Read Wancho Naga Rom 1 Bible Online

Rom 1 - Wancho Naga bible

Rom 1

¹Khrista Jisu da, ilaxle kamle kopkya wangshem tuita tamchu Kaxho Müikya apuk angkya hanpakma Zange nyakle kopkya mixsün Pol tokhange:

²Kaxho Müikya a kaipongma wüi ajebu makhange Zange tsaole thomdaokya ilaxle Otsao Lai ma zale thomkya changle.

³Ija a chix Hosa, kem Jowanpa Jisu Khrista bama changle: Khünak chifün ma chix a Dawid sasün tuita ang pux;

⁴chix otsao chifün ma, zidaokya chatle azangle zo ang tomkya makhange chix a Zang Hosa changpu le fua-hi-zangle aho.

⁵Khünaknu pangnu jat-li tokya wüi mongong hia kax ma laxkya hato zunle ahüi angkya hanpakma, Khrista mün hanpakmale, chix makhange Zange ku ang wangshem tuita ang achang angkya osho fa.

⁶Jisu Khrista kux ang achang angkya hanpakma Zange nyakle kopkyabu Rom tingnu ma otukux tüilaxpuix, hünzom chuwüi womle.

⁷Idaile kue hünzom Rom tingnu angkyabu opang to Zange mongkün puix ilaxle chix ma-mix ang nyakle laxpuix, hünzom pangnu hato zapu. Zang kem Hopa hia Jowanpa Jisu Khrista nyie hünzom ang mongsom hia chingcha naxfa.

⁸Pongwang ma hünzom pangnu hanpakma, Jisu Khrista makhange kue Zang ang münchong fapu; chemthüikoxle hünzome Jisu Khrista to mongongkya zing zangfange atat ang kople ngole.

⁹Hosa bama Kaxho Müikya apukle mong bakle koxlaxle Zang owa mwot kue mokle ngolaxpuix, chixe ku zangwün otsingtsing changpu le kaxkhi fa ang thoüi. Kue zangjopkya foto hünzom texle atakkya Zange awanle.

¹⁰Ilaxle oshuk ma, chix mongtex jangchangba, athax kue tütale thüichu hünzom ha alople nguitsuak angkya lom dap-hüile kue zangjoppu.

¹¹Chasa mohiman hünzom füi ahan-achüi le lax, ilaxle hünzom zong dong ang kox angkya kuxmale kue hünzom ngünse le huanuma thüt.

¹²Ku woktex a, ku mongong tokhange hünzom to fong ilaxle hünzom mongong makhange ku to fongle tomwüi afong angkya hanpakma changle.

¹³Kutüi kunaohom, hünzome ija mong ma kop angkya changle: Kue hünzom waise le obi thomthom ma hexle olom zingle ano daoa, ikoxle kue ile mok ang jao chimüile lilitae thüichu wüi abaxle thomle. Mama mixnokbu khato achangkya ningle, kue hünzom khatochu khristan ang achangle khünaknu ahüise le tsupu.

¹⁴Chemthüikoxle ku ma, tsuak mankya hia chitsuak chimankya nok hanpakma, ilaxle manngünkya hia chiman chingünkya pangnu hanpakma thashe tüile.

¹⁵Ipue kue, hünzom Rom tingnu ma ngokyabu hamachu Kaxho Müikya apuase tsupu.

¹⁶Kaxho Müikya bama ku münazak; chemthüikoxle ija a opange ongpuix hwom khosün hanpakma Zang tsakzong changle, pongwang ma Jehudi khünakbu hanpakma ilaxle mixnokbu hanpakma.

¹⁷Chemthüikoxle Kaxho Müikyae Zange khünaknu chix füi mua amüikya ngaile ahole; owang tokhange oshuk kople ija a mongong makhange tix changüi. Otsao Lai kax ma tüikya ningle: “Mongong makhange Zang füi owa muamüi laxpuix (chix) ozün ma tüile.”

¹⁸Ochax khünakbu hia chitsaokya khünakbu, chimüikya olome otsingtsing awan ang chikoxle opang abaxpuix, hwom füi Zang mongtsik dongkya zangkangting tokhange julaxle ngaile ahole.

¹⁹Zange hwom sikangün, chemthüikoxle khünake Zang bama tsingle lax angkya lom ang khosam chitüi. Zang chix jaoe ija hwom hato angaile aho.

²⁰Zange chaxwannu zingpong tokhangkya, mik makhange ngün ang chithokya chix, owang wangkya hia ashukkya kha chitüikya ilaxle Zang tsingtsing, ibu tsingshole ngün ang tho. Khünake bue Zang chakzingbu ma ngün ang kople. Ija khoma hwom ang thailak ojao müntüiüi.

²¹Hwome Zang awan, ikoxlechu chix achuak afua le chichang, ilaxle münchongchu tamchifa. Itülüi mongjang samsamsüi le pao ilaxle chem ngax chitüikya hwom khangka zangnake awang.

²²Hwome hwom a hwon-hi-je füikya le thüitüi, ikoxle hwom a ongatbu;

²³tam chizi chimax angkya Zang tongshwom haxkux tsyento, hwome zile maxün angkya khünak ningle chichangba osabu ningle chichangba müibu ningle chichangba alyangle ahamkya müibu ningle chapabu zinglaxle shwom.

²⁴Khünakbu itukux ongat ang achangkya khoma, Zange hwom mong ma tsukya chichang-chizang mwot mok ang dan, ilaxle hwome tata zongto zakkop mwotbu mok.

²⁵Hwome Zang otsingtsing othai füi alüix; achuak afua koxle asule tüikya zingpupa Zang! Amen. Chix achuak haxkux lüixto hwome Zange zingle alaikyabu shwom ilaxle ibu thotha.

²⁶Khünakbue ile mokkya khoma, Zange hwom khualyenle zakkop mwot mok ang dan. Shekobue to apüile kolyen laxle makux-maka olom ma chichang homle twon.

²⁷Ija lailaile lükabuechu sheko füi ngokya dantoxlaxle taningkya lüka lomle kalyen. Lükabuechu ilailai lüwüi tata füi zakkop mwot mok, ilaxle ija khoma kop angkya jao daile hwome ma sikngün alüile kopüi.

²⁸Hwome Zang bama tsingwankya otsingtsing mong ma kop ang angamkya khoma Zange hwom oma mong chak to dan, ikhoma chem chimokse hex ija hwome mok.

²⁹Hwom a. Oma, nüfux, ilaxle tata zongto tüikya, iningkya chichang-chizangkyabue awang; miktsak khangsyen, alang ahuak, achax-azan, dyen-ngan, üntoxle mix fün amakyabue amün laxle hwom ngo.

³⁰Hwome tata bato khualop, ilaxle tata mo ama le wün; hwom a Zang thua anukyabu, tata ajaokyabu, ngamkyabu, ilaxle kaxchongbu, hwom a oma mwotlom to khüt-alikyabu; hwome manu mapa kax ma chilax;

³¹hwom a ongatbu, mongong chitüikyabu, küntex mong chizaikyabu, tamchu chingchajaja chitüikyabu.

³²Ile ngokya khünakbu zi angkya ataküile Zang wanlom ma tüikya hwome awanpu. Ingale iningkya oma mwot hwom tatae mokle lengokya chichangle mixe mokkya tochu wüi müipuix le thüi.