Read Wancho Naga Rom 10 Bible Online

Rom 10 - Wancho Naga bible

Rom 10

¹Kutüi kunaohom, ku zongma ma khünakbu khosünle namchang koxbae le ku mongto otukux sungkya dai! Hwom hanpakma kue obukux zangjopkya dai!

²Hwome Zang to zule mongkoxkya bama ku kaxkhi angchu changtsuakse. Ikoxle hwome mong koxkya otsingtsing man-ngünkya chichangba changkya lom ma man-ngünkya chifün ang laxlaxle koxkya münchang.

³Zange khünak füi muamüi ang lomkya olom hwome ma-awan, ilaxle hwome Zang zongma sukya lom hwom lailai to zingle lax ang azongle; ilaxle Zange khünak füi muamüi angkya olom tandaokya hato hwom hüise müntsu.

⁴Chix to ongkyabu pangnu wüi Zang füi muamüi angkya hanpakma Khrista-e wanlom oli thudaoa.

⁵Wanlom kax ma laxkya tokhange Zang füi muamüi angkya bama Mosa-e zakya a ija: “Wanlom kax ma laxle saxmokkya mix, ija makhange azangle ngoüi.”

⁶Ikoxle mongong makhange muamüi angkya bama akaxkya kax a ija changle: “Zangkangting to owa dongüi?” (Ija a Khrista jo ang).

⁷Chichangba: “Amachi chaxwan to owa juüi?” (Ija a lumting tokya Khrista dün ang) le nang füi alüile taxakax.

⁸Otsao Lai kax a: “Zang kaxho a nang zuima, nang tun ma ilaxle nang mong ma tüile” -Ija a kwome apukkya mongong kaxho changle.

⁹Nang tun makhange nange: “Khrista a Jowanpa Changle”, le ngai üntoxle chix zidaokya Zange chatle azünpu le nang mong ma ongkya jangtüi thüiba, nang khosünüi.

¹⁰Chemthüikoxle kwome mong ma ong ilaxle tix Zang füi muamüipu; kwome tun ma ngai ilaxle tix khosün atakpu.

¹¹Otsao Lai kaxe ile thüile: “Chix to mongongkyabu ang mong athokya müntüi.”

¹²Ija ma pangnu wüi womle, chemthüikoxle Jehudi nok hia mixnok le süikya kha chemchu müntüi; Zang a nok Jowanpa, ilaxle chix mün lünkyabu pangnu hanpakma mohiman okho changle.

¹³Otsao Lai kax ma: “Zang mün lünle anyaknyak pangnu khosünüi”, le akaxkya ningle.

¹⁴Ilaxle hwome chiong thüikoxle, hwome chix mün chemle lünüi? Ilaxle kaxho chiatat thüikoxle hwome chemle ongüi? Üntoxle kaxho chiapuk thüikoxle hwome chemle atatüi?

¹⁵Üntoxle kaxho mix tomle chiapao thüikoxle, kaxho a chemle apuküi? “Kaxho Müikya koplaxle nguikyabu otukuxkya ohünotün!”, le Zang kax ma akaxkya ningle.

¹⁶Ikoxlechu hwom pangnusae Kaxho Müikya pongle chikop. Isaia chix jaojaoe akaxle “Jowanpa, ku kaxho to owae ong?”

¹⁷Idaile mongong a kaxho atatkya makhange hüi, ilaxle kaxho a Khrista apukkya tokhange hüile.

¹⁸Ikoxlechu kue atüipu: Hwome kaxho chiatatkya otsing changlax ma? Hwome atat tomta daoa; chemthüikoxle Otsao Lai kax ma tüile: “Hwom kaxzing chaxwannu pangnu khato ka; hwom zangwüne haxtua zangnam alople.”

¹⁹Anaolechu kue atüi: “Israel noke tsinglax ma?” Pongwang ma Mosa-e lan, “Kue manok chichangkyabu ang, hünzom to miktsak ang koxüi; mixnok angabu tokhange, kue hünzom ang mongtsik adünüi.”

²⁰Ilaxle ija akax ang Isaia mong süchong chongle chong, “Ku lomle chingokyabue ku atak, ku chiatüituakyabu hato ku ngui.”

²¹Ikoxle Israel bama chixe akax, “Ku kax ma chilaxkyabu, tamchu ku zongto tüikyabu füi; tumüise le han ahom le oshua lom.”