Read Wancho Naga Rom 3 Bible Online

Rom 3 - Wancho Naga bible

Rom 3

¹Jangchangba, Jehudi khünakbu ang mixnok to nüikya tütüicha? Chichangba, khwonzüt zom zinglaxle ngokya ma lap tütüicha?

²Huanuma wüi, changjao changle, olom pangnusa ma wüi! Owang ole, Zange chix Otsao Lai kax (müile twon angkya hanpakma) Jehudi khünakbu ang koxle.

³Hwom züizüie chiong thüikoxchu chem; ile hwome chiongkya khoma Zang müntüile hia?

⁴Ile otuechu münchang! Khünak nok wüi atse koxlechu, Zang a otsingtsing ma wüi ngo angkya changle. Otsao Lai Kax ma tüikya ningle, “Nange zangwün ma otsingtsing, changle le aho angkya changle; Tse atwonkya zangwün ma, nange wüi lüt angkya changle.”

⁵Ikoxle keme thaile mokkyae Zange ojao chithaile mokkya khünaknue atsingsho le ngün ang jang ahoba keme chemle thüiüi? Kem ang sikngün fapong ma Zang ang thaile mokle le thüiüi hia? (Kue khünak zangwün ma wünpu).

⁶Ile jao münchangüi! Zang jangthai dao thüiba, chixe khünaknüsa ang kaxfün chemle faüi?

⁷Ilaxle ku atsekyae Zang fuazangkya süchongle achenle jang ahoba? Jangchang thüiba ku büthüikoxle athaxchu wüi ochax khünak tuita le ahai thompu?

⁸Jangchangba: “Keme pi müikya naxlai ang oma mwot mokhax”, le büthüikoxle chithüi? Changle, züitae ija kaxfa akaxkya füi ku ma kaxhux fedaoa! Hwom a ahai haxkux ma ahaiüi.

⁹Jangchang thüiba, kem Jehudi khünakbu chifün mixnokbu füi oli tuita ma ngaxchu müicha hex? Tütama ngaxchu münmüi! Jehudi khünakbu ilaxle mixnokbu pangnusa wüi talailaile ochax zonge womle tüile le kue thoto wüi ahodaoa.

¹⁰Otsao Lai kax ma tüikya ningle: “Tsaothakya mix tuitachu müntüi, awan atsing mix chichangba, Zang lomkya mix tuitachu müntüi. Khünak pangnu Zang füi janüna; hwom pangnu wüi othai to leüna; müikya mwot owaechu münmok, tuitaechu münmok.

¹³Hwom wikha a zuk-kha ningle; huxtsing-loptsang zangwün komkaile hwom leza ma lai; mikmüt zangwün, puje jaojaole, hwom tun ma dong;

¹⁴thuakzom khaxkyae hwom tunza awangle.

¹⁵Mix to chak mok janlang ang hwom mom; hwom alele to thama tingtui adün. Hwome mongsom lomnu chitsing,

¹⁸tamchu Zang thua za angkya awanle chilax.”

¹⁹Owaechu ma khosele zangwün angkya chitüi angkya ilaxle chaxwannu bakle Zang kaxfün hato apüi angkya hanpakma, wanlom ma atüitüi komle wanlom fangma ngokyabu pangnu hanpakma akaxkya changle le athax keme awan ang kople.

²⁰Chemthüikoxle wanlome alomlom mokkya tokhange khünak owachu Zang füi muamüi angkya le münchang; wanlom mwot a khünak hama chixe achax daokya ochax apuale kox angkya changle.

²¹Ikoxle athax a Zange khünak chix füi muamüi angkya olom a ngaile ahodaoa, ilaxle ija ma wanlom füi saxmok angkya chemchu müntüi. Wanlom üntoxle ajebue ija to hwom kaxkhi fale changkox a le thüile!

²²Hwome Jisu Khrista to mongongkya tokhange Zange khünak chix füi mua amüi ang koxle. Zange ija Khrista to ongkya pangnusa hanpakma mokle, chemthüikoxle ikhama malili le chemchu müntüi!

²³Pangnusae wüi ochax lyendaoa ilaxle khosün angkya Zang füi ochuto wüi.

²⁴Ikoxchu kem dan-pankya Khrista Jisu makhange amuale fakya Zang chingchae hwom pangnu wüi chix füi mua amüile.

²⁵Chix to ongkya hwom mongong makhange, chix zikyae khünaknu ang ochax thailak atak angkya olom ang naxchangle Zange chix komkaile kox. Chix otsao aho angkya hanpakma Zange ija ile mok. Ledaokya wan ma a chix adule ngo üntoxle khünaknu ochax bama zax chihunle hulanle hu;

²⁶ikoxle athax pongea, chix otsao aho angkya hanpakma, chixe khünak ochax bama khünzule hu.

²⁷Jangchangba, kem mongngam angkya ikoxle chem tüi? Chemchu müntüi! Chemthüikoxle Zang füi kem muamüikya a wanlom tokya tokhange chichangle keme chix to mongongkya makhange changle.

²⁸Idaile keme ile ashukpu: khünak tuita Zang füi muamüikya a wanlom ma tüikya tokya makhange chichangle mongong makhange tix changle.

²⁹Chichangba Zang a Jehudi nok tata hanpakma Zang hia? Mixnokbu hanpakma chix a Zang münchangle hia? Cheme chichang haxkux!

³⁰Zang a tuita wüi, ilaxle Jehudi khünak hia mixnok pangnu wüi, Jisu Khrista tokya hwom mongong makhange tix Zange hwom chix füi muamüi ang koxüi.

³¹“Hwome Jisu Khrista to mongongkya makhange Zange khünaknu chix füi muamüi ang koxle”, le thüikoxle keme wanlom kax ma chilaxle ahaikya kax chang laxcha? Ile ojao münchang; itülüi, oting ma sütle keme wanlom fün mix amongpu.