chixe alüile awan ngopu).

⁷Filip-e chix kax to lan: “Mixhuak noke muapong-muapong wüi saxkox lechu, anguile an shak ang, ngun huak khix ho-anyi onüi jao lax angkya changle.”

⁸Chix wangshembu kha angkya Simon Pitar honao Andriw-e chix füi akax,

⁹“Ikhama naosa tuita tüile, chix chak ma an khao aga tamchu nyax jang anyi le tüile, ikoxlechu isasae ibibi mix ang chempothaüi.”

¹⁰Jisu-e thüi: “Khünaknu thung ang laxkox.” (Ikhama hingzang tüihukya). Ile khünaknu akiak koxle hajat aga ikhama thung.

¹¹Jisu-e an lax, münchong fa laxle chixe idu thungle ngokyabu ang ahanle fa. Ija ningle nyaxchu wüi ahanle kox. Ile hwom pangnue wüi wokfwot müile sax.

¹²Hwom ang wok afwot füima, chixe wangshembu füi akaxle thüi: “ota-otua pangwüi chiawüt le tswonle afoxkox.”

¹³Ijadaile hwome tswonle afox; ile ankhao aga hia nyax jang anyi makhange khünaknu tuxkya füima ata-atuale toxkya sang bün anyi amünle bang.

¹⁴Ija chixe mokkya ohünotün mwot ngünlaxle khünaknue thüi: “Chix a chaxwannu hato hüiüi tüikya otsingtsing ajepa changpu.”

¹⁵Hwom hüilaxle chix a wanghom ang achang ang atsang ang thütle ngokya hwom mong thwon loplaxle; Jisu anaolechu chix tata haxhua to pao.

¹⁶Athax han asongkya ma, chix wangshembu tinu khato thai,

¹⁷Üntoxle khua ma nga füima, tinu tale Kaparnaum chito chat ang achex. Zangnak müi koxle ngaxchu athax kople Jisu hwom hato chichat.

¹⁸Ipongma zangcheie huanuma zongle thukya tokhange tinu tüle-tüle achap ang süt.

¹⁹Wangshembue mai anyi azom tukux cheile lekya füima, hwome Jisu titok ding to ahamle khua hato namle hüikya ngün ilaxle hwom tüle abüt.

²⁰Ikoxle Jisu-e thüi: “Ija ku changpu, taxza!”

²¹Ifüima mongtsutsu le hwome chix khua ma angat; ilaxle lebama wüi khuae hwom pao angkya chaxwan alople bang.

²²Ofüi nyix tinu tachi to ajongle ngokya khünaknu ang ikhama khua tuita wüi changkya ilaxle Jisu a wangshembu füi tomle khua ma chinga. Ilaxle hwome wangshembu a hwom tata paole ngünkya dai angle texle atak.

²³Jowanpa-e münchong koxkya füima khünaknue an saxkya tinu kax ma, ofüi nyix Tiberia chitokya mama khuabu hüi.

²⁴Otue hwome Jisu ikhama chitüikya awanle lax, ilaxle wangshembuchu wüi chitüi; hwomchu wüi khua ibu ma ngalaxle Jisu lomle Kaparnaum to ngui.

²⁵Ilaxle tinu tachi to Jisu nuikya ma hwome thüi: “Rabai, nang ikhato otue nguipu?”

²⁶Jisu-e hwom kax to lanle thüi: “Otsingtsingma kue hünzom ang thüipu, hünzome kue mokkya ohünotün mwotbu tsingle laxkya tokhange chichangle an füi wok afwotle sax ang atakkya khoma ku lomle ngo wüi.

²⁷Male paoün angkya süt hanpakma mwot taxmok, ikoxle oshuk chitüikya tsün füi tomwüi ngo angkya süt hanpakma moklax. Ija süt a Khünak Hosae tix hünzom ang koxüi; chemthüikoxle Hopa Zange chix ma münwan shin tople fadaoa.”

