Read Wancho Naga Wangshembu Mwot 17 Bible Online

Wangshembu Mwot 17 - Wancho Naga bible

Wangshembu Mwot 17

¹Okhi Amfipolis hia Apolonia akaile Jehudi nok sinagok tüikya Thesalonika to ngui.

²Opo chix wanlom ningle, Pol sinagok to ngui. Ikhato hatdang azom mong ma khünaknu füi Otsao Lai kax e-e laxle anwot-ano le nui;

³üntoxle Messaiah a sikngün apong angkya jao ilaxlechu anaole azangle zo angkya jao le apuale awan ang tom ilaxle Otsao Lai kax ma tüikya ile otsingtsing changpu le aho. Pol-e thüi: “Kue hünzom hama apua ngokya Jisu a ija Messaiah changle.”

⁴Züizüie Pol kaxho changle le apa üntoxle Pol hia Sila nyi füito hak; iningle Zang to shwomkya Grik othom huanuma üntoxle e-sele tüikya shekobuchu wüi hokhi chito hak.

⁵Pol hia Sila nyi füito khünaknu huanuma asüikya ngünlaxle Jehudi khünakbu ang mongtsik ilaxle tingjang lomnu tokya züntebu sele asoxlaxle wuk adün angkya othom ang zingle dan. Hwome tingkhua pangnu chito wüi mwop lai ang kox üntoxle Pol hia Sila nyi koplaxle khünaknu hato alai ang hokhi lomle Jason hom sing.

⁶Okhi chibang ünkoxle hwome Jason hia züizüi tüinaobu tingsho ma pünpa-chongwangbu hato linle apüi ilaxle akhong: “Ibue pangnu khato wüi tingtui adün ngole! Athaxchu kem tingsho ma nguikoxle

⁷Jason-e hwom hom ma thomle. Jisu Khrista le amünkya mama wanghom tamtüile le wünkya tokhange hwome Roman wanghom wanlombu ama ngole.”

⁸Ibu zangwün füi hwom khünakbu hia tingsho ma pünpa-chongwangbu mongtsik ang tom.

⁹Pünpa-chongwangbue Jason hozui hwom ma tsangthom ang tom ilaxle hwom danle apao.

¹⁰Ija jaja wüi zangnak füi tomle, tüinaobue Pol hia Sila nyi Beria to akat. Ikha alopkya ma, hokhi Jehudi nok sinagok to ngui.

¹¹Thesalonika angkya khünaknu füi ikha tokya khünakbu wüi künsha-mongdale tüi. Hwome Kaxho Müikya to mongtsule apa, ilaxle Pol kax otsingtsing changcha le hwome nyixfole Otsao Lai lom.

¹²Hwom khama mongongkyabu huanuma lai; ilaxle lükabuchu wüi üntoxle e-sele tüikya shekobuchu wüi Grik khünak mongongkyabu huanuma lai.

¹³Ikoxle otue Jehudi khünakbue Beria machu Pol-e Zang kax apuk-apua daoa ta le atat, hwom ikhato nguilaxle khünakbu nga-adün ilaxle khünakbu to cheile ama.

¹⁴Jan füima tüinaobue Pol tinu kax to apao; ikoxle Timothi hia Sila nyi Beria ma nui.

¹⁵Pol zun ang paokyabu chix füi tomle Athen kople ngui. Ifüima Timothi hia Sila nyi chwonle wüi chix hato hüi angkya kaxho füi chat.

¹⁶Sila hia Timothi nyi tanle Pol Athen ma ngopongma ija tingsho chapabue awangle ngünlaxle chix mongto tüle kak.

¹⁷Ikhoma Jehudi nok hia mixnok Zang shwomkya khünakbu füi sinagok ma ala, ilaxle le-zyenüi khünaknu füi tingjang lomnu to ala.

