Read Wancho Naga Juhan 9 Bible Online

Juhan 9 - Wancho Naga bible

Juhan 9

¹Chix le le ngopongma, pux pong tokhange wüi mik male puxkya mikduak sün tuita chixe ngün.

²Chix wangshembue chix ang thüi: “Ija mixsün mik chimüile pux angkya chixe achax pia hia honu hopa nyi ochax khoma changpuix?”

³Jisu-e lan: “Ija a ochax khomale münchang; tamchu honu hia hopa nyi ochaxchu münchang; ikoxle chix makhange Jowanpa mwottho kotok to ngaile aho angkya kuxmale changpu.

⁴Zangngai mik ma keme ku tsanle ajokya mix mwot mok angkya changpu; owaechu mok ang chithokya lima zangnaknu nguile ngole.

⁵Ku chaxwannu ma ngo tanto, ku a chaxwannu zangngai changle.”

⁶Chixe ija akax füima haxkha to thuak füi thuak; ilaxle ija thuak füi haxthom zing ilaxle ija füi ija mixsün mik to pale kox.

⁷Ilaxle chix ang thüi: “Paolax, ilaxle Silom tiküi ma thün tsuxlax.” (Ija mün a paolax le tsankya tha). Ifüima chixe pao üntoxle so, ifüima chixe ngünle chat.

⁸Chix tomzibu hia wanma chix jusax mix ang achangle ngokya ngündaokyabue thüi: “Ija mixsün a thung makhange jusax mix ang achangle ngokya mix münchang kox hia?”

⁹Mamabue thüi: “Ija a chix wüi changle.” Chatlechu mamabue thüi: “münchang, ikoxle ija mixsün a chix lailaikya owawa tüchangle.” Ikoxle chix tomtatae ija mix a chix wüi changpu le akax.

¹⁰Ikhoma hwome chix ang thüi: “Jangchangba nange büthüikya ma ngün ang koppu?”

¹¹Chixe lan: “Jisu le amünkya mix e haxthom zinglaxle ku mik to pale koxpu, ija füi Silom tiküi to paolaxle solax le thüikya khoma paolaxle so koxle kue ngün ang kopkya changpu.”

¹²Hwome chix ma atüi: “Chix ojong to tüi?” Chixe lan: “Kue münawan.”

¹³Hwome mik male ngokya müikya mixsün farisibu hato apüi.

¹⁴Jisu-e haxthom zinglaxle ija mixsün mik daple koxkya a nazak nyix kha changkya.

¹⁵Farisibuechu chatle wüi, chixe chemle ngün ang kopüile atüi. Ilaxle chixe hwom ang thüi: “Chixe ku mik to haxthom füi pale koxpu, üntoxle kue ija sole awüt füima athaxpi kue ngün ang koppu.”

¹⁶Farisi kha angkya züizüie thüi: “Ija khünak a Zang tokhange nguikya münchang; chemthüikoxle chixe nazak nyix wanlom münto.” Ikoxlechu mamabue thüi: “Ochax khünak tuitae ija ningkya ohünotün mwot chemle mok ang thoüi?” Ile hwom khakha ma wüi kax ma alanle ahan.

¹⁷Ikhoma hwome tamchatlechu wüi ija mixsün ma atüi: “Nange thüile, chixe nang mik amüile fapu; jangchangba nange chix a owa le texpu?” Chixe lan: “Chix a jepa tuita changle.”

¹⁸Ikoxle ija mixsün honu hia hopa hwom manyak tanto, chix to, chix mik a aduakle ngokya amüipu le pünpa-chongwangbue ongse chitsu.

¹⁹Ilaxle hwom ma atüi: “Ija a hünzome mik chimüi homle puxpu le thüikya hünsa changcha? Jangchangba athax chixe chemle ngün ang koppu?”

²⁰Ikoxle honu hopa nyie thüi: “Chix a kukhie mik aduakle puxkya nao changpu le kukhie anapu.

