Read Wancho Naga Juhan 8 Bible Online

Juhan 8 - Wancho Naga bible

Juhan 8

¹Pangnu wüi mahomhom to fan, ikoxle Jisu a Olip haxhua to pao.

²Ofüinop chix anaole Zangshwom-Hom to chat. Khünaknu pangnu wüi chix hato ngui; ilaxle chix thung üntoxle hwom hama hwon-ano ang süt.

³Wanlom nwotmixbu hia farisibue, chinunchakkai ma kopkya mixcha tuita laxlaxle nguile hwom osung wama dan.

⁴Hwome chix ang thüi: “Nwotmix, ija mixcha a chinunchakkaile ngopong khae kopkya changpu.

⁵Wanlom ma kwom ang Mosa-e, ija ningkya sheko to long füi thuple lang angkya akaxle; ikoxle nange chemle thüiüi?”

⁶Hwome ija kax, chix tsünle, chix lang angkya chifün lomle akaxkya changkya. Ikoxle thung laxle Jisu-e chak-khi füi hax to za.

⁷Ikoxle hwome chix ma, kaxtik ang sütle ngopong ma, chix ajong laxle hwom ang thüi: “Hünzom khama ochax chitüi le ngokya mixe she to long füi thoma shongthup kox.”

⁸Anaolechu chix thung ilaxle hax towüi za.

⁹Ija kax atatlaxle, hwom tuita füima tuita le, tüichongbu ma atho laxle laile pao. Ikhama Jisu hia kople apüikya mixcha nyi tata danle tox.

¹⁰Chix ajong laxle ija mixcha füi akax: “Mixcha, hwom omaün? Tutae ngaxchu nang to long füi münthup hia?”

¹¹She-e lan: “Changle, Jowanpa, ku tha owaechu münajao.” Jisu-e thüi: “Kuechu wüi münajao; paolax, athax makhange ochax tam taxlyen.”

¹²Anaolechu Jisu-e farisibu ang thüi: “Ku a chaxwannu zangngai; ku füito azuikya khünakbu zangnak ma münaham, ikoxle hwom ma khüzün zangngai tüiüi.”

¹³Farisibue chix ang thüi: “Nang kaxkhi nange alüile fale hia? Ija nang kaxkhi otsingtsing münchang.”

¹⁴Jisu-e lanle hwom ang thüi: “Ku hanpakma kaxkhi kue alüile fakya changkoxchu ku kaxkhi otsingtsing changpu; chemthüikoxle ku ojong khatokya nguipuix chichangba ku ojong khato pao angkya hex ija kue awanpu; ikoxle hünzome, ku ojong khatokya nguipuix tamchu ojong khato pao angkya hex ija chiawan,

¹⁵Hünzome müi-hi-aji mongtex ma kaxfün fale; ikoxle kue owa angchu kaxfün münfa.

¹⁶Ilaxle kue kaxfün fale jangchang thüikoxchu; ija ku kaxfün a otsingtsing changüi; chemthüikoxle ikhama ku tata chichangle ku tsanle ajokya Apa chuwüi womle tüile.

¹⁷Hünzom wanlom machu mixhuak anyi notom kaxkhi a otsingtsing changüi le zakya tüile.

¹⁸Ku hanpakma kaxkhi fakya mix a ku changle tamchu ku tsanle ajokya Apaechu wüi ku hanpakma kaxkhi fale.”

¹⁹Hwome chix ma atüi: “Hünpa ojong khato tüipu?” Jisu-e lan: “Hünzome kuchi münawan, Apa chuwüi münawan; hünzome ku awan koxle Apa chuwüi awan ang kopse.”

²⁰Jisu-e ibu zangwün Zangshwom-Hom ma hwon-ano pongma, ngun athünkya nui to akax; ikoxle khünak owaechu chix chikop; chemthüikoxle chix ang tiale toxkya chix hanpak mahüi.

