Read Wancho Naga Wangshembu Mwot 2 Bible Online

Wangshembu Mwot 2 - Wancho Naga bible

Wangshembu Mwot 2

¹Pentekos nyix nguikya zuma Jisu to mongongkyabu pangnusa wüi jongta khama afoxle nui.

²Zangwin zongle jep ponge azingkya ningle allele ozing tuita atat, ilaxle ijae hwom ngokya kha hom awang.

³Ifüima wün füikyabu le ningle lai ilaxle chiakle ikhama atüitüi pangnu towüi lyetkya hwome ngün.

⁴Hwom pangnu Otsao Chasae awang, ilaxle Chasae akax ang tomkya ningle mixnok kax ma akax ang süt.

⁵Zanglom to khünkhikyabu, chaxwannu pangnu haxtok tokya nguikya Jehudi khünakbu Jerusalem ma athongle tüikya.

⁶Otue ija kaxzing atat, khünaknu huanuma asox. Hwom pangnusa wüi khosamle abüt, chemthüikoxle hwom pangnusae wüi ibue wünkya zangwün makaxkax ma atat ang kop.

⁷Khosam hia abütkya füi hwome thüi: “Ibu ile akaxkyabu Galili nok münchangkox hia?

⁸Jangchangba kem pangnue wüi hwome wünkya zangwün kem kax ma atat ang kopkya a chemli?

⁹Kwom a Parthia tokya, Medi nok hia Elam tokya; üntoxle Jehudi hia Kapadosia tokya; üntoxle Pontas hia Asia tokya;

¹⁰Frigia, Pamfilia, Ijip hia Kurini, ibu akhople tüikya Libia haxtok chikao to ngokyabu; üntoxle Jehudi nok hia Jehudi nok ang achangle hüikya mixnok Rom chaxwan to ngokya nguikyabu;

¹¹üntoxle züizüi kem Kret hia Arabia tokyabu; ikoxlechu Jowanpa-e mokkya ohünotün mwot bama hwome akaxkya keme makax kax ma atat ang kople!.”

¹²Abüt üntoxle khosam laxle, hwome tata ma: “Ija chem hanpak hex”, le atüile ngo.

¹³Ikoxlechu mama mixbue mongong mixbu wanjaile thüi: “Hwom a jue toküna!.”

¹⁴Ifüima wangshembu mama bün anyi füi tomle Pitar ajong, ilaxle khünaknu füi azaxle akax ang süt: “Kem Jehudi khünakbu, ilaxle Jerusalem ma ngokya hünzom pangnu, ija büthüipuix kue hünzom hama apua fang, ku kax apahüi.

¹⁵Hünzome thütkya ningle ibu a jutokkya münchang; athax a swom fongsüt tukha changle.

¹⁶Itülüi, hünzome ngünkya hia atatkya a, ajepa Joel-e akax ngokya kax ngaikya changle:

¹⁷“Zange thüile: ‘Hanpak ashukle hüikya zuma khünaknu ang kue Chasa thokle koxüi. Hünzom susabue Haxzang Kaxho khünaknu hato apuküi; hünzom naosünbue mikngün ohün ngünüi, hünzom azupabue wünmang amangüi,

¹⁸lüka wüi changlax, sheko wüi changlax; ku dabu ang to apüile iponge ku Chasa ahanle koxüi; hwome ku kaxho apuküi.

¹⁹Zangkho chito ohünotünbu, amachi ma kue münwanbu ahoüi. Ikhama aji, wün tamchu shixle nakkya wünkhut tüiüi;

²⁰ija chongkya hia fuazangkya Jowanpa hanpak nguiüi thoma; zanghan a naktukle changüi, lyetnu a aji ningle khiüi.

²¹Üntoxle ile changüi, owae Jowanpa nyaküihex, chixe chix khosünüi.’

²²“Israel khünaknu, kax ibu to apahüi! Zange Nazareth nok Jisu makhange mokle ahokya ohünotün hia khomtsikya mwotbu ilaxle mowanbu tokhange chix a Zange kamle kopkya mix tuita changkya le hünzom hato ahodaoa; hünzom malailaie ija awanle chemthüikoxle ibu a hünzom thüntho ma noke ngünle mokle hüikyabu changle.

²³Zange chix tutex hia künzut-mongjang makhange Jisu a hünzom chak to kox angkya changle le athut apan tsuak daokya changle; ilaxle ochax khünakbu chak to pünsak ma tak ang koxlaxle hünzome chix langpu.

²⁴Ikoxlechu zidaokya chix Zange chatle azangle zo ang tom; chixe chix zikya sikngün chak tokya da, chemthüikoxle zike chix hakle thom ang tho angkya oli chichang.

