Read Wancho Naga Wangshembu Mwot 8 Bible Online

Wangshembu Mwot 8 - Wancho Naga bible

Wangshembu Mwot 8

¹Ija nyix wüi Jerusalem angkya müimüithom khünaknue zothuple sikngün apong angkya owang wang. Wangshembu tata dantoxlaxle mongong mixbu pangwüi Jehudi hia Samaria chaxwan to afale pao.

²Züizüi zanglom to mongkoxkyabue akhongle sopngale Stefen mangtsa ilaxle akhün.

³Ikoxlechu Sol-e müimüithom pün ang azong. Chix hom-hom to ngui ilaxle mongong mixbu sheko lüka pangwüi linle alai ilaxle hwom pangnusa wüi kun ma sho.

⁴Afale paokya mongongmixbu pangnu khato wüi kaxho apuk le hwon-ano le pao.

⁵Filip Samaria angkya chongkya tingnu to ngui ilaxle ikhato khünaknu hama Messaiah bama apuk-apua.

⁶Filip-e akaxkya kax to khünaknue mongkox. Hwom pangnue chix kax to natha le apa ilaxle chix makhange khomtsikya mwot mokkyabu ngün.

⁷Khünak obiobi angkya haxshix chasabu awaole soplaxle laile pao; tsangtsa amok ang chimüile faile kakkyabu hia cha-chak faikyabu huanuma amüi.

⁸Idaile Samaria angkya tingnu ma tüikya khünaknu huanuma mongmüi.

⁹Ija tingnu ma Simon le amünkya mixsün tuita tüikya. Onox ma chixe Samaria angkya khünaknu chix chajik-muashem makhange azale thom. Chixe alüile achuakle wün.

¹⁰Ija tingnu ma tüikya chongkya hixkya noke, pangnu tsünthome chix to mongkox. Hwome thüi: “Simon a ‘akhokya tsakzong’ le keme nyakkya zang achangkya changüi.”

¹¹Chixe otsingtsingsa ma hwom khompua atsikdaoa, ikhoma hwome chix lwot to angkya lai.

¹²Ikoxle otue hwome Zang Wangting hia Jisu Khrista mün bama Kaxho Müikya Filip makhange atatle laxpuix, hwom sheko lüka pangwüi tima bapti.

¹³Simon-e ngaxchu wüi Jisu Khrista to ong; ilaxle bapti lax füima Filip füi asüi le ngo, üntoxle chixe Filip-e mokle ngokya khomtsikya hia ohünotün mwotbu ngünlaxle chixchu wüi abüt.

¹⁴Samaria tokyabue Zang kax pongle kopdaoa ta le Jerusalem tokhange wangshembue atat; idaile hwome ibu hato Pitar hia Juhan nyi tsanle akat.

¹⁵Hwome ikha alopkya zuma, Otsao Chasa naxkop ang mongong mixbu hanpakma zangjople fa.

¹⁶Chemthüikoxle hwom owawa machu Otsao Chasa mahüi; hwom a Jowanpa Jisu mün ma bapti lanlan laxle ngotan.

¹⁷Ifüima Pitar hia Juhan nyie hwom khangkho ma chak danlaxle zangjop, ija ma hwome Otsao Chasa pongle lax.

¹⁸Wangshembue hwom khangkho ma chak danlaxle zangjop pongma Zange hwom ang Otsao Chasa koxkya Simon-e ngünle lax. Ikhoma chixe Pitar hia Juhan nyi ang ngun kox,

¹⁹üntoxle thüi: “Kue twonkyabuechu pangnusae wüi Otsao Chasa kop ang tsuak angkya kuxma, ku angchu wüi ija tsakzong laxhüi!”

²⁰Ikoxle Pitar-e chix kax to lan: “Nange Zang hingho ngun füi shak ang thoüile thütkya khoma, nang ilaxle nang ngun a haolum to leün.

²¹Kwom mwottho ma nang kwom üitho jao münchang, chemthüikoxle Zang miksho ma nang mong ojao münsu.