²¹Anaolechu Jisu-e hwom ang thüi: “Ku a pao angkya changle; hünzome ku lomüi, ikoxlechu hünzom a ma ochax ma zile ngoüi; ku paokya khato hünzom ngui ang münthoüi.”

²²Ikhoma Jehudi nok pünpa-chongwangbue thüi: “Chix paokya khato kem ngui ang münthoüile thüikya, chix alüile zi max angkya kax changdaisi?”

²³Jisu-e hwom ang thüi: “Hünzom a fang tokya, ikoxle ku a thak tokya changle; hünzom a ija chaxwannu angkya ikoxle ku a ija chaxwannu angkya chichang.

²⁴Ikhoma kue hünzom ang thüipu, hünzom a ma ochax ma ziüi; chemthüikoxle hünzome ku to ‘Ku a Ku changpu’ le ma-ong tanto hünzom a ma ochax ma zi angkya changle.”

²⁵Hwome chix ang thüi: “Nang a owa changkya?” Jisu-e hwom ang thüi: “Pongwang tokhange wüi kue hünzom füi chempang akax daopuix, ibu a ija changle.

²⁶Hünzom hanpakma akax angkya hia kaxfün fa angkya ku ma tüihu le. Ikoxlechu ku tsanle ajokya mix otsingtsing ilaxle kue chaxwannu füi chix makhange atatkyakya akaxpu.”

²⁷Hwome Jisu-e hwom füi Hopa bama akax ngokya changpu le texle chiatak.

²⁸Ija khoma Jisu-e thüi: “Otue hünzome Khünak Hosa nwonlaxüi hex, ija ma hünzome: Ku a Ku changpu ilaxle kue ku mongmong ma chemchu chimok ikoxle ijabu kue Apae adangle fakya ningle akaxpu;

²⁹Tamchu ku tsanle ajokya mix ku füi tüile; otuechu chixe ku kutata danle müntox, chemthüikoxle kue chix mong amüi angkyakya mokpu, le hünzome awan ang kopüi.”

³⁰Jisu-e akaxkya ibu kax atatlaxle chix to mongongkyabu chuwüi tüle lai.

³¹Ija khoma Jisu chix to ongkyabu füi akax: “Hünzome ku kax ma janglax, otsingtsingsa ma hünzom a ku wangshembu changpu;

³²hünzome otsingtsing awan ang kopüi, ilaxle ija otsingtsinge hünzom ang khangkho angai le faüi.”

³³Hwome chix kax to lan: “Kwom a Abraham susabu changle ilaxle kwom a owa da angchu achangle münngo. Jangchangba nange kwom khangkho angaile koxüile thüikya a chem hanpak?”

³⁴Jisu-e hwom kax to lan: “Otsingtsingma kue hünzom ang thüipu, ochax lyenle ngokya mix a ochax da changpu;

³⁵da tuita a hom ma othuithuima ngo angkya chichang; ikoxle Hosa a othuithuima ngo angkya changle.

³⁶Hosae hünzom ang khangkho angai le jangfa daoba ija khangkho zangngai a othuithui hanpak ang changüi.

³⁷Kue hünzom a Abraham susabu changpu le awanle; ibachu hünzome ku lang ang lompu; chemthüikoxle hünzom ma ku kax pongle kop angkya onui chitüi.

³⁸Kue a, Apae ku hama aho daokya kax akaxpu, ija ningle hünzomechu ma hopa hwom makhange atatle laxkyakya mokpu.”

³⁹Hwome chix kax to lanle thüi: “Abraham a kwom Hopa changpu.” Jisu-e hwom ang thüi: “Hünzom Abraham susabu hex thüikoxle Abrahame chem mokpuix ija mokse.

⁴⁰Kue amokmok pangnu wüi, kue Zang tokhange atatkya otsingtsing bama hünzom hama apua ang mokpu; ikoxlechu hünzome ku lang ang azongpu. Ikoxle Abrahame ile chimok!

