Read Wancho Naga Rom 2 Bible Online

Rom 2 - Wancho Naga bible

Rom 2

¹O, nang ku zuikhui, nange mix bama kaxfün fapuix nyi? Nang tüta khünak wüi changlax, nang ang thailak müntüi chemthüikoxle nangechu kwom füi talailaile mokngo laxle otue nange mix bama kaxfün fapuix, nange nang alüile ahaipu.

²Ile mokngokyabu hanpakma chixe kaxfün fakya ma Zang münthaile keme awanpu.

³Ikoxle nang, ku zuikhui, nange kaxfün fakya khünakbu füi talailaile nange mok ngotüi! Nange nang kaxfün changlo chak tokya nang azang ang thoüile texlaxpia?

⁴Changle nange chix chingcha achongkya, adu thokya ilaxle monglokya, mongto kakle münlax.

⁵Nang ang na tüikya tokhange, Zang mongtsik hia otsao kaxfün ngaile ahokya nyix kop angkya nang sikngün mix sisile achenle.

⁶Chemthüikoxle Zange ma mwotmwot ma thütlaxle khünak nok ang wüi hingho faüi.

⁷Züizüi khünake mwot müikyakya wüi mokle ngole, ilaxle fuazangkya, üntoxle otuechu chizi chimax angkya tsün lomle; Zange hwom ang oshuk chitüikya tsün khüzün koxüi.

⁸Mamabu khünake, othai füito azui üima ma hanpak tata thütle üntoxle changkya mix a chilaxle awütle; Zange chix mongtsik hia mongma hwom ma khole koxüi.

⁹Chichang chizangkya mwot mokle ngokya khünakbu hanpakma zothup hia fuxtsüi kak tüiüi, Jehudi khünakbu hanpakmachu ilaxle mixnokbu hanpakmachu wüi.

¹⁰Ikoxlechu opange mwotmüi mokle tüilaxpuix, Zange hwom ang fuazangkya, achuak achenkya, ilaxle mongsom faüi; pongwang ma Jehudi khünakbu ang, ilaxle mixnokbu angchu wüi.

¹¹Chemthüikoxle Zange pangnusa ang wüi chifün tuita ma kaxfün fale.

¹²Mixnokbu ang Mosa wanlom müntüi; hwome ochax lyen ilaxle wanlom chilax homtoxle maxle. Jehudi khünakbu ang wanlom tüile; hwome ochax lyen ilaxle wanlom makhange hwom kaxfün fale.

¹³Idaile wanlom na ma atatkyae Zang thüntho ma khünak otsao ang achangüile münchang, ikoxle wanlom ma tüikya ningle mokkya mix tix sukya ang achangüi.

¹⁴Mixnokbu ang Mosa wanlom müntüi; ikoxlechu hwome ma tutex makhange wanlom ma tüikya ningle jangmok thüiba, Mosa wanlom chitüikoxlechu ibu hwom hanpakma wanlom changle.

¹⁵Hwom zanglom saikha makhange wanlom ma chemle tüipuix ija hwom mong ma zale thomkya ahole. Hwom khangka machu ija changkox a ahole, chemthüikoxle hwom mongjange tamtampong hwom khosele.

¹⁶Üntoxle kue apuk-apuakya Kaxho Müikya olom machu, Jisu Khrista makhange, khünak angkya huxsa mongjang bama Zange kaxfünkya nyixchu wanlom ma tüikya ningle mokkya mixtix sukya ang achangüi.

¹⁷Ajang anohu, nange nang Jehudi khünak changpu lea thüi; nang wanlom to onglaxle ngo ilaxle Zang bama tsaichong-kaxbongle chang;

¹⁸nange mokse lükya Zang mongtex nange awan, ilaxle changkyakya zünle lax angkya hanpakma wanlom makhange nange awanle lax;

¹⁹nang a miksutbu hanpakma lomwan-mix ilaxle zangnak to ngokyabu hanpakma wünnyan,

²⁰ongkya khünakbu hanpakma adangle fakya mix, üntoxle naohom hanpakma anwot-ano le fakya mix changpu le nang ma monghomkya tüi. Tsingwankya hia otsingtsing komle wanlom ma tüingoüna le nange laxle.

²¹Nange mix ang anwot-anole ikoxle nang ang alüile büthüikoxle anwot-ano le chichang ünlax? Nange “taxahux”, le zün ilaxle nange mix ahuxcha?

²²Nange thüitüi “Chinunchakkai taxtüi”, ikoxle nange mix chinunchakkaile hi? Nange chapabu mo amale wün, ikoxle nange zangshwom-hombu ahuxlehi?

²³Zang wanlom kop laxle nang kax chonghule ikoxle wanlom züntekya tokhange nange Zang ang zak akop pia?

²⁴Otsao Laikaxe thüile: “Hünzom Jehudi khünaknu khoma hexle mixnokbue Zang mün amale zangwünle.”

²⁵Nange wanlom jangto thüiba, nange khwonzüt zom zingkya ma lap tüile; ikoxle nange wanlom chito thüiba, nange khwonzüt zom mazingkya thatha.

²⁶Khwonzüt-Zom ma chiwomkya mix mixnok tuitae wanlom kax ma janglax thüikoxle, Zange chix khwonzüt zom zingdaokya thatha ma münlaxpia?

²⁷Zale thomkya wanlom koplaxle khwonzüt zom zingle wanlom amakya khoma, hwome tsangtsa khwonzüt zom chizing ikoxlechu wanlom kax ma laxle tüikya mixnokbue hünzom Jehudi khünakbu ajaoüi.

²⁸Idaile Jehudi khünak a otok sündün lanlan ma Jehudi khünak tsingtsing le münchang; ilailaile tsangtsa khwonzüt zom lanlan otsingtsing khwonzüt zom chichang.

²⁹Ikoxle zale thomkya wanlom makhange chichang homtoxle Zang Chasa mwot makhange owa mongtsang ma khwonzüt zom zingdao laxpuix, ija khünak tix mong ma otsingtsing Jehudi khünak changle. Ija khünake achuak achenkya Zang tokhange kople, khünak tokhange münchang.