²²Nange ija ochax lom to thütkya nang mong achatlax, ilaxle ija ningle nang mongto chichangle thüt-pan daokya hanpakma Jowanpa to joplax ikoxletix chixe nang ang thailak faüi.

²³Chemthüikoxle nang a osing nüfuxe awangle tüile, ilaxle ochax kun ma kople thomkya mix changa le kue ngünle.”

²⁴Simon-e Pitar hia Juhan nyi ang thüi: “Hünkhie akaxkya ku hato chemchu chingui angkya hanpakma chingchalaxle ku bama Jowanpa to jop-hüi.”

²⁵Jisu Khrista bama tsingwankya khünakbu hama kaxkhi koxle wünle Jowanpa kaxho apuk-apuale chang füima Pitar hia Juhan nyi Jerusalem to chat. Okhi chatüi lom ma Samaria tingkhuabu to Kaxho Müikya apuk.

²⁶Jowanpa kaxtaimixe Filip füi akax: “Nang achwonlax üntoxle Jerusalem tokhange Gaza to lekya lom shuathongchi lom ma lelax.” (Ija lom a awütle thomdaokya lom changkya).

²⁷Filip achwon ilaxle pao. Iponge Etheopia nok mixsün tuita eunak (zwom züidaokya mix) apong. Chix a Etheopia wangcha Kanda khwa ma, she tuina to hume angkya mix alixachong tuita changkya,

²⁸üntoxle chix a hom to chatüi man-kanlin khoma ngalaxle ajepa Isaia Laipex akhongle enga le hüi.

²⁹Otsao Chasae Filip füi akax: “Ija man-kanlin hato alople hüikox ilaxle pyapyale ahamkox.”

³⁰Ikoxle Filip-e ija hato zikle alop ilaxle ija mixsüne ajepa Isaia lai ekya atat. Filip-e atüi: “Nange ekyakha chem hanpak hex awanchami?”

³¹Chixe lan: “owawae ku hama apuale chifa thüikoxle kue chemle awan manüi?” Chixe Filip ang thüi: “Oman ngahüi ilaxle ku füi tomle kanlin dingma ahamhax.”

³²Chixe ekya Otsao Lai ofong a ija changkya: “Chix a lang ang paokya, chun tuita ningle; omun sexkya ma chingaokya, tuita chun hosa ningle; chixe kaxfa tuita chizex.

³³Chix tha ajao pongma, sukya kaxfün fa ang chitom. Chix sixli pak owae tiktsuaküi? Chemthüikoxle chaxwannu angkya, chix tsün a paodao khato.”

³⁴Ija alixachonge Filip ang thüi: “Ku hama siapuahüi, ajepae owa bama akax ngopuix, chix bama hia mama owawa bama hex?”

³⁵Filip-e akax ang sütle Otsao Lai ofong ija makhange owang wanglaxle chix hama Jisu Khrista bama Kaxho Müikya apua.

³⁶Ile hokhi lomjang fole ahamle hüi pongma jongta kha ti tüikya nui to ngui, ilaxle ija alixachonge thüi: “Ikhama ti hidaole atungle tüingünlaxle! Chemtan-chemnye ngoüi, athax wüi baptiüi jangwüia?”

³⁷Filip-e chix ang thüi: “Nange nang mong tokhange abakle jangong thüikoxle nang bapti ang tsuaküi.” Chixe lan: “Kue ongle, Kue Jisu a Zang Hosa changle le ongle.”

³⁸Ija alixachonge kanlin azak, ilaxle hokhi pangnyi wüi, Filip hia ija alixachong nyi tikha to ju, üntoxle Filip-e tima chix bapti le kox.

³⁹Okhi tikha tokya laikya zuma Jowanpa Chasae Filip tswonle pao. Ija alixachonge chix tamchatle chingün, ikoxlechu mongmüi atungle chix hom to chat.

⁴⁰Filip a chix lualua to Ashdot to bang; ilaxle chixe Kaisaria ma-alop ma-alop le lomjang fole pangnu tingsho towüi Kaxho Müikya apukle chat.