Read Wancho Naga Rom 11 Bible Online

Rom 11 - Wancho Naga bible

Rom 11

¹Ifüima kue atüi; Zange chix khünaknu chilaxle awütpia? Chemthüikya to! Ku ngaxchu Benjamin homjen khama Abraham sixli, tuita Israel khünak changpu.

²Ami owang tanto wüi zünle kopdaokya, chix khünaknu Zange ma-awüt. Elija-e Israel nok hanpakma Zang füi zongbakle zangwün pongma:

³“Jowanpa, hwome nang ajebu langdaoa, ilaxle nang zomtong pündaoa; atale toxkya tuita wüi, tamchu hwome ku lang ang tungle ngopu”, le akaxkya Otsao Lai kax hünzome awan ngopu.

⁴Zange chix kax to chemle lan? “Othai Bal zang chishwomkya khünak; ku hanpakma hajat anüt khünak thompu.

⁵Athaxchu ija lailaile, chix chingcha khoma, Zange zünle kopkya khünak huak hidaole tüile.

⁶Chixe zünle kopkya a chix chingcha khoma, hwome mokdaokya mwot khomale münchang. Chemthüikoxle Zange chem zünle koppuix, ija a khünake mokkya mwot khoma jangchang thüiba, chix chingcha a otsingtsing chingcha chichangüi”.

⁷Jangchangba chem? Israel noke hwom lomle ngokya chiatak. Zange zünle kopkya khünak huak hidaole tüikyabue tix ija atak; mamabu ang a Zange nyakkya atat ang naba.

⁸Otsao Lai kax ningle, “Aju-ajang angkya chitüi le, Zange hwom kün-mong aba; anyix kople hwome mik makhange, ngün ang chitsuak chichangba, na makhange atat ang chitho.”

⁹Ilaxle Dawid-e thüi: “Hwom fongkhat ma womhax oman; hwom naxnguak, hwom sik naxngün!

¹⁰Ngün ang chikop angkya kuxma, hwom mik achikle naxngo; chatle jento hwom sikngünkyae, hwom akun le ngo ang naxtom.”

¹¹Ifüima atüi: Jehudi khünakbu asuakya zuma, hwom olithu ang nguakpia? Ile ojao münchang! Chemthüikoxle hwome ochax lyen, ilaxle hwom nüfux naxdong ang mixnokbu hato khosün apüi.

¹²Jehudi khünakbu ochaxe zangfang hato huanuma mohiman apüi, ilaxle hwom chasa chima tuinokyae mixnokbu hato huanuma mohiman apüi. Ilaxle Jehudi khünak huak komle athütkya zuma mohiman otukux chongle changüihex!

¹³Athax kue hünzom mixnokbu füi akaxpu: Ku mixnokbu hato wangshem tuita ang ngokya kople ku mwottho ma ku mong ngamkya tüiüi.

¹⁴Ku mwot ma ku mong ngamkya to ku füi mamixbu ang osing dong ang koxüi, ilaxle ile ku khoma hexle Zange züizüi kho thüingaxchu sün angkya hanpakma.

¹⁵Chemthüikoxle hwom chilaxkya zuma, chaxwannu a Zang füi zuikhui ang achang. Ikoxle hwom pongle kopkya zuma chemle changüi? Ija a zingo ünkyabu hanpakma khüzün ang changüi!

¹⁶Owang ma wanshikle Zang ang fakya jangtüi dao thüikoxle, tsap ma shemle thomkya saxchu komle chix kux changüi; ilaxle pün otsing Zang ang uale jangkoxdao thüiba, okangsabuchu wüi chix kux ang changüi.

¹⁷Küithwom le alaikya Olip pün angkya okangsabu züizüi pakle awüt, ilaxle fao olip pünkang ija füi asople kox. Hünzom mixnokbu a ija fao olip pün thatha changpu; ilaxle athax hünzome Jehudi nok tsün ma ahak-aluakya hia otsak ozong ahanle lax ngopu.

¹⁸Idaile pünkangsabu pak laxle awüt thomkya ningle tüikya khünakbu zongto hünzom tsaichong-kaxbongle taxtüi. Hünzom chemle ngamüi? Hünzom a pünkang tix changpu; hünzome otsing azünle thomkya münchang ikoxle otsinge mix hünzom azünle thompu.

