Read Wancho Naga Wangshembu Mwot 22 Bible Online

Wangshembu Mwot 22 - Wancho Naga bible

Wangshembu Mwot 22

¹“Apu-apahom ilaxle kushem kuzuihom, hünzom thüntho ma kue ma khosele akax fang, shong apa hüi!”

²Chixe hwom füi Ibri kax ma akaxkya atatlaxle hwom dang ang süt; üntoxle Pol-e akax:

³“Ku a Jehudi khünak, Silisia angkya Tarsas ma puxkya changle, ikoxlechu ija Jerusalem ma Gamaliel chitong ma lainao tuita ningle tsongle hüikya mix changpu. Bangkya kem pupa wanlom to angkya bama kue thutle awan kopkya changpu, ilaxle anyix hünzom ningle kuechu wüi tsuakkya apongle ma tsün Zang mwottho to koxle thomkya mix changpu.

⁴Ija Jowanpa lomtang tokya mix to kue omang amüt le zothupkya changpu. Kue sheko lüka pangwüi koplaxle hwom kun ma shokya changpu.

⁵Nguakhobu hia nguawangbue ija ku kax changtomta kox-a le kaxkhi fa ang tsuaküi. Damaska ma ngokya Jehudi khünakbu hato zakya hwom angkya laiza füi, ibu khünakbu koplaxle janbüi füi khak üntoxle sikangün ang Jerusalem to laxlaxle chat angkya hanpakmale ku Damaska to paokya changpu.

⁶“Ile ku ahamle Damaska kop-hax khakha ma tüipongma, tungto shene, ding tokya wünnyane allele ku akhople nyan.

⁷Ku hax to düt üntoxle ku füi ile akaxkya kue atat, ‘Sol! Sol! Nange ku zo büthüikoxle thuppu?’

⁸‘Jowanpa, nang owa?’, le kue atüi. ‘Ku a Nazareth nok Jisu, nange zothuple ngokya mix changpu’, le chixe ku füi akax.

⁹Ku füi tomle tüikya khünakbue wünnyan ngün üntoxle ku füi akax ngokya kaxzing chiatat.

¹⁰‘Jowanpa, kue chem moküi?’, le kue atüi. Chixe lan, ‘Zolax, üntoxle Damaska to donglax, üntoxle Zange nang hanpakma mok ang achwonle tüikya komle ikhato nang hama wünüihex.’

¹¹Ile wünnyan zongkyae nyankya khoma ku ang mik apwom, ikhoma ku füikyabue ku chak ma syet laxle Damaska to dün.

¹²“Damaska ma tüikya Jehudi nokbue achuak achenle twonkya kwom Wanlom tokya otsao khünak tuita Anania le amünkya mixsün tüikya.

¹³Chix ku hato ngui, ilaxle ku zuima ajong üntoxle thüi: ‘Tüinao Sol, chatle ngünlax!’ Ifüi shemle kue chatle ngün üntoxle chix to hu.

¹⁴Chixe thüi: ‘Chix mongtex tsing angkya chix otsao da ngün angkya üntoxle chix tun makhange akaxkya chix kaxzing atat angkya hanpakma kem pupa hwom Zange nang zünle kopdaoa.

¹⁵Nange chem ngündaopuix üntoxle atatdaopuix ibu pangnu khünak nok hato wün angkya bama nang tuita chix kaxkhi ang achangüi.

¹⁶Idaile athax chem shen ngo angkya tüipu. Zolax, ilaxle bapti lax ilaxle chix mün lünkya tokhange nang ochax sole awütlax.’

¹⁷“Ku Jerusalem to chat, üntoxle kue Zangshwom-Hom ma zangjople ngopongma kue mikngün ohün ngün,

¹⁸ima kue Jowanpa ngün, iponge chixe thüi: ‘Momlax üntoxle Jerusalem nonokhaile dantoxdao, chemthüikoxle ikha angkya khünakbue nange ku bama kaxkhi fakya pongle münkopüi.’

¹⁹Kue lan, ‘Jowanpa, kue sinagok to nguilaxle nang to ongkyabu to tüle fitmüi le hwonkya hwome abakle awan ngole.

²⁰Ilaxle nang bama kaxkhi famix Stefen lang pongmachu ku tüikya. Kuechu wüi, Chix langkox wüi müiüi, le akax ilaxle chix langkyabu nyiza kue nyepu.’

²¹Jowanpa-e ku ang thüi: ‘Paokox, chemthüikoxle kue nang ochu to mixnokbu hato apaoüi.’”

²²Ija kax akaxkya kople khünaknue Pol zangwün to apale ngo; ifüima hwom azaxle akhong: “Chix lumpan akaidao! Chix ozün ma ngofang münchang!”

²³Ile akhong nga le hwome, ma nyiza akyet ilaxle ding to labu fu.

²⁴Rom süpahi lompae Pol zanhu nui to dün angkya kaxkox, üntoxle Jehudi khünakbu chix füi itukux chem khoma awukpuix Ija hanpak opaktik ang chix to fitkox le tom.

²⁵Ikoxle hwome fit ang chix to khakkya zuma, ikhama ajongle tüikya alixachong tuita ang thüi: “Roman nokpu tuita to, chem zia amadaopuix, ija opak chitik homtoxle fit angkya wanlom tüipia?”

²⁶Otue ija alixachonge ija kax atatpuix, chix süpahi lompa hato pao ilaxle atüi: “Nange chem hwonpu? Ija mixsün a Roman nokpu tuita changa!”

²⁷Süpahi-Lompa-e Pol hato hüilaxle atüi: “Ku hama apuahu, nang Roman nokpu changlaxma?” Pol-e lan: “Changle!”

²⁸Ija süpahi lompae thüi: “Kuchu wüi ngun huanuma koxlaxle Roman nokpu ang achangpu.” Pol-e lan: “Ku a nuput ma wüi achangpu.”

²⁹Ifüi shemle Pol ma kax atüi ang thüikya khünakbu chix ha angkya chat; ilaxle Pol Roman nokpu changkya khakle koplaxle süpahi lompa abanle ngo.

³⁰Ofüi nyix, Jehudi khünakbue chix ma chem tsaihux kaxhux fepuix le opaktik ang chix da ilaxle nguakhobu hia nguawangbu nyakle asox ilaxle Pol jolaxle hwom thüntho ma ajong.