²⁵Chemthüikoxle Dawid-e chix bama akax: ‘Kue Jowanpa ku thüntho ma jento ngün; khünakbue kusik chiangün angkya kuxma, chix a ku tsaxchi ma ngole.

²⁶Ija khoma ku mongkha mongmüile, ilaxle zangwün pongma ku ang mong müihule; üntoxle ku, ziün angkya mix changkoxlechu; Zang kaxtsao to onglaxle shui ngole,

²⁷nange ku chasa zik chaxwan to chitox koxle; chialekya nang da ku, shanle sikngün ang nange münfaüi.

²⁸Ozün ma ngo angkya lom nange ku ang aho, ilaxle nang ku füi ngokyae, nange ku ang mong bakle amüi.’

²⁹“Achong alihom, kue hünzom hama kem putong Dawid bama angai le wüi akax angkya changle. Chix zi üntoxle akhün, ilaxle chix zukting a anyix kople kem füi tüile.

³⁰Chix a ajepa changkya, ilaxle Zange chix füi tsaosaxkya kax chixe awanle ngo: Dawid lailaile, Dawid sixli kha angkya wanghom ang mixhuak tuita zingle alai angkya Zange tsao.

³¹Zange chem mok angkya hex ija Dawid-e ngün, idaile chixe Messaiah chatle azangle zo angkya bama akax üntoxle thüi: ‘Chix zik chaxwan to danle chitox; chix tsangtsa shanle pao ang chikox.’

³²Zange ija Jisu zidaokya chatle azündaoa, ilaxle kwom a pangnusa wüi ija otsingtsing bama kaxkhi fakyabu changpu.

³³Chix a zang tsaxchi ma nwondaoa, ilaxle Hopae tsaodaokya ningle, Chix angkya Otsao Chasa kop; ilaxle hünzome athax atatkya hia ngünkya a kem ang ahanle koxkya chix hingho changle.

³⁴Chemthüikoxle Dawid chix tomtata a Jisu ningle zangkangting to chidong; itülüi, chixe thüi: ‘Jowanpa-e ku Jowanpa ang thüi:

³⁵Nange nang zanbu to lütlaxle, china ang malax tanto, Ija ku tsaxchi ma thungdao!’

³⁶“Israel khünaknu pangnu, Jisu owa hünzome pünsak ma takle lang laxpuix, chix a Zange Jowanpa tamchu Messaiah ang kamle kopkya mix changle le hünzome awanle kop angkya changle.”

³⁷Otue hwome ija kax atat, hwom mongto po, ilaxle Pitar hia wangshem mamabu hama atüi: “Tüinaohom, kwome chem moküi?”

³⁸Pitar-e hwom kax to lan: “Hünzome ochax thailak atak angkya kuxma, hünzom pangnusa wüi ma ochax tokya atsailax, ilaxle Jisu mün ma bapti lax; ikoxle chix hingho Otsao Chasa Zange hünzom ang koxüi.

³⁹Chemthüikoxle hünzom üntoxle hünzom susabu, üntoxle tsailo to ngokyabu pangnu, üntoxle Jowanpa kem Zange chix hato otukux sele tüilaxpuix, ibu noknusa hanpakmale Zange tsaokya changle.”

⁴⁰Chixe hwom füi akaxkya isasa chichang; chixe hwom zongsai le chatlechu mamabu huanuma akaxle thüi: “Ma khosün koplax; ikoxletix ibu chichang-chizangkyabu sikngünkya ningle hünzom ang sik münngünüi!”

⁴¹Pitar-e akaxkya kaxho to ongkyabu huanuma lai ilaxle bapti lax; ija nyix ongkya khünakbu hajat azom tukux hwom othom khato athüt.

⁴²Üntoxle hwom a wangshembue anwot-anokya hia notom wonmüikya ma, üntoxle tomle saxlaxkya hia zangjop ma womle hwom shingmongle ngo.

⁴³Khünak nok wüi abütle wangshembu makhange khomtsikya hia ohünotün mwotbu mok.

⁴⁴Mongong mixbu notom tuita ma asüile ngo ilaxle mixhuak bwotba tomkux ang achangle ahanle lax.

⁴⁵Hwome ma tuina hia ma ma atüitüi hang ilaxle ngun nok ang wüi mathüt mapanpan le ahanle kox.

⁴⁶Üntoxle mong tuita ang achang laxle Zangshwom-Hom to nyixfole nui. Üntoxle homkha ma tomwüi süt-sax, mongmüi pwonla füi tamchu mong jonai ma hwome fongsax.

⁴⁷Üntoxle zang mün achuakle khünak pangnu wüi tata füi mongmüi le ngo. Üntoxle nyixfole Jowanpa-e khosünle kopkyabu hwom khato athüt ang kox.