Read Wancho Naga Rom 15 Bible Online

Rom 15 - Wancho Naga bible

Rom 15

¹Kem mongong ma zong tüikyabue shonaikyabu to hwom hünlix hün ang asun angkya changle. Keme alüile ma mong amüi ang münchang.

²Itülüi, kem pangnusae wüi, chix zongma naxmüi le, chix mongong ma zong tüikya khristan tuita ang zing ang matüi manao mong amüi angkya changle.

³Otsao Lai kax ma: “Hünzom adix-adale akaxkyabu thajao wünhai kax ku hato nguile”, le akaxkya ningle changüi chemthüikoxle Khrista-e alüile chix mong chiamüi.

⁴Otsao Lai kaxe fakya zongdün hia adukya makhange kem ang monghom tüi angkya bama, Otsao Lai ma chem zalaxpuix, pangnu wüi kem hama anwot-ano ang zapu.

⁵Ilaxle adu angkya hia zong adün angkya otong a owa changpuix, Zang chixe, Khrista ningle saxmok koxle ija mongtex tuita hünzom machu tüi ang naxfa;

⁶ile hünzom pangnusa notomle, dingdün tuita ma, Zang, kem Jowanpa Jisu Khrista Hopa achuak achen angkya hanpakma.

⁷Khrista-e hünzom pongle kopkya ningle, Zang fuazang angkya hanpakma hünzome tata wünpwonle pongle koplax.

⁸Chemthüikoxle putong hwom füikya Zang kaxtsao changle ngai angkya hanpakma, ilaxle chix chingcha khoma mixnokbuechu Zang achuak achen angkya bama,

⁹Zang a otsingtsing changle le aho angkya Khrista Jehudi nok ang achang. Otsao Lai kax ningle, “Idaile kue mixnokbu khato, nang ang münchong faüi; kue nang achuakle tsai ngaoüi.”

¹⁰Anaolechu ijae akaxle, “Mongmüikox mixnokbu, Zange zünle kopkyabu füi tomle!”

¹¹Chatlechu wüi thüile, “Jowanpa achuakkox, mixnokbu pangnue; Chix achuak kox, khünaknu noke!”

¹²Anaolechu Isaia-e thüi: “Jesse sixli nguiüi; mixnokbu apün ang chix nwonüi; hwome hwom monghom chix ma thomüi.”

¹³Hünzome chix to mongong tüikya tokhange, Zang, chix monghom otonge, mongmüi hia mongsom füi hünzom awangle naxfa.

¹⁴Kutüi kunaohom, awan-atsingkya pangnu ilaxle tata to anwot-ano ang tsuakle, müikya pangnue hünzom awangle tüile le ku monge ongkya tüile.

¹⁵Chemchu chipyen chizyen le kaxmik tuita bama ija lai makhange hünzom mongto texle atak lax ang koxpu. Ku mongchyen a Zange fakya osho khoma changpu,

¹⁶Ija a Jisu Khrista da tuita ningle mixnokbu khato mok angkya hanpakma changle. Otsao Chasa makhange, mixnokbu a Zange pongle koptsuak angkya kuxma tö tuita ang naxchang, Zang tokhange hüikya Kaxho Müikya apuk-apua angkya kue nguapa tuita ningle mokpu.

¹⁷Idaile Khrista füi notom laxle Zang bama kue mwottho thakya bama ku ngam ang tsuaküi.

¹⁸Otsao Chasa tsakzong makhange, münwan hia ohünotünbu tsakzong makhange, Khrista-e ku makhange mixnokbu Zang kax ma laxkya hato zunle apüi ang chem mokdao laxpuix, ija bama ku mongchongüi ilaxle zangwünüi.

¹⁹Idaile Jerusalem makhange Elirikam alople ahamkya bama lomjang fole, Khrista bama Kaxho Müikya komkaile apuk-apua daoa.

²⁰Khrista bama ojao ma-atatkya chaxwan to Kaxho Müikya apuk-apua angkya a othuithuima ku mongtex changkya, ija a owawae oting ma sütle kopdaokya khato chizing angkya hanpakma.

²¹Otsao Lai kax ningle: “Chix mo wünle mafakyabue ngünüi, ilaxle ma-atatkyabue awanle laxüi.”

²²Ija khoma ku hünzom hato ngui angkya obithomthom ma hexle abax.

²³Ikoxle athax a ituitui ma ku mwot ashuk daoa, ilaxle hünzom ngün ang nguise le obibi zangpua hexle mong ma sungle ngodaokya daile, athax a ile moküile ku monghompu.

²⁴Ku Spain to kaüi lomto kue hünzom ngünse le texpu, üntoxle onox ma hünzom waile mongzom müilaxle, ku Spain to ka ang hünzome ku to namfongbae le texpu.

²⁵Athax tomtata a Jowanpa khünakbu to fong ang ku Jerusalem to kaüi.

²⁶Chemthüikoxle Mesidonia hia Grik nok tokya müimüithombue Jerusalem angkya Jowanpa khünak chitüi chinangkyabu to amua le fong angkya zangwün tsuakkya tüile.

²⁷Ile mok angkya bama hwom lailaie wünle tsuakkya changle. Ikoxle otsing tomtata ma, chitüi chinang to fong angkya hwom ma thashe tüikya; Jehudi khünakbue mixnokbu füi chasa ma hwom ang tüikya mohiman ahanle lax, ilaxle mixnokbuechu Jehudi khünakbu to mwotkat mohiman makhange fong angkya olom jao changle.

²⁸Otue kue ija ku mwot ashuküi hex, ifüima hwom hanpakma saikya ngun komle hwom chak to kox füima ku Spain to ka ang laiüi üntoxle ikhato kaüi lom to kue hünzom waiüi.

²⁹Otue ku hünzom hato nguiüihex, Khrista mohimane awang laxle nguiüi le kue awanle.

³⁰Tüi-hi-naohom, kem Jowanpa Khrista ma tamchu Chasae fakya mongkün ma kue hünzom zongsaipu: Ku hanpakma zangjop ma mongkoxle ku füi tomhüi.

³¹Jehudi chaxwan angkya mongong matüikya khünakbu chak tokya ku azün hüile jop hüi, tamchu Jerusalem ma kue mok angkya mwot hwome pongle kop ang tsuak angkya lima chang ang laxkoxle jop hüi.

³²Zang mongtex jangchang thüiba, hünzom hato ku mongmüi atungle nguiüi, ilaxle hünzom waile nazak kop ang tsuaküi.

³³Zang, kem mongsom otong, hünzom pangnusa füi ngohüi! Amen.