¹⁹Ikoxle hünzome thüiüi: “Changle, ikoxlechu pünkangsabu ku nui zing angkya hanpakma pakle awütpu.”

²⁰Ija changtomtapu. Hwome chiongkya khoma hwom pakle awütpu, hünzome mongongkya khoma hünzom oting ma sütle ngopu. Ikoxlechu ija bama bong-chong le taxtex; itülüi zale mix zalax.

²¹Zange chix poma zaikya pünkang Jehudi khünakbu ngaxchu münshan; chixe hünzom ning shanüi le texdaicha?

²²Ikhama keme Zang chemle chiadu tsuakkya hex tamchu chemle chingchae awangkya hex ija ngün ang kople. Opang dütle ngoün laxpuix hwom füi chix münadutsuak, ikoxlechu hünzom chix chingcha ma jangngo thüiningle chixe hünzom to chingchaüi. Ikoxle hünzom chuwüi ile chitüi thüiningle punle awütüi.

²³Üntoxle Jehudi khünakbue, hwom mongchat laxle ongle janghüiba, amikya hwom nuiting ma tamchatle apüt angkya changle, chemthüikoxle Zange hwom omanman ma wüi tamchatle apüt ang thoüi.

²⁴Hünzom mixnokbu a pak daokya fao olip pünkang ningle changpu, ikoxle chix popo füi apüile, ija a küi-thwomle thomkya olip pün ma apütle thomkox wüi. Jehudi nok a ija küi-thwomle alai thomkya olip pün ningle changpu; ilaxle Zang zongma pakle thomdaokya pünkang ibu hopupa ma chatle amyen angkya wüi chwonpai changle.

²⁵Tüinaohom, hünzome tsingle naxlax laxsele ku mongto thütkya otsingtsing huxsa zangwün tuita tüile. Nang obukux hwontüi jezai mix hex, ija aju-ajang ang chifale kue nang tsyenle thomüi. Ija a ija changle: Israel khünaknu mongkhüikya othuithui hanpak ang münchang, ikoxle mixnok komle Zang hato mahüikya wawama ngoüi.

²⁶Ile Israel khünak pangnu khosün angkya a ija changle. Otsao Lai ma akax ngokya ningle: “Khosünpa Zaion tokhange nguiüi, ilaxle Jakop sixli angkya, chichang-chizang mwot awütüi.

²⁷Kue hwom ochax paokya zuma, kue hwom füi ija kaxtsao saxüi.”

²⁸Hwome Kaxho Müikya chilaxkya khoma, mixnokbu, hünzom khoma Jehudi khünakbu a Zang füi zan ang achangle. Ikoxlechu chixe zünle kopdaokya daile, putong hwom kuxmale hwom a chix zuikhui.

²⁹Chemthüikoxle chixe zünle kopkya hia mohimankya bama Zange chix mong münajüi.

³⁰Hünzom mixnokbu, ami ledaokya ma hünzome Zang kax ma chilax; ikoxle athax a Jehudi khünakbue kax ma chilaxle tüikya khoma hünzome Zang chingcha atakpu.

³¹Ija lailaile, hünzome atakkya chingcha khoma, Jehudi khünakbue Zang kax ma chilax, ija a athaxpi hwomechu Zang chingcha kop angkya hanpak changle.

³²Chemthüikoxle hwom pangnu hato wüi chixe chingcha aho angkya kuxma, Zange khünaknu nok wüi kax ma chilaxkya kople thomkyabu ang achangle.

³³Zang ahak-aluakya otukux chongkya hex! Chix hwon-je hia awan-atsingkya otukux zupuix! Chix künzut-mongjang bama owae hiktikle apua fa ang thoüi? Chix lomtangbu owae tsingle tsuaküi?

³⁴Otsao Lai kax ma tüikya ningle, “Zang mong thwon owae lop? chix owae zünthoüi?

³⁵Zange omün thomkya li koxdaokya, khünak athax kople owa tüi?”

³⁶Chemthüikoxle pangnu li chixe tix zingpu, ilaxle pangnu li chix ma tamchu chix hanpakma tix chimax homle ngopu. Fuazangkya a othuithuima Zang kux wüi naxchang! Amen.