Read Wancho Naga Wangshembu Mwot 4 Bible Online

Wangshembu Mwot 4 - Wancho Naga bible

Wangshembu Mwot 4

¹Nguawangbu hia zangshwom-hom nyetmixbu akhokya ilaxle saduki, le hwom hato hüiponge Pitar hia Juhan nyie khünaknu füi akaxle zangwün ngopongkha changkya.

²“Jisu zidaokya chatle azangle zokya changpu, ija ningle khünaknu zikoxchu chatle azangle zo angkya changle”, le ija wangshem nyie khünaknu hama anwot-ano ngokya khoma hwom ang huanuma mong puak.

³Idaile hwome hokhi kop ilaxle iponge hanhomünkya daile, ofüi nyix kople hokhi kun ma thom.

⁴Ikoxlechu ija kaxho atatkyabu khama ija to ongkyabu tüle lai; üntoxle ongkya khünakbu mixhuak hajat aga tukux ang achangle tsa.

⁵Ofüi nyix Jehudi nok apün-adakyabu, mixpa tüichongbu üntoxle wanlom nwotmixbu Jerusalem ma asox.

⁶Nguakho Anna hia Kaifa, Juhan hia Alekjendar tamchu zommix-zangmix homkha pangwüi asox.

⁷Hwome Pitar hia Juhan nyi hwom thüntho ma ajong ang tsan, ilaxle hokhi ma atüi: “Hünkhie ija chafai mix chemle amüi thopu? Hünkhi ma chem zong tüipu?”

⁸Pitar-e Otsao Chasae awang laxle hwom kax to lanle thüi: “Hünzom, khünaknu lompabu tamchu apu-apahom,

⁹chafaikya khünak tuita amüile müikya mwot mokkya khoma, chix chemle amüipu le anyix kukhi ma atüikya jangchang thüiba,

¹⁰hünzome pünsak ma takle langkya mix owa Zange chatle azangle zo ang tompuix, ija Nazareth nok Jisu mün ma tüikya zong makhange owüiole müilaxle ija mixsün hünzom thüntho ma ajong ang tsuakpu, le hünzom pangnue tamchu Israel khünak noke wüi awan angkya oli changle.

¹¹Jisu a Otsao Lai ma ile akax ngokya mix tuita changle: ‘Zingpabue chilaxle awütkya long, tuita homkom-longnu ang achangle hüi.’

¹²Khosün a chix lan makhange tix ataküi; chemthüikoxle chix mün makhange kem khosün angkya hexo le zangfang ma Zange chatle owa münchu koxle thomkya müntüi.”

¹³Pitar hia Juhan nyi mongchongkya ngünlaxle hokhi a man-ngünkya chemchu chitüikya nyi le awanlaxle nguawangbu pangwüi abüt. Okhi a Jisu füi ngokya nyi changpu le hwome tsingle lax.

¹⁴Ikoxlechu hwome akax angkya oli chemchu chitüi, chemthüikoxle faile ngokya amüikya mixsün Pitar hia Juhan nyi füi ajongle ngokya hwome ngün.

¹⁵Idaile hwome nguawangbu katzua nui angkya hokhi tam acha ang hwom ang kaxkox, ilaxle hwom tatae süile zangwün tam azut ang süt.

¹⁶Hwome tata ma atik-asho: “Keme ija Pitar hia Juhan nyi to chemle hwonüi? Chemthüikoxle ija chafai mix amüikya ohünotün mwot a hokhie mokkya changpu le Jerusalem ma ngokya noknusae wüi awanle ilaxle kemechu münchangle thüi ang müntho.

¹⁷Itülüi, ija zangwün noke atatle chipu angkya hanpakma ‘Jisu mün laxlaxle chatle owawa hamachu taxwüno’ le azahax.”

¹⁸Ilaxle hwome hokhi tamchatle se üntoxle, tüle wüi changlax otuechu Jisu mün ma anwot-ano le hia zangwünle jangchangba münmüipuo le aza.