¹⁸Züizüi Epikurian üntoxle Stoik le nyakkya nwotmixbuechu chix füi kax ma alan. Züizüie thüi: “Chuja zaman mixe chem wünse le azongkya changkoxpu!” Mamabue thüi: “Chixe mixnok zangbu mo wünle ngokya ningle tüile.” Pol-e, Jisu üntoxle chix chatle azangle zokya mo wünle ngokoxle hwome ija akax.

¹⁹Idaile hwome Pol Areopagas le nyakkya tingnu nguawangbu tusox to apüi üntoxle thüi: “Nange wünle ngokya hwon-nwot hozün bama kwome tsingse tsule.

²⁰Nang kax züizüi kwom natat zongma khosamle apale, ilaxle ibu chem hanpak hex kwome awanse tsule.”

²¹(Chemthüikoxle Athen angkya nokpubu tamchu ikhato ngokya püntüibuechu wüi othuithuima ozünzün zangzün wünse tamchu apase le tsu).

²²Areopagas tusox thüntho ma ajong laxle Pol akax: “Athen angkya khünaknu! Pangnu lom ma wüi hünzome Zang lwot tole tüiale kue ngünle.

²³Chemthüikoxle kue hünzom tingsho faole ahamlaxle hünzome malili zang shwomkyabu to hule ano koxle, kue ‘Chitsingkya Zang Ang’ le zalaxlechu wüi zangshwom-hom tüngünle. Ile hünzome chitsing koxlechu kue hünzom hama wünkya a ija changpu:

²⁴Zang, owae chaxwannu tamchu ikhama atüitüi komle zingle alai laxpuix, chix a ding hia hax ma hopupa changle, ilaxle chix a khünake zingkya zangshwom-hom ma münngo.

²⁵Chix hanpakma moklaxle khünake chix ang koxkya lax angkya chix hanpakma mwotjao müntüi; chemthüikoxle khünak mixsa hia zünmoknüsa ang ozün hia zaksyet ang koxkya a chix tix changle.

²⁶Mixhuak tuita makhange chixe khünaknu jat-hi-li pangwüi zing, ilaxle chaxwan tok pangnu khato wüi hwom ngo ang dan. Amiba wüi achale chixe hanpak hia hwom ngo angkya ziakam textya le othüt chixe kox.

²⁷Zange ile, hwome chix naxlom le mokpu, üntoxle ile hwome pwomle lomle chix ataküi. Ikoxlechu Zang a kem opupu füichu atsaile müntüi;

²⁸owawae akaxkya ningle: ‘Chix ma kem ozün ma ngopu, amik-amokpu ilaxle ajingle ngopu.’ Ija a hünzom tsaipa owawae thüikya ningle, ‘Kwom chuwüi chixsu chixsabu changle.’

²⁹Kem pangwüi Zangsu Zangsabu daile, keme chixsün-chixjo a zingpabue zingkya hun, jan chichangba long ningle tüile le chitexüi.

³⁰Jisu Khrista ma khünaknue Zang matsing tanto, hwom ochax bama olüix chikhom homle shanle dantox daoa, ikoxlechu athaxpi pangnu khatokya khünak noknok wüi ma ochax tokya chat angkya bama kax koxdaoa.

³¹Chemthüikoxle chixe zünle kopkya khünak tuita makhange chixe chaxwannu pangnu otsingtsing kaxfün ma kaxfün angkya chixe Hanpak Nyixta tyale thomdaoa. Chixe ija otsingtsing changpule, ija mixsün chatle azangle zo ang tomkya tokhange pangnusa ang wüi angaile fadaoa.”

³²Pol-e chatle azangle zokya mo wünle atatkya zuma, züizüi chix chanyi, ikoxlechu mamabue thüi: “Nange ija bama chatle wünkox, kwome apase tsule.”

³³Idaile Pol-e ija tusox danle tox.

³⁴Züizüie chix chito hakle ong; ibu khama Daionisia chuwüi tuita changkya. Chix a Areopagas ma mün tüikya mix tuita changkya; ilaxle Damaris le amünkya mixcha tuita ilaxle mamabuechu wüi ong.