Read Wancho Naga Rom 16 Bible Online

Rom 16 - Wancho Naga bible

Rom 16

¹Sankria müimüithom ma thothanu Fuibe a müikya mixcha tuita changle le kue hünzom hama apuase texpu.

²Zang khünakbue tata wünpwonle pongle kopkya müikya khristan zanglom tuita ningle, Khrista ma hünzome she wün pwonle pongkop hüi, ilaxle fong angkya oli pangnu lom towüi hünzome she to fongle changkox; chemthüikoxle she e khünaknu to fongle hüihudaoa ilaxle ku tochu wüi fonghu daoa.

³Khrista ma ku füikya thothanu nyi, Prisila hia Akuila nyi hato kue salam akatpu.

⁴Okhi a ku khose ang zilax maxlax le azongkya nyi changle. Okhi füi ku ang mong huanuma müipu; ku tata le chichang, mixnok müimuithom pangnusae wüi mongmüipu.

⁵Hwom hom ma asoxkya müimüithom angchu salam. Asia haxtok ma owang pa ma Khrista to mongongkya ku zuikhui Epaineta ang ku salam.

⁶Hünzom hanpakma azongle mokkya Meri ang salam.

⁷Ku füi tomle kople thomkya tomwüi Jehudi khünak, Andronika hia Junia nyi ang salam; wangshembu ningle hokhichu noke tsingwankya nyi ilaxle ku tho towüi khristan ang achangkya nyi changle.

⁸Jowanpa notom ma ku zuikhui Ampliata ang salam.

⁹Khrista thothakya ma kem üitho Urbana, ilaxle ku mongkün zuikhui Stakis nyi ang salam.

¹⁰Khrista hanpakma sikngün thwonlop daokya mix, Apolo ang salam. Aritobula homkha pangnu ang salam.

¹¹Jehudi khünak tomtom Herodion, ilaxle Narisa homkha angkya Khrista ma tüinaobu ang salam.

¹²Jowanpa mwottho ma sütkya Traifania hia Traifosa nyi, ilaxle ku zuikhui Parsi, owae Jowanpa hanpakma huanuma mwot mokdaopuix, hwom pangnu hato ku salam.

¹³Jowanpa ma atsingsho le chix thothapa Rufa hia honu, owae ku tochu sasün tukux jao akhex, hokhi hato ku salam akatpu.

¹⁴Asinkrita, Flegon, Ham, Patroba, Harma üntoxle hwom füi tomle tüikya khristan tüinaohom pangnu ang ku salam.

¹⁵Filologas hia Julia, Neru hona nyi, Olimpa hia hwom füi tomle tüikya Zang khünakbu pangnu ang ku salam.

¹⁶Khrista ma tüinao mongkün tunpong makhange tata füi salam kox. Khrista müimüithom pangnue wüi hünzom hato hwom salam akatle.

¹⁷Kutüi kunaohom, kue hünzom zongsaipu; ahak ahan angkya mix hia mongong ma khünaknu chikho asua ang kox angkya mix, owa hünzome pongle kopdaokya hwon-nwot zongto opüima tüipuix, ibu hanpakma mik-hingle ngolax; hwom füi atsaile ngolax.

¹⁸Iningle mokkyabue kem Jowanpa Jisu Khrista mwottho thakya münchang, ikoxle hwom wok hanpakma mokwüi. Hwome kaxmüi makhange tamchu tsaisong kaxnong makhange künlan-monglan ma ngokya khünakbu dyenle.

¹⁹Kaxho Müikya ma hünzom shingmongle tüikya pangnusae wüi atatle, ilaxle ija khoma hünzom hanpakma ku ang mong müihupu. Müikya olom tsingwan ang hünzom ma hwontüi jelang hüi, makya olom hanpakma olan ma tango. Ija a ku mongtex.

²⁰Zang, kem mongsom otonge, chwonle wüi bao chix chifa fangto nakdaoüi. Kem Jowanpa Jisu Khrista chingcha nang füi naxngo.

²¹Timothi, ku füi tomle thothapa; ilaxle ija ningle Jehudi khünak tomtom Lukia, Jason üntoxle Sosipata, hwomechu salam fale.

²²Ija laiza mix Tartia-echu hünzom ang Khrista mongkün salam fale.

²³Ku wünthong Gaia, owa hom ma müimüithom asoxpuix, chixechu hünzom hato salam fale; Erata, tingnu ma ngun twonpa, ilaxle kem tüinao Guata hwomechu hünzom ang hwom salam fale.

²⁴Kem Jowanpa Jisu Khrista chingcha hünzom pangnu füi ngohüi. Amen.

²⁵Zang ang fuazangkya koxhax! Khrista bama kue apukkya Kaxho Müikya ningle, üntoxle kaile pupa tsün tokhange wüi pyenle thomkya otsao otsingtsing ngaile ahokya ningle, chixe nang mongong ma shingmongle ajong ang koxtsuak le.

²⁶Ikoxle, athax a, ija otsingtsing a ajebu chakza makhange kotok to angai daoa; ilaxle noke ong angkya hia ija kax ma lax angkya kuxma, oshuk chitüikya Zang kaxtom makhange ija a nok chaxwan longkhoe awan ang koxdaoa.

²⁷Zang chix tata wüi, owa matix hwontüi jezai puix, chix a Khrista makhange oshuk chitüile fuazangkya naxchang kox! Amen.