Read Wancho Naga Wangshembu Mwot 1 Bible Online

Wangshembu Mwot 1 - Wancho Naga bible

Wangshembu Mwot 1

¹Alixachong Theofila: Pongwang angkya ku laiza ma, Jisu-e chix mwot owang wangkya tokhange chix zangkangting to madün tanto mokle hüikya hia anwot-anokya pangnu bama kue zadaopu.

²Chix dünüi thoma, Otsao Chasa tsakzong makhange chixe ma wangshem ang zünle kopkyabu ang sütlom mwotlom apua.

³Chix ozün ma tüile le mongaokya chitüi tang chix zi füima nyix punyi bama obi thomthom ma hexle hwom hato ngai. Hwome chix ngün, ilaxle chixe hwom füi Zang Wangting bama zangwün.

⁴Üntoxle otue hwom tomle ngokya hex, ipongma chixe hwom ang ija kax kox: “Jerusalem danle taxtox, ikoxle Apae koxüile tsaokya hingho oja bama kue hünzom hama wündaopuix, ija hingho tanlax.

⁵Juhan-e ti ma baptipu, ikoxle aluile chingo homle hünzom Otsao Chasa ma baptiüi.”

⁶Otue wangshembu Jisu füi asoxpuix, hwome chix ma atüi: “Jowanpa, nange ipongkhae Israel ang chatle wangting tamkox angchami?”

⁷Jisu-e lan: “Hanpak zanghan hia otu owanbu a Apae chix tsakzong makhangetix textyaüi, ilaxle ibu chemtue changüihex le awan ngo angkya hünzom mwot münchang.

⁸Ikoxlechu wüi Otsao Chasa otue hünzom ma nguiüihex, hünzome tsakzong kopüi, üntoxle hünzom a Jerusalem ma, Jehudi hia Samaria pangnu khato, üntoxle chaxwannu okhui apongle ku bama kaxkhi fa angkyabu ang achangüi”.

⁹Ija kax ashuk füima hwome hule ngongale chix a zangkangting to dong ang kox, üntoxle hwom miksho angkya chix zangfwome khungle kop.

¹⁰Hwome chix dongüi to mike ajing le hule ngo, ipongkhae mixsün anyi nyi tsekya awunlaxle hwom zuima allele ajong,

¹¹üntoxle thüi: “Galili tokya khünakbu, hünzome dingchi to hulaxle büthüikoxle ajong ngopu? Ija Jisu owa hünzom kha angkya zangkangting to dünpuix, hünzome chix zangkangting to dongüi chemle ngünpuix ilailaile chix chat angkya changle.”

¹²Ifüima wangshembu tingnu makhange mai tuita tukux atsaile tüikya olip pün füikya haxhua tokya Jerusalem to chat.

¹³Hwom tingnu to ngui ilaxle hwom ngohomkya kha nui to dong! Pitar, Juhan, Jakop hia Andriw, Filip hia Thoma, Bartholomew hia Mathi, Alfa hia Jakop, Simon (Patriot) üntoxle Jakop sasün Juda hwom tüikya.

¹⁴Shekobu hia Jisu honu Meri tamchu hotüi honaohom füi notom tuita zingle hwom onoxnox ma zangjop ang asox.

¹⁵Hanpak nyixta anyi füima mongong mixbu afoxkya hanpak tüikya, hwom pangnu mixhuak hota tsa tukux changkya, üntoxle Pitar akax ang ajong,

¹⁶“Kutüi kunaohom, Jisu kopkya lomwan-mix ang achangkya Juda owa chemle chang angkya hex, ija bama Otsao Chasa tokhange Dawid hama acha lüwüi akax thomdaokya ningle ija Otsao Laikax otok to ngaile hüi angkya oli changle.

¹⁷Juda chuwüi kem othom khama tuita changkya, chemthüikoxle chixchu wüi kem füi tomle Jowanpa mwot mok ang Jisu-e zünle kopkya mix tuita changkya.”

¹⁸(Chixe ochax mwot moklaxle kopkya ngun füi shakkya haxwankho ma chix nguakle zi; chix fumle chao ilaxle mongkha tokya abakle alai.

¹⁹Jerusalem ma ngokya pangnue ija zing atat, idaile hwom kax ma ija haxtok ang “Akeldama” thüikoxle “aji ajenkya haxtok”, le nyak).

²⁰“Chemthüikoxle Münchuak Tsai ma ija zakya tüile: “‘Chix homkha naxahua kox; ikha ma owachu ngo ang taxkox.’ Ija chutix zakya tüile: ‘Chix mwot owawae, lüile mok ang laxkox.’

²¹“Ijadaile, Jowanpa Jisu azangle zokya kaxkhi ang tututa kem khato hak angkya wüi changle. Chix a Juhan-e baptikya bama Kaxho Müikya apukkya makhange Jowanpa Jisu kem kha angkya dünkya nyix kople kem othom khama ngokya mix chang angkya oli changle.”

²³Idaile hwome mixsün anyi kam: Okhi a Barnaba le nyakkya Jusep, (owa ang Jastas lüchu wüi nyakpuix), üntoxle Mathia nyi changkya.

²⁴Ifüima hwome zangjop: “Jowanpa, nange pangnusa mongtex awan ngopu, idaile, Juda owae ma ngwotnui to paoüima oja mwottho danle toxlaxpuix,

²⁵Ija mwot man ma lüile mok ang hia wangshem ang achang angkya hanpakma ija nyi khama nange opupu zünle koplaxpuix, kwom hato ahohüi.”

²⁶Ifüima hwome mün tswon, ikoxle lai ma Mathia mün lai. Idaile chix a wangshembu bün büta tüikya khato e.