²⁸Idaile hwome chix ma atüi: “Zang mongtex mwot mok ang kwome moktsuak angkya chem tüi?”

²⁹Jisu-e hwom kax to lanle thüi: “Zange tsanle ahüikya mix to ong angkya a hünzom hanpakma Zang mongtex mwot changpu.”

³⁰Hwome chix ang thüi: “Kwome ngünlaxle ongkya lima nange münwan ang chem mokle ahoüi?

³¹Otsao Lai kax ma ‘Chixe süt hwom ang zangkangting tokya fa’ le zale thomkya ningle, kwom pupa hwome faokha to manna saxpu.”

³²Jisu-e hwom ang thüi: “Otsingtsingma kue hünzom ang thüipu, hünzom ang zangkangting tokya manna fakya mix a Mosa chichang; zangkangting tokya otsingtsing süt fakya mix a ku Apa changpu.

³³Chemthüikoxle Zange fakya süt a zangkangting tokhange hüi ilaxle chaxwannu ang tsün fakya mix a chix changpu.”

³⁴Ikoxle hwome chix ang thüi: “Nwotmix, ija süt othuithuima kwom ang koxle ngohüi.”

³⁵Jisu-e hwom ang thüi: “Khüzün süt a ku changpu; Owa ku hato hüiüihex chix ang wok münano ilaxle ku to ongkya mix ang otuechu ti münalan;

³⁶Ikoxlechu kue hünzom ang thüipu, hünzome ku ngünpu ikoxlechu chiongüi.

³⁷Apae ku ang koxkyabu pangwüi ku hato hüiüi ilaxle kue hwom otuechu münachatüi;

³⁸chemthüikoxle ku a zangkangting tokya, ku mongtex ma mok ang chichangle, ku tsanle ajokya mix mongtex ma mok ang nguipu.

³⁹Chixe ku ang fadaokya tuitachu chiamütüi, ikoxle oshuk ma ibu pangwüi ozün ma zo ang tom angkya ku tsanle ajokya mix mongtex changpu.

⁴⁰Chemthüikoxle Hopa mongtex a ija changle: Opange Hosa ngünpuix tamchu chix to ongpuix, hwom ma oshuk chitüikya khüzün tüiüi; Ilaxle oshuk nyix kue hwom ozün ma ngo ang tomüi.”

⁴¹Chixe “zangkangting tokhange ajokya süt a ku changpu”, le akaxkya khoma Jehudi khünakbue kax atsat.

⁴²Idaile hwome thüi: “Ija Jisu a Jusep sasün münchangkox hia? Chix honu hia hopa nyi keme awan ngopu. Jangchangba chix zangkangting tokya jukya changpu le chixe chemle akax ang thopu?”

⁴³Jisu-e lanle hwom ang thüi: “Hünzome tata bama zangwün atsat le taxngo.

⁴⁴Apa owae ku tsanle ajopuix, chixe chiahüi thüikoxle owaechu ku hato hüi ang müntho; ilaxle kue oshuk nyix chix ozün ma zo ang tomüi.

⁴⁵Ajepae ile zakya tüile: ‘Pangnusa hama Zange apuaüi.’ Owae Apa kax atatüi hex tamchu chix makhange awanle laxüi hex, chix tix ku hato nguile.

⁴⁶Zang tokhange hüikya mix boma mama owaechu Zang ngündaoa le münchang; Hopa a chixe tix ngüntan;

⁴⁷Otsingtsingma kue thüipu, mongongkya khünak ang oshuk chitüikya tsün khüzün tüile.

⁴⁸Ku a khüzün süt changpu.

⁴⁹Hünpu hünpa hwome faokha to manna saxpu, ikoxchu hwom zipu.

⁵⁰Ikoxle zangkangting tokhange jukya süt a, ija saxkya mix chizi angkya hanpakma changpu.

