Read Wancho Naga Wangshembu Mwot 25 Bible Online

Wangshembu Mwot 25 - Wancho Naga bible

Wangshembu Mwot 25

¹Ija chaxwan to Festas ngui füima nyix azom hom tanto, chix kaisaria tokhange Jerusalem to ngui.

²Ikhato chix nguapa akhokyabue hia Jehudi lompa thome Pol bama kaxhux fekya apüi.

³Hwome Festas ma hwom to chingchalaxle Pol Jerusalem to ngui ang koxhüi le ju, chemthüikoxle hwome chix lom fawa to lang ang tungkya tüikoxle.

⁴Festas-e lan: “Pol a Kaisaria kun ma shole thomle, ilaxle ku ikhato chwonle wüi chat angkya changle.

⁵Chixe chemchem thaikya mokdaokya jangtüichu, hwom lompabu chix füi tomle Kaisaria to nguilaxle chix ma kaxfe ang tsuak”.

⁶Hwom füi tomle Festas nyix achyet chichangba nyix bün Jerusalem ma nui, ifüima Kaisaria to ngui. Ofüinyix chix kaxfün angkya nui khwa ma thung, ilaxle Pol apüi angkya kaxkox.

⁷Pol nguikya zuma, Jerusalem tokhange nguikya Jehudi khünakbu chix akhople ajong ilaxle thüi: “Ija khünake mwotma huanuma wüi mokdaoa.” Ikoxlechu ibu kaxfyet bama hwome ngaitho le kaxkhi fa ang chitho.

⁸Ikoxle Pol-e ma khosele akax: “Kue Jehudi wanlom zongtochu chichangba Zangshwom-Hom bamachu, chichangba Roman wanghom bamachu thaikya mwot chemchu mamok.”

⁹Festas-e, Jehudi khünakbue chix ang sule naxthüi le Pol ma atüi: “Jerusalem to ngui ilaxle ikhato ku pomtho ma ija zangwün bama tsetwon angkya nang ang mongtsucha hex?”

¹⁰Pol-e lan: “Kaxfün angkya wanghom khwa thüntho ma ku ajongle ngopu. Kue Jehudi khünakbu bama thaikya mwot chemchu mamok, ija nange sümüile tsinglax ngopu.

¹¹Kue wanlom ama laxle lang-huakle awüt tang oma lita jangmokdao thüiningle, ku azünhüi le kue münthüi ngose. Ikoxle hwome kuma kaxfekya khama otsingtsing tuita ngaxchu chitüikya daile, ku owaechu ibu chak to kox ang münthoüi. Ku chongwangpa hato wüi paohüi.”

¹²Chix chakta füi zangwün laxle Festas-e lan: “Nange Chongwangpa hato kax koxdaokya daile, nang chix hato wüi pao angkya changle.”

¹³Hanpak hidaole kai füima wanghompa Agripa hia Barnis nyi Festas wünpwon ang Kaisaria to ngui.

¹⁴Okhi ikhato obi nyix hexle nuikya füima, Festas-e Pol ba angkya tsetwon chongwangpa thüntho ma danle akax: “Felik-e shole toxkya kun ma khünak tuita tüile;

¹⁵üntoxle ku Jerusalem to nguikya zuma, Jehudi nok nguakhobu hia tüichong mixmüibue chix ma kaxhux fekya apüi ilaxle chix mik amüt ang kaxfün tsuakle fahüi le thüikya.

¹⁶Ikoxle kue hwom ang, Roman khünake kaxfyet füikya mix, chix ma kaxfekyabu füi thünkhang asaole tsetwonle machang tanto üntoxle hopupa ang ma khose angkya hanpak chifa homtoxle owawachu owüiole kox angkya olom müntüile akaxdaoa.

¹⁷Otue hwom ikhato hüipuix, ifüima kue ifüi nyix wüi kaxfün khwa ma thung laxle ija mixsün apüi angkya kaxkox.

¹⁸Chix ma kaxfe angkyabu ajong, ikoxle kue thütkya ningle hwome chix ma chem zia amakyachu kaxfyet chifatsuak.

¹⁹Ikoxle hwome chix füi hwom zanglom hia ziünkya Jisu le amünkya mixsün tuita bama zangwün ma alat; ikoxle Pol-e chix ozün ma wüi tüile le thüi.

²⁰Ija ningkya hwom tuwuk-lajat bama zangwün fünle fa ang tsaipong kaxpak tik angkya ku khosam ma ngopue, Jerusalem to kalaxle ija zangwün kaxfün angkya to chix mong tsucha le kue Pol ma atüipu.

²¹Ikoxle Pol-e, chix nyele wüi thomlax ilaxle chongwangpae wüi zangwün fünle naxfa le thüile.”

²²Agripa-e Festas ang thüi: “Ija mixsün zangwün ku jao-jaoe atat-sele thütle.” Festas-e lan: “Nange chix zangwün ngainyix wüi atat ang kopüi.”

²³Ofüinyix Agripa hia Barnis nyi khünaknue achuak achenle ngui, üntoxle noknu nguazua hom to süpahi akhokyabu hia tingnu ma lompabu laxlaxle nop. Festas-e kaxho laxle Pol a hommong to dün.

²⁴Festas-e akax: “Wanghom Agripa, ilaxle kem füi ikhama tüikyabu; hünzome ngünkya mixsün ija a, chix omang amütdao le akhongle, ikhatochu üntoxle Jerusalem tochu wüi Jehudi khünakbue kaxhux fekya mixsün changpu.

²⁵Ikoxlechu ija khoma chix langdao le kaxfün koxtang chixe oma mokkya kue münatak ilaxle chix jaojaoe ija zangwün wanghom hato paokox le thüikya khoma kue pao ang koxpu.

²⁶Ikoxlechu chix bama kue wanghom hama laiza ang khütkhax-khaxkya kaxmik müntüi. Idaile ku jaoe chix ikhato hünzom thüntho ma apüipu, tamnüilechu Wanghompa Agripa thüntho ma! Chixe tik-to le changkya füi kue zale kop angkya oli tuita thüichu naxtüi le sisi apüipu.

²⁷Chemthüikoxle chix bama kaxfekya nyix kople, opak-otua chitik homtoxle kople thomkya khünak tuita danle apao angkya olom münchangle kue ngünle.”