Read Wancho Naga Rom 5 Bible Online

Rom 5 - Wancho Naga bible

Rom 5

¹Athax a mongong makhange kem Zang füi muamüikyae, Jowanpa Jisu Khrista makhange kem ang Zang füi mongsom tüile.

²Keme Jisu Khrista to mongonkya tokhange, oja Zang chingcha athax keme koplaxle ngopuix, ija hato chixe kem ahüile. Idaile Zang fuazangkya süntswon angkya to monghom laxle kem ang mong huanuma müipu!

³Ilaxle sikngün pongmachu kwom mongmüipu, chemthüikoxle sikngünkyae adu angkya olom sümüile awan ang tsuakpu;

⁴adukyae Zang zongto sukya apüile, ilaxle chix zongto sukyae mongkün alaile.

⁵Ija monghome kem ang mong münatho, chemthüikoxle Zange chix hingho Otsao Chasa makhange chix mongkün kem kün-mong ma thokle koxdaoa.

⁶Chemthüikoxle fongmix chitüile kem maxle ngoponge, Zange tyakya tuthüt ma, ochax khünakbu hanpakma Khrista zi.

⁷Otsao khünak tuita hanpakma owawa zi angkya a mwottsak tuita. Ikoxle tuita mixmüi hanpakma zi ang owawae mongtsu koxlax.

⁸Ikoxle kem to itukux künle lükya Zang mongkün chixe kem hama ahodao; ija a kem ochax ma wüi ngotanto Khrista kem hanpakma zikya changle.

⁹Chix zikya makhange, athax, kem Zang füi mua amüile fakya jangchang thüiba ija süthak Zang mongtsik chak tokya chixe kem azünüi.

¹⁰Kem a Zang zongto zanbu changkya, ikoxle Hosa zikya makhange kem chix zuikhui ang zingpu. Athax a kem Zang füi zuikhui changle, ilaxle Khrista ozün ma ngokoxle chixe kem khosün angkya atsingsho!

¹¹Chatlechu ibu to bole; kem Zang füi zuikhui ang achangkya Jowanpa Jisu Khrista ma Zange kem ang mong amüile.

¹²Khünak tuita makhange chaxwannu hato ochax hüi, üntoxle chix ochaxe ija füi tomle zikya apüi. Ile changkyae khünak nüjen pangnu khato wüi zik tsale pao, chemthüikoxle khünak noke wüi ochax lyen.

¹³Wanlom koxüi thoto wüi chaxwannu ma ochax tüikya; ikoxle wanlom chitüikya khato, ochaxbu akiakle chithom.

¹⁴Ikoxlechu Adam din tokhange Mosa din kople zike khünaknu pangnu thakma apün. Adam ningle Zang kax tele ochax chilyenkyabu to ngaxchu wüi apün. Adam a hüiüi tüikya mix ocha ahokya tuita changkya.

¹⁵Ikoxlechu hokhi a tuita le münchang, chemthüikoxle amuale koxkya Zang hingho a Adam ochax ningle chichang. Ija mixsün tuita ochax khoma hexle khünaknu tüle zimaxünkya otsingtsing changle. Ikoxle Zang chingcha a onüi chongkya changle, üntoxle khünak tuita, Jisu Khrista chingcha makhange khünaknu hanpakma Zange amuale fakya chingchachu ija lailaile changpu.

¹⁶Üntoxle Zange amuamua le koxkya hingho hia khünak tuita ochax nyi a taningkya münchang. Chemthüikoxle Adam-e achaxkya füima Zange hwom hato chix chingcha ahole; athax hünzom ma thaikya müntüi.

¹⁷Khünak tuita ochax makhange, chix khokho ma hexle zikyae apün ang sütkya otsingtsing changle. Ikoxle mixhuak tuita, Khrista-e mokkya otok to otukux chongkya laipuix! Okhonguikya Zang chingcha ilaxle amuale fakya chix otsao hingho opange kop laxpuix, hwome Khrista ma tsakzong le ozün ma ngo ang kopüi.

¹⁸Ile tix mixhuak tuita ochax tokhange khünak pangwüi thajaokya ningle, ija lailaile mixhuak tuita otsao mwote khünaknu pangnu dan-panle ilaxle hwom ang khüzün tsün koxle.

¹⁹Üntoxle mixhuak tuitae kax ma chilaxkya khoma khünakbu huanuma ochaxbu ang achangkya ningle, ija lailaile mixhuak tuitae kax ma laxkya khoma khünaknu huanuma Zang füi muamüi ang tomüi.

²⁰Thaikya mwot atsat ang wanlom zingpu; ikoxlechu ojongto ochax lwonle hüi, ifüi sütsexle Zang chingcha tsa le hüi.

²¹Ile tix, ochaxe zikya füi chemle apünpuix, ilailaile Jisu Khrista makhange kem oshuk chitüikya tsün khüzün lom ma zunlaxle Zang chingchae otsao füi apün angkya changle.