Read Wancho Naga Rom 4 Bible Online

Rom 4 - Wancho Naga bible

Rom 4

¹Müi-hi-aji ma kem putong Abraham bama keme chemle akaxüi? Chixe chem apongle hüidaopu?

²Chixe mokkya mwote chix Zang füi muamüikya jangchangba, chix ang tsaichong-kaxbong angkya lita thüichu tüise. Ikoxlechu Zang thüntho ma chix tsaichong-kaxbong ang chitho.

³Otsao Lai-e thüile: “Abrahame Zang to mongong, ilaxle ija khoma Zange chix otsao khünak le pongle lax.”

⁴Mwot mokkya mix ang hingchak mün koxle; chix hingchak mün a hingho tuita le chichangle, chixe achak laxle kopkya le lax.

⁵Ikoxle mwot chichang homtoxle khünak tuitae ma mongong tüi, owae achaxkya mix ochax ojao chitüikya ang achangle ngaikya Zang to ong, chix hanpakma Zange chix füi muamüi ang e ma laxle tokya olom a chix mongong changle.

⁶Mwot chie homle, Zange atsaole pongle kopkyabu mongmüi bama Dawid-e akaxkya a ija changle:

⁷“Opang thaikya Zange thailak koxdaopuix, ilaxle opang ochaxbu to chwop daopuix, mongmüi angkya a hwom changle.

⁸Zange owa ochax e le chithom laxpuix, mongmüi angkya mix a chix changle!”

⁹Dawid-e akaxkya ija mongmüi khwonzüt zom ma womkyabu hanpak tata hia? Münchang. Ija a khwonzüt zom ma chiwomkyabu hanpakchu changle. Chemthüikoxle keme Otsao Lai kax ma atat daoa: “Abrahame Zang to mongong, ilaxle chix mongong khoma Zange chix otsao khünak le pongle lax.”

¹⁰Ija chemtue chang? Abrahame Khwonzüt-Zom kai füima hia makaiba? Ikoxle ija zom kai füima chichangle makaiba wüi.

¹¹Chix khwonzüt zom a chixe Zang to mongongkya khoma, chixe khwon mazüt tanto wüi, Zange chix otsao khünak le laxkya münwan aho ang zingpu, idaile chixe khwonzütkya a ofüito tix changle.

¹²Chix a khwonzüt daokyabu hanpakma hopa tuitachu changle, hwome khwonzüt zom tokya khomale münchang, ikoxle chixe ija khwonzüt matwon tanto wüi kem apa Abraham tsün mongong ma ngokya ningle hwomchu wüi mongong ma ngokya khoma changle.

¹³Zange Abraham hia chixsu chixsabu ang, zangfang hwom kux ang achangüile tsaosax. Ija tsaosüt fakya a, Abrahame wanlom kax ma laxkya khomale münchang, ikoxle chixe Zang to mongong ilaxle Zange chix a otsao khünak tuita le laxkya khoma changle.

¹⁴Chemthüikoxle Zang kaxtsao wanlom kax ma laxle ngokyabu ang tata kox angkya jangchang thüikoxle, khünake mongongkya ma lap chemchu müntüi üntoxle Zang kaxtsao chem angchu münchang.

¹⁵Wanlome Zang ang mongma apüile; ikoxle ojong khato wanlom chitüi puix, ikhato wanlom kax ma laxkyachu müntüi.

¹⁶Wanlom kax ma laxkyabu tata ang chichangle, Abraham ningle Zang to mongongkyabu angchu wüi, Zang kaxtsao a Abraham susabu pangnu ang wüi koxtsingtsingkya chingcha chang angkya kuxma, Zang kaxtsao a mongong ma athongle, chemthüikoxle Abraham a kem noknusa zongma chasa ma hopa tuita changle.

¹⁷Otsao Lai kax ma akaxkya ningle: “Kue nang chaxwannu hopa ang zingpu.” Idaile, Zang owae zidaokya chatle azang ang kox üntoxle owa kaxtom ma chitüi jaokya oli laile tüi ang koxle changkya Zang owa to Abrahame ongpuix, ija Zang miksho ma kaxtsao a sule ngünle.

¹⁸Monghom angkya chitüi khato, Abrahame mongong ilaxle monghom, ikoxle chix noknusa hopa ang achang. Otsao Lai kax ma tüikya ningle: “Nangsu nangsabu ibukuxle tsaüi.”

¹⁹Chix a zangpua hota nguihax khakha; Sarah ma süshix naosom tüi ang chitsuak angkya atsingshokya chichang thüiba omang bütukux zatnaile ngoünkya chix tsangtsa, ibu ajangkyae chix mongong asho ang chitom.

²⁰Chixe mongongle wüi ngo, ilaxle chixe Zang kaxtsao to mongaokya chitüi; chix mongonge chix ang tsakzong kox, ilaxle chixe Zang achuak.

²¹Zange tsao daokya kaxtsao tütakoxchu chixe moktsuaküi le Pol-e chix füi alüile akax.

²²Ija khoma Abraham a, mongong makhange Zange chix a atsaole lax.

²³“Chix atsaole lax”, le thüikya kaxhuakbu chix huak tata bama zakya chichang.

²⁴Jowanpa Jisu Khrista zidaokya chatle azünkya Zang to ongkyabu opang atsaole laxüihex, kem pangnu hanpak ang ibu zakya changle.

²⁵Kem ochaxbu khoma chix zi ang kox, üntoxle Zang füi kem mua amüi ang chix chatle azün.