⁵¹Ku a zangkangting tokya jukya süt changpu; owae ija süt kha angkya saüihex, chix a oshuk chitüile ozün ma ngoüi; ilaxle süt oja kue chaxwan azün ang koxüihex, ija a ku müi changle.”

⁵²Ija khoma Jehudi khünakbue ija bama tata füi zangwünle thüi: “Ija khünake kem ang chix müi sax ang chemle kox angkya changkoxpuix?”

⁵³Jisu-e hwom ang thüi: “Otsingtsingma kue hünzom ang thüipu, hünzome Khünak Hosa müi sax tamchu chix aji chiling jangthüiba, malualua to ozün ma ngo ang münthoüi.

⁵⁴Owae ku müi sax tamchu ku aji linglaxüi hex, chix oshuk chitüi le ozün ma ngo angkya changle, ilaxle oshuk nyix kue chix ozün ma zo ang tomüi.

⁵⁵Chemthüikoxle ku müi a süt tsingtsing ku aji a ju tsingtsing changle.

⁵⁶Owae ku müi sax tamchu ku aji lingüi hex, chix ku ma ngoüi ilaxle ku chix ma ngoüi.

⁵⁷Chemle ozün ma tüikya Apae ku tsanle ajo puix, ija lailaile chix kuxma tix ku ozün ma ngopu. Ija ningle owae ku müi saxlaxpuix, chixchu ku khoma tix ozün ma ngo angkya changle.

⁵⁸Ija tix zangkangting tokya jukya süt changpu. Ija a hünpu hünpa hwome saxlaxle zikya manna ningle chichang, ikoxle owae ija süt saxlaxüi hex, oshuk chitüi le ozün ma ngo ang ataküi.”

⁵⁹Chixe ija kaparnaum ma hwon-anole ngopong ma sinagok ma akax.

⁶⁰Ija atatkya ma wangshembue thüi: “Ija hwon-nwot a tüle tsakle. Ija owae tsingle thoüi?”

⁶¹Ikoxle chix wangshembue ija khoma zangwün atsat ngole le awanlaxle Jisu-e hwom ang thüi: “Ija kaxe hünzom ang chikho asua ang tompia?

⁶²Jangchangba Khünak Hosa amipongkya chix ngwotnui to chatkya ngünkoxle hünzome chemle thüiüi?

⁶³Khüzün koxkya a Zang Chasa changpu, khünak tsakzong a chem angchu münchang ikoxle kax oja kue hünzom füi akaxpuix, ijabue hünzom hato ozün ma tüikya Zang Chasa apüile fapu.

⁶⁴Ikoxlechu hünzom züizüie ija to chiong.” (Opange chix to chiong puix, ilaxle owae chix dyenüi hex, pongwang tokhange wüi Jisu-e awanle ngo).

⁶⁵Ilaxle Jisu-e thüi: “Ija khoma kue hünzom ang thüipu, Apae koxkya wüi chichang thüiningle hünzom ku hato owachu hüi ang müntho.”

⁶⁶Ija khoma züizüi chix man tole ngokyabu chix füito chiahamle chat.

⁶⁷Ija khoma Jisu-e bün anyi ma atüi: “Hünzome chuwüi dantoxse texpuix nyi?”

⁶⁸Simon Pitar-e lan: “Jowanpa, kwom owa hato paoüi? Tsün khüzün koxkya kax nang ma tüipu;

⁶⁹Ija to kwome ongpu tamchu nang a Zang tokhange nguikya Otsao changpu le kwome awanle.”

⁷⁰Jisu-e hwom kax to lan: “Hünzom bün anyi kue kamle kopkya münchang dai hia? Ikoxlechu hünzom khama tuita a haxshix changle.”

⁷¹Chixe ija a Juda, Simon Iskariot sasün mo wünkya changpu. Chemthüikoxle chixchu wüi wangshem tuita changkoxchu, chixe Jisu khohang angkya changle.