Read Wancho Naga Wangshembu Mwot 5 Bible Online

Wangshembu Mwot 5 - Wancho Naga bible

Wangshembu Mwot 5

¹Anania le amünkya mixsün tuita tüikya, chix kakonu angchu Safira le amün. Chixe chix ma tüikya tuina hidaole hang,

²üntoxle hokakonu hokhi mong notom laxle ngun ahanle chix hanpak ang tui, ilaxle ija chaktua komle wangshembu chak to kox;

³Pitar-e chix ang thüi: “Anania, nange ma tuina hangkya ma kopkya ngun ahanle tuilaxle nang mongto bao wang ang tom ilaxle Otsao Chasa büthüikoxle dyenpu?

⁴Mahangba ija tuina nang kux changkya, üntoxle nange ija hang füimachu ngun a nang kux wüi changpu. Jangchangba, nange ile moküile büthüikya ma texle koplaxpu? Nange khünakbu dyenkya chichang ikoxle Zang dyenpu!”

⁵Ija kax atat tsuakkya füi tomle Anania nguakle zi; ilaxle ija ngünkya hia atatkyabu huanuma za.

⁶Naosünbu dong, chix mang ashep ilaxle homtho to alai üntoxle akhün.

⁷Anania ziüna le chiawan laxle, khonta azom tukux aba füima chix kakonu Pitar ngokya khato nople hüi.

⁸Pitar-e she ma atüi: “Ku hama apua hüi, nang kakopa hünkhie tuina hangkya ma kopkya ngun komle ibibi wüi changlaxma?” Safira-e lan: “Changpu, ibibi wüi a.”

⁹Ifüima Pitar-e she ang thüi: “Nang kakopa hünkhie Zang thwontsing-üihexo le büthüikya to texle koplaxpu? Nang kakopa akhünkya naosünbu ipongkhae kafülom ma tüile, ilaxle nangchu wüi hwome homtho to paile alaiüi!”

¹⁰Ifüi tomle she chix chitong ma nguakle zi. Naosünbu donglaxle hukoxle she ziün le bang, idaile hwome homtho to paile alai üntoxle hokakopa zuima akhün.

¹¹Müimüithom pangnu ilaxle mamabuechu wüi, opange ija zing atat laxpuix huanuma zale khomtsi.

¹²Khünakbue ngünle hwom khama khomtsikya hia ohünotün mwotbu wangshembue mokle aho. Solomon nya-o ma mongong mixbu müitom tuita ang asox.

¹³Khünaknue hwom mo müihule le wün koxlechu hwom khato nui ang monge chwomkya mix tuita ngaxchu chitüi.

¹⁴Ikoxlechu khünaknu, Jowanpa to ongkyabu thom, sheko-lüka pangnu, hwom othom khato sühak-sühak le hakle hüi.

¹⁵Wangshembue khomtsikya hia ohünotün mwotbu mokle ahokya makhange, Pitar leüima chix chaxba engax thüichu, züizüi to thüingaxchu lyenle naxtox le khünaknue kakmixbu lya hia dombu ma paile lomnu to alai.

¹⁶Haxshix chasabu füikya khünakbu hia mama zangjang kakmixbu laxlaxle Jerusalem ozui onam tingnok tokya khunakbu ngui; ilaxle hwom pangnusa wüi amüi.

¹⁷Ofüima Nguakho hia ikhama tüikya sadukibu khama mün tüikyabu, opang chix füikyabu changkya hex, hwom mongto wünchua dong le wangshem nyi to miktsak; idaile hokhi ang sikngün fa angkya wüi changpu le hwome zangwün tsuak.

¹⁸Hwome wangshem nyi koplaxle noknga kun ma khale thom.

¹⁹Ikoxle ija ja Jowanpa kaxtaimixe kun ka daple kox üntoxle wangshem nyi alai laxle hokhi ang thüi:

²⁰“Paokox üntoxle Zangshwom-Hom to nguikox, üntoxle khünaknu hama ija tsünzün lomtang pangnu bama apuakox.”

²¹Wangshem nyie ija kax ma lax, ilaxle swomsae wüi Zangshwom-Hom to donglaxle anwot-ano ang süt. Nguakho hia chix füikyabue Jehudi nok mixpa tüichong pangnu nguawang katzua lax nyakle asox; ilaxle hwome wangshem nyi hwom hato apüi angkya hanpakma kople thomkya kun nyetmixbu hato kaxkox.

²²Ikoxle Zangshwom-Hom nyetmixbu nguikya thoma hokhi ija kun khama chibang; idaile hwom chatlaxle nguawangbu hato kaxwün wang.