²¹Athax chixe ngün ang kopkya bama kwome münawan. Chix mik daple koxkya mix kwome müntsing. Chixchu mixmüi ang achangünkya daile chixe lan ang thoüihex, chix ma wüi atüilax.”

²²Honu hia hopa nyie ile thüikya a Jehudi nok pünpa-chongwangbu thua zakya kake thüipu; chemthüikoxle owawae “Chix Khrista changpu”, le tsaokya mix jangtüiba, ija khünak a sinagok angkya mün züt angkya zangwün tsuakle thomdaokya tüikya khoma;

²³“Chix mixzya changpu, chix ma atüilax”, le lan.

²⁴Ikhoma anaolechu wüi, mik aduakle ngokya müikya mixsün se ilaxle chix ma atüi: “Zang pomtho ma otsingtsing akaxüi le nange tsaodao! Nang mik amüile koxkya khünak a ochax khünak changpu le kwome awandaoa.”

²⁵Ija koxle chixe lan: “Chix ochax khünak chichang changpuix ija kue müntsing; kue awankya a ija tuita wüi, ija a: Tam ku a mikduak mix changkya ikoxle athax a kue ngün ang kopüna.”

²⁶Ikhoma hwome chix ma atüi: “Chixe nang to chem mokpu? Chixe nang mik chemle amüipu?”

²⁷Chixe hwom kax to lan: “Kue hünzom füi akaxdaoa, ikoxle hünzome ku kax chiapa; ikoxle hünzome ija bama chatle apase le chemto tsukya? Hünzome chuwüi chix wangshembu ang achangse le hia?”

²⁸Hwome chix to thuakzomle thüi: “Nang a chix füizuimix changpu, ikoxle kwom a Mosa füizuimix changpu.

²⁹Zange Mosa füi zangwünkya changpu le kwome awanle; ikoxle ija khünak bama, chix ojong tokya nguipuix, ija ngaxchu kwome müntsing!”

³⁰Ija mixsüne lan: “Müile, ikhama ohünotün tuita tüile, ija a hünzome chix ojong tokya hex ngaxchu chiawan, ikoxlechu chixe ku ang mik daple fapu.

³¹Zange ochax khünakbu kax ma münlaxle keme awan ngopu; ikoxle owae Zang chathua zale chix kax ma laxle mokpuix, ija khünak kax chixe apale.

³²Puxpong tokhange wüi aduakle puxkya mik daple amüi puta lekya kax keme otuechu maatatkya changpu.

³³Ija khünak Zang tokhange hüikya chichang thüikoxle chixe ile mok ang münthose!”

³⁴Hwome lanle chix ang thüi: “Nang a abakle ochax ma puxpaile tsonglaxle kwom hama apua ano le hi?” Ile hwome chix sinagok angkya alai.

³⁵Hwome ija khünak jwonle apaodaoale Jisu-e atat ang kop; ilaxle chix atakkya zuma thüi: “Nange Khünak Hosa to mong ongcha?”

³⁶Chixe lanle thüi: “Kue chix to ong angkya kuxma, chix a owa changpuix apuale fahüi.”

³⁷Jisu-e chix ang thüi: “Nange chix ngündaoa; ilaxle chix a nang füi athax ile akax ngokyamix changpu.”

³⁸Ija mixsüne lan: “Kue ongpu, Jowanpa.” Ilaxle chixe Jisu shwom.

³⁹Jisu-e chix ang thüi: “Mike chingünkyabu ang ngün ang tom ang ikoxle mike ngünle ngokyabu ang apwom ang tom angkya kuxmale ku Ija chaxwannu to nguipu.”

⁴⁰Chix füi tomle ngokya farisibue ija zangwün atatlaxle chix ma atüi: “Kwom ang miksut changpu le thüikya kax ning münchang hexnyi?”

⁴¹Jisu-e hwom ang thüi: “Hünzom miksut jangchang thüikoxle, hünzom ma ochax müntüise; ikoxle hünzome ‘Kwome ngünle’ le thüikya khoma hünzom a ochax ma ngoüna.”