¹⁹Ikoxle Pitar hia Juhan nyie hwom kax to lan: “Kwome hünzom kax ma laxüi hia Zang kax ma laxüi, hünzome hünzom lualua to zangwün tsuakle fahüi.

²⁰Chemthüikoxle kwome ngündaokya hia atat daokya mo chiwün homle zak ang müntho.”

²¹Nguawangbue tamtaile aza ilaxle hokhi danle apao. Hwome hokhi sikangünkya “ikhoma changpu”, le thüi angkya olom chiatak, chemthüikoxle ile changkya ngünlaxle khünaknue Zang mün achuakle ngo.

²²Owa cha faikya amüile ohünotün mwot mokpuix, chix a zangpua punyi nguidaokya khünak chang.

²³Okhi dankya thuile hwom othom hato chat ilaxle Nguakho hia mixpa tüichongbue hokhi füi akaxkyabu hwom hama wün.

²⁴Hwome ija atatkya zuma, hwom pangnu Zang to jopkya ma tom ilaxle zex: “O Jowanpa, nang a zangkangting, chaxwannu ilaxle Molo-Tinu ilaxle ibu ma atüitüi komle zingkya hopunu changle!

²⁵Kwom putong Dawid, nang da füi Otsao Chasa makhange nange zangwün koxle chixe thüi: ‘Mixnokbu ang büthüikoxle, kün-tsik mongmapu; Jowanpa zongma opüi mwot, büthüikoxle zingpu?

²⁶Chaxwannu wanghombu, hwom lailai azan ang achwon; apün-adakyabu pangnusa, Jowanpa Zang hia Messaiah, zan to ka ang asox.’

²⁷Ilailaile Hünsa Jisu, owa nange Messaiah ang achang, chix zan to ka ang Herod hia Pontias Pilat nyi mixnokbu hia Israel khünakbu füi tomlaxle ija tingnu ma asox.

²⁸Nange amibawüi nang tsakzong hia nang tutex makhange, chempang le changüihex, ibu athut-apan tsuakdaokya pangnu angaile mok ang hwom asox.

²⁹Idaile athax, O Jowanpa, hwome kwom to aza-anakya awan kop hüi üntoxle kwom nang dabu ang chem zazyenkya chitüi le nang kaxho apuk angkya mongchyen koxhüi.

³⁰Khünaknu kak-lak amüi ang nang chak thuikox, ilaxle nange Messaiah ang zingkya Jisu mün ma khomtsikya hia ohünotün mwotbu mok ang tomhüi.”

³¹Otue hwome zangjop ashukpuix, hwom asoxle ngokya kha sile alox. Hwom pangnu wüi Otsao Chasae awang ilaxle zazyenkya chemchu chitüi le Zang kaxho apuk ang süt.

³²Mongong mixbu kün-mong tuita ma ngo. Owaechu ma ma tüikya makux changpu le chithüi: ikoxle hwom ma atüitüi pangnu wüi tata füi azut-ahanle lax.

³³Huanu tsakzong füi wangshembue Jisu chatle azangle zokya bama kaxkhi fa, üntoxle Zange hwom pangnu to okhongui le mohiman.

³⁴Hwom othom khama tuita ngaxchu tuitaikya mix chitüi. Haxtok hia hom-pung tüikyabue ibu hang, ilaxle hangkya ma kopkya ngun apüi;

³⁵ilaxle wangshembu chak to kox; ilaxle wangshembue ibu ngun pangnusa ang wüi mathüt mapanpan ahanle kox.

³⁶Ilaxle ikhama Jusep le amünkya Saipras shuazo to puxkya liwi sün tuita tüikya, owa ang wangshembue Barnaba (thüikoxle zong adünkya mix) le nyak;

³⁷chixe chix haxtok hang laxle kopkya ngun apüile wangshembu chak to kox.