Read Wancho Naga Wangshembu Mwot 19 Bible Online

Wangshembu Mwot 19 - Wancho Naga bible

Wangshembu Mwot 19

¹Apolo Korin ma tüitanto, Pol a ija haxtok osungwa makhange ahamle hüikya Efisia to ngui. Ikhato chixe Jisu wangshembu züita atak,

²ilaxle hwom ma atüi: “Hünzome mongongkya zuma Otsao Chasa koplaxmami?” Hwome lan: “Münkop! Ilaxle kwome Otsao Chasa tüile lüjao ma-atat.”

³Pol-e atüi: “Jangchangba hünzome chem ningkya bapti laxpu?” Hwome lan: “Juhan-e baptikya olom laxpu.”

⁴Pol-e thüi: “Juhan-e baptikya olom pi ma ochax tokya chatkyabu hanpakma changwüi; ikoxle chixe Israel khünakbu ang chix füima hüile ngokya mix to mongong angkya kaxtom kox; ija a Jisu changle.”

⁵Ija atatlaxle hwome Jowanpa Jisu mün ma bapti.

⁶Pol-e hwom khangkho ma chix chak dankya zuma hwom hato Otsao Chasa hüi; hwome chitsingkya kax ma zangwün ilaxle Zang kaxho apuk.

⁷Hwom pangnu a mixhuak bün anyi tukux tüikya.

⁸Pol sinagok to dong, ilaxle lyetkua azom ojao chizale khünaknu hama zangwün ilaxle Zang Wangting bama chix akaxle ngokya bama otsingtsing changpu le chixe kaxkhi fa.

⁹Ikoxlechu hwom khama züizüi mongkhüikyabu tüikya ilaxle ibue mong chiongtsuak. Ilaxle khünaknu thüntho ma hwome Jowanpa lomtang bama kaxma thüi. Ikhoma Pol-e ibu dantoxlaxle Jisu wangshembu chix füito laxlax tox; üntoxle Tairanas khünaknu pünzün wangsaikya homnu ma chixe nyixfo to khünaknu füi zangwün ma aswot.

¹⁰Ile nuikya zanglao anyi hom, idaile ijongkha Asia haxtok ma ngokya Jehudi khünaknu hia mixnok pangnue wüi Jowanpa kax atat ang kop.

¹¹Zange Pol makhange khomtsikyabu mwot otya ma wüi mokle hüi.

¹²Chixe laxle ngokya chix tsangtsa angkya thünfwot nyi hia nyikhakbu ngaxchu kakmixbu hato pao ang twon, üntoxle kakbu jwonle apao ilaxle haxshix chasabu hwom angkya laile pao ang kox.

¹³Züizüi Jehudi khünakbu haxshix chasa jwonle aham ngokyabuchu ija jwon ang Jowanpa Jisu mün twon ang azong. Hwome haxshix chasabu füi akax: “Pol-e wün ngokya Jisu mün ma kue nang ang kaxkoxpu.”

¹⁴Ile mokle ngokyabu khama Jehudi nok nguapa akhokya Sewa le amünkya mixsün sasün hwom mixhuak anüt tüikya.

¹⁵Ikoxlechu haxshix chasae hwom ang thüi: “Kue Jisu awanle ilaxle kue Pol bamachu awanle, ikoxle nang a owa?”

¹⁶Haxshix chasa füikya mixsün tuitae hwom to shing le hüile hwom to lüt. Ija homkha angkya hwom mak-kha laxle nyiza wüi shikshak shikshem le laile pao.

¹⁷Efisia ma ngokya Jehudi khünakbu hia mixnok pangnue wüi ija zing atat ang kop; hwom pangnu wüi za ilaxle Jowanpa Jisu mün onüi towüi achuak achenle chang.

¹⁸Mae mokdaokyabu ahole tamchu noknu thüntho to angaile mongongkya khünakbu huanuma hüi.

¹⁹Khunhing twonle ngokya khünakbuechu wüi ma laipexbu apüi ilaxle noknue ngünle ibu zokle ashun. Hwome zokkya lai ibu otha athüt koxle jat punyi bün tha bang.

²⁰Ipongpong zongle Jowanpa kax putsa ilaxle oshing mongle tsong ang süt

²¹Ibu chang füima Mesidonia hia Akaia chaxwan to ahamle ngopongma Jerusalem to chat angkya Pol mongto texle atak. Chixe thüi: “Ikhato pao füima kue Rom tingnuchu wüi ngün angkya changle.”