⁴¹Hünzome hünzom hopa mwot mokpu.” Hwome chix ang thüi: “Kwom Hopa ang Zang tata wüi ilaxle kwom a chixsu chixsabu changpu.”

⁴²Jisu-e hwom ang thüi: “Zang hünzom Hopa tsingtsing changkoxle, hünzome ku to mongkünse; chemthüikoxle ku a Zang tokhange nguikya mix tamchu athax ku ikhama ngopu, ija a ku küntsu monglua ma chichang.

⁴³Hünzome ku kax büthüikoxle chitsing? Ija a hünzome ku kax apa ang mong chiadu thokya khoma changle.

⁴⁴Hünzom a, hünzom hopa Bao (haxshix) makhange hüikya changpu. Hünzome hünzom hopa haxshix mongtex ma mokse tsule. Ami pongwang tokhange wüi chix a mix mik amütkya mix, ilaxle chix ma sukya chitüi koxle otuechu chixe otsingtsing chima chise. Chixe kaxthai akaxkya zuma, chixe chix jaopo ma chem tüipuix, ija mokpu; chemthüikoxle chix a thaikya mix tamchu thaikya hopa.

⁴⁵Ikoxle kue otsingtsing akaxkya khoma hünzome ku to mong chiongpu.

⁴⁶Hünzom kha angkya opupue ku a ochax mix tuita changpu le kaxkhi fa ang thoüi? Ile kue ostingtsing akax koxle, büthüikoxle hünzome ku to mong chiong?

⁴⁷Zang tokhange hüikya mixe Zang Kax apaüi; bachutix hünzom a Zang tokhange hüikya chichangkya daile hünzome chiapa angkya jao.”

⁴⁸Chix kax to lanle Jehudi khünakbue thüi: “Nang a Samaria khünak, nang ma bao tüile le kwome ami wüi mathüi dai hia?”

⁴⁹Jisu-e hwom kax to lan: “Ku ma bao müntüi; Ku a Apa thua zapu; ikoxle hünzome ku adapu.

⁵⁰Kue ku chathua zakya münlom; ija lomkya tamchu kuchima sele kaxfün fakya mix tuita tüile.

⁵¹Otsingtsingma kue hünzom ang thüipu, ku kax ma laxle tüikya mix otuechu münzi toxüi.”

⁵²Hwome chix ang thüi: “Athax kwome nang ma bao tüile le awanle laxdaoa! Abraham zipu ilaxle ajebuchu wüi zipu; ikoxle nange thüt tüi, nang hwon nwot kax ma laxkya mix a otuechu münzi.

⁵³Kwom apa Abraham a zidaoa; chix füi nang wüi achongkya le texpia? Ajebuchu wüi zibakdaoa, ikoxle nang a nange owa le texpu?”

⁵⁴Jisu-e hwom kax to lan: “Kue alüile ku achuakle jangchang, ija ku achuakkya chemchu münchang; ikoxle hünzome hünzom Zang changpu le thüikya Ku Apae ku fuazang ang tompu.

⁵⁵Ikoxle hünzome chix otuechu chiawan, kue a chix awan ngopu; kue chix münawan le jangthüi: ku chuwüi hünzom ningle thaikya ang achangpu; ikoxlechu kue chix awanpu ilaxle chix kax ma laxle tüipu.

⁵⁶Hünzom hopa Abrahame ku nguikya din ngünse le tüle thütkya; tamchu chixe ija ngünlaxle chix ang tüle mongmüi.”

⁵⁷Hwome chix ang thüi: “Nang zanglao punyi bün ngaxchu mangui ikoxle nange Abraham ngündaoa leo?”

⁵⁸Jisu-e hwom ang thüi: “Otsingtsingma kue hünzom ang thüipu, Abraham mapuxba wüi ku tüikya.”

⁵⁹Ikhoma hwome long tswonlaxle chix to thup ang tung; ikoxle Jisu azwon ilaxle Zangshwom-Hom angkya laile pao.