²³Hwome thüi: “Kwom thoma kun ka mongle wüi hakle bangpu, ilaxle nyetmixbuechu fülom ma tyale wüi nyele nuipu; ikoxle ka daplaxle hwom dongkya thoma wangshem nyi opupuchu münbang!”

²⁴Otue Zangshwom-Hom nyetmix khama akhokya hia nguakhobue ija kax atat laxpuix, wangshem nyi to chempang thüikya changkoxpu le khosam.

²⁵Ipongkhae khünak tuita nguawang ngwotnui to nguilaxle hwom ang thüi: “Apalax! Hünzome kun ma shole toxkya khünak nyi a ipongkhae Zangshwom-Hom ma tüile; hokhie khünaknu hama anwot-ano ngole.”

²⁶Idaile Zangshwom-Hom nyetmix akhokyae chix khünakbu koplaxle ikhato pao ilaxle wangshem nyi chatle apüi. Bachutix zongzukle chichang, chemthüikoxle hwomchu wüi khünaknue long füi nakthup fa le za.

²⁷Hwome wangshem nyi hommong to dünlaxle nguawangbu tu ma hokhi ajong ang tom ilaxle nguakhoe sa.

²⁸Chixe thüi: “Kwome ija mixsün mün ma anwot-ano le taxchango le kaxkox füima, hulax, hünkhie chem mokpuix! Hünkhie anwot-anokyae Jerusalem okhui apong daoa; ilaxle chix langkya bama zangwün hünzome kwom khangkho ma adütse le texkya chang!”

²⁹Pitar üntoxle wangshem mamae hwom kax to lan: “Kwome Zang kax ma lax angkya changle, khünak kax ma münchang.

³⁰Hünzome pünsak ma takle langkya füima, kwom pupa hwom Zange ija Jisu chatle azang ang tompu.

³¹Israel khünak ang monglüi angkya hanpak kox üntoxle hwom ochaxbu thailak kox angkya bama, lompa hia khosünpa tuita ningle Zange chix ma tsaxchi ma, chix füi tomwüile nwonpu.

³²Kwom ilaxle kwom füi tomle, Zange chix kax ma laxkyabu ang hingho ang fakya Otsao Chasa, kwom pangnu wüi ibu bama kaxkhi changpu.”

³³Ija kax atatlaxle nguakhobu ang wün ma lai khi le mongtsik dong üntoxle wangshembu mik amütse tsu.

³⁴Ikoxle hwom khama Gamaliel le amünkya farisi mixsün tuita tüikya; chix a noke chathua zale e-sekya mix tuita wanlom nwotmixbu changkya; chix nguawangbu tu ma ajong. Chixe wangshembu homtho to alai angkya kaxkox,

³⁵ilaxle nguawangbu füi akax: “Ibibi Israel khünaknu, hünzome ibu khünakbu to chakmok ang ajong ngokya bama chatle tam ajanghüi.

³⁶Amipongechu Theoda le amünkya mix, chixchu wüi akhokya mix tuita changpu le ma alüile achuakle tülaidaopu; ilaxle chix füito ho-ali tukux khünak azui. Chix a langle awüt ilaxle chix füito azuikyabu afanle pao, ilaxle chixe apukkya tuwuk olom olithu le maxpu.

³⁷Ifüima khünak huak akiakkya tuke Galili nok Judas le amünkya lai; chixechu wüi khünaknu chix füito jikle lax, ikoxle chixchu wüi lang üntoxle chix füito azuikyabu pangnu paole sam.

³⁸Idaile ija zangwün bamachu kue hünzom ang thüipu, ibu khünakbu to chemlechu taxthüi ngo. Hwom a hwom mongtex ma tadan, chemthüikoxle ija mwottho hia ajekya khünake zingkya mwot jangchang thüiba, ija a maxlax angpuix;

³⁹ikoxle ija a Zang tokhange hüikya jangchang thüiningle hünzome hwom to lüt ang münthopu. Itülüi, hünzom mix Zang füi alünkya ang achangle bangüi!” Nguawangbue Gamaliel kax changkoxa le lax.

⁴⁰Hwome wangshembu sele dün, nyetmixbu ang hwom to fit ang tsan, ilaxle Jisu mün ma chatle tam taxakax-ole kaxkox üntoxle hwom danle apao.

⁴¹Wangshembue nguawangbu tusox danle tox üntoxle Jisu hanpak ang hwomchu mixchak kople sikngün angkya asukya ang e-ma laxkoxle hwom ang tüle mongmüi.

⁴²Ilaxle nyixfole Zangshwom-Hom hia khünak homkhabu to hwome Messaiah, tuita Jisu Khrista bama Kaxho Müikya anwot-anole apuk-apua.