²²Idaile chix Asia haxtok ma süngokya bama chixe Timothi hia Erata, chix chakta nyi, Mesidonia to kat.

²³Ija tuke Jowanpa lomtang bama Efisia ma khamkhitle wuk lai.

²⁴Demetria le amünkya khop jan jaokya mix tuitae ija jan füi Artema zang ang zangshwom-hom tuita zing, üntoxle chix thalex makhange zing mixbu ang huanuma lap alaile kox.

²⁵Idaile chixe hwom pangwüi se, hwom bomachu hwom lailaile mokkya mamabuchu wüi sele asoxlaxle chixe hwom ang thüi: “Ibibi khünaknu, kem okop olwot a ija mwot makhange changwüi le hünzomechu awan ngopu.

²⁶Ija mixsün Pol-e chem mokpuix, hünzome ma hanpakma ngünle lax üntoxle atat apa ang tsuaküi. Khünake zingkyabu zang ang zang münchangle chixe thüile, ilaxle ija Efisia machu anaole Asia haxtok pangnu khato wüi, chixe khünaknu huanuma anom-anaile koptsuak daoa.

²⁷Idaile kem thalexe münma kop angkya ziama ma tüile. Itata münchang, ikoxle Artema zang zangshwom homchu chem angchu chichang le max angkya ziama ma tüile. Ile Asia haxtok angkya noke üntoxle chaxwannu pangnu khato wüi shwomkya zang, khünaknue she achongkya zang changpu le ema chilaxle ahaidaoa!”

²⁸ija kax atatlaxle khünaknu ang mongtsik dong, üntoxle akhongle thüi: “Efisia angkya Artema achongkya wüi changpu!”

²⁹Ija mwop ngaikyae tingnu pangkha towüi u. Hwome Pol füi tomle aham ngokya Gaia hia Aristarkas, Mesidonia tokya nyi kop ilaxle hokhi lax üntoxle tingnu ma noknu nguazua nui to akhangle asox.

³⁰Pol-e khünaknu thoma nguazua nui to chix wüi shongnguiünse le thüt, ikoxlechu mongong mixbue chix pao ang chidan.

³¹Asia haxtok ma pünpa-chongwangbu züizüi chix zuikhuibue chix nguazua nui to chix tomtata sün chiaho koxwüi müiüile Pol hato kaxho fa.

³²Iponge nguazua nui to khünaknu huanuma mwop. Züizüie tüle akax, mamabue tüle wün; chemthüikoxle noknu ang khosam, ilaxle süchong tukuxe hwom chemto asoxpuix le chiawantsuak.

³³Jehudi khünakbue Alekjendar noknu thüntho to thwomle alaikya tokhange züizüie ija tuwuk ma chixchu wüi womle tüile le lax. Ifüima Alekjendar-e khünaknu füi khosele zangwün ang chak aja.

³⁴Ikoxle chix a Jehudi khünak changle le hwome awankya zuma, hwom pangwüie ijaja wüi zexle khonta anyi tukux “Efisia angkya Artema achongkya wüi changle”, le akhong.

³⁵Oshuk ma tingnu ma alixachong tuitae ija khünaknu mwopkya adang ang tho. Chixe thüi: “Efisia angkya khünaknu! Efisia a tuita akhokya Artema zangshwom-hom ilaxle zangkho tokya dütkya otsao long thomkya tingnu changle le pangnue awanle.

³⁶Owaechu ibu ang münchangle thüi ang müntsuak. Idaile hünzom shongdangün ilaxle ajangle chiano homle chemchu taxmok.

³⁷Okhie zangshwom-hom ahuxkoxa le nang chichang chichangba kem zang ang omale thüikoxa le nang chichang; ibachu hwome ija mixsün anyi ikhato apüipu.

³⁸Demetria hia chix mwotmok mixbue owawa ma kaxfe angkya jangtüi thüiningle, khwa ka nyixfo to daple thomle üntoxle apa ang pünpa-chongwangbu ikhama ngole, hwome ikhato tata ma kaxfe ang tsuaküi.

³⁹Bachutix hünzome texkya jangtüi thüiningle, ija a nokpubu tusox ma azut ang tsuaküi.

⁴⁰Ija khoma ile changpu le lan angkya kaxtong nang chitüitüi le anyix chemle changdaopuix, ija khomachu wuk alai ang tomle le kwom to sa angkya ziama ma tüile.”

⁴¹Ile akaxlaxle nguazua fan ang tom.