Read Wancho Naga Wangshembu Mwot 11 Bible Online

Wangshembu Mwot 11 - Wancho Naga bible

Wangshembu Mwot 11

¹Wangshembu üntoxle Jehudi chaxwan pangnu khatokya mongong mixbue mixnokbuechu wüi Zang Kax pongle kople ta le atat.

²Pitar Jerusalem to chatkya zuma, mixnokbuechu khwon züt angkya olom changüi le texkyabu othome chix ajaole thüi:

³“Nang khwon chizütkya mixnok hom to mixwün ang nguipu le daihia üntoxle hwom füi tomle sax-lingpu le daihia!”

⁴Ikhoma Pitar-e pongwang tokhange wüi chempangle changpuix ibu bakle hwom hama wün:

⁵“Ku a Chopa tingnu ma zangjople ngokya, ipongma kue mikngün ohün ngün. Chongkya tsap tuita ningle lituta zongkhing ali ma koplaxle ding tokya juüi kue ngün, ilaxle ija ku zuima zak.

⁶Kue soxle hukoxle omong khama müibu, pusi-maksa, üntoxle osabu tüle ngün.

⁷Ilaxle ku füi akaxkya kaxzing kue atat, ‘Ajonglax, Pitar! Langlax ilaxle saxlax!’

⁸Ikoxle kue lan, ‘Jowanpa, ile otuechu münchangüi. Ku wikha to chisax homfang hia chitsaokya oli tümasho.’

⁹Ding tokya kaxzinge anaolechu akax, ‘Zange atsaole thüikya füima tütalichu chitsaokya ang taxlax.’

¹⁰Ile othom azom ma chang, ilaxle oshukma ija jali bakle ding to chatle dün.

¹¹Ipongkhae Kaisaria tokhange ku hato akatkya mixsün azom ku ngokya hom to nguile hüi.

¹²Otsao Chasae ku ang hwom füi tomle chem mongao chitüi le pao angkya akax.

¹³Ibu tüinao hwom azokchu wüi ku füi tomle Kaisaria to paopu, ilaxle kwom pangwüi Kornelia hom to nguipu.

¹⁴Chixe kwom hama chix hom ma kaxtaimix ajongle ngünkya wün, owae chix ang thüi: ‘Simon Pitar le amünkya mixsün se ang Chopa to owawa tsanle akatlax.’

¹⁵Ilaxle kue hwom füi akaxle ngoponge, ami owang pongma kem hato nguikya ningle Otsao Chasa ngui.

¹⁶Ijama kue Jowanpa-e akaxkya ija kax texle atak ‘Juhan-e ti füi baptipu ikoxlechu Zange hünzom Otsao Chasa ma baptiüi.’

¹⁷Keme ongkya zuma kem ang koxkya ningkya Otsao Chasa hingho Zange mixnokbu angchu wüi koxle, ija a atsingshokya changle; jangchangba Zange mokkya abax ang ku a owa changlax!”

¹⁸Otue hwome ija kax atatpuix, hwome ajao ahai ngokya zak ilaxle Zang achuakle thüi: “Jangchangba Zange mixnokbu angchu monglüi le azang angkya osho apüi fadaoa!”

¹⁹Stefen lang pongma zothupkya zuma mongong mixbu machiak-machiak to chiak. Hwom kha angkya züizüi Foinesia, Saipras, üntoxle Antiok alople, Jehudi khünakbu tata hama Jisu Khrista a Messaiah changpu le Kaxho Müikya apukle pao.

²⁰Üntoxle Saipras hia Sirini tokya mongong mixbu züizüi Antiok alople, mixnokbu hato Jisu Khrista bama Kaxho Müikya apukle pao.

²¹Jowanpa tsakzong hwom füi tüikya, ilaxle khünakbue mongong laxle Jowanpa füito azui.

²²Antiok to ile changkya kax Jerusalem müimüithom na to wang, idaile hwome ikhato Barnaba tsanle akat.

²³Ikhato chix ngui ilaxle Zange khünakbu to mohimankya ngünlaxle chixe hwom ang zong adünle Jowanpa to mongongkya ma shingmongle ngo angkya akax.

²⁴Barnaba a Otsao Chasa füikya müikya mongong mix tuita changkya. Chixe khünaknu mongong ma Zang hato huanuma apüi.

²⁵Ifüima Barnaba-e Tarsas to kalaxle Sol lom.

²⁶Chixe Sol atakkya zuma, chixe chix Antiok to laxlaxle apaüi. Zangpua atale hokhie tomtomle müimüithom khünakbu füi apong ilaxle othom hama anwot-ano. Jisu füito azuikyabu ang “Khristan” le Antiok ma nyakle wang.

²⁷Ituke aje züizüi Jerusalem tokya Antiok to ju.

²⁸Hwom kha angkya mixsün tuita Agapa le amünkya mix ajong üntoxle Otsao Chasa zong makhange chaxwannu pangnu khato tuinu nuaknu chwonle wüi hüi angkya bama aje. (Iponge Klaodia a chongwang ang tüikya).

²⁹Jehudi haxtok angkya tüinaobu to fong angkya hanpakma hwom mixhuak pangnue wüi mae tsuakkya apongle hingho akat angkya bama Jisu wangshembue zangwün tsuak.

³⁰Hwome ile mok ilaxle ija ngun Barnaba hia Sol hokhi makhange Jerusalem müimüithom angkya mixpa tüichongbu hato akat.