Read Wancho Naga Rom 6 Bible Online

Rom 6 - Wancho Naga bible

Rom 6

¹Jangchang thüiba keme chemle thüiüi? Zang chingcha naxtsa le kem ochax ma wüi ngoüi hia?

²Ile otuechu münchangüi! Kem ochax ma zidaoa: ikoxle ija ma wüi kem chemle ngole hüiüi?

³Ija a hünzom pangnue awan ngokya tuita: Otue Jisu Khrista füi notom le kem bapti puix, kem a chix zikya füichu notomle baptikya changpu.

⁴Ifüima, kem baptikyae, kem chix füi tomle akhün ilaxle chix zik ma womle. Ija a, Hopa fuazangkya tsakzong makhange Jisu Khrista zidaokya chatle azangle zokya ningle, kemchu tsün ozün ma ngo ang kop angkya hanpakma changle.

⁵Chemthüikoxle chix zikya ningle kem zik ma chix füi tuita ang jang achang, ija lailaile chix zokya ningle tamchatle zo ang koxkya zumachu kem chix füi tuita ang achangüi.

⁶Ilaxle ija keme awanle: Kem ochax da ang achangle chingo angkya hanpakma, tsangtsa ma tüikya ochax zong amüt ang, kem tsün-zang Khrista füi tomle chix pünsak ma langdaoa.

⁷Chemthüikoxle khünak tuita zikya zuma chix ochax zonge womle tüikya danle.

⁸Kem Khrista füi tomle jangzi thüiba, keme chix füi tomle ozün ma ngo angchu ataküile ongpu.

⁹Chemthüikoxle keme awanpu Khrista a zidaokya chatle azünkya changle ilaxle chix chatle tamzi angkya münchang, zikya zonge athax chix to münlüt tsuaküi.

¹⁰Chix zikya zik a, tam fangma nok hanpakma, ochax kuxmale zi; ikoxle athax chix ozün ma ngokya a Zang kuxma.

¹¹Ija lailaile Khrista füi notom laxle hünzomechu ma hanpakma alüile, zikya a ochax kuxma ikoxle azangle ngokya a Zang kuxmale ajang angkya changle.

¹²Nang müi-hi-aji mongzaoe asingkya kax ma nange laxkya lima, ziün angkya hünzom kün-mong ma ochaxe apün-awang ang kox angkya oli münchang.

¹³Ichichangba, chichangchizang mwot to thap ang nang tsangtsa ojongkhachu taxdan. Itülüi, omang khatokya ozün hato apüidaokya khünakbu ningle, hünzom tsün Zang ang laxkox, ilaxle nang tsün komkaile otsao mwot ma twon ang dankox.

¹⁴Ochax-e nang to apün ang jao taxkox; wanlom fangma chichangle Zang chingcha fangma ngohüi.

¹⁵Ikoxle chem? Zang chingcha fangma ngowüi, wanlom fangma ngokya chichang khato le keme ochax lyenüi hia? Ile otuechu münchang!

¹⁶Hünzome ma alüile da ang owawa chak to otue danüi hex, nange owa kax ma laxle ngopuix, nang a chix da jaojao ang achangpu: oja khoma zi angkya laipuix; ija ochax dawüi changlax chichangba Zang füi muamüi ang koxkya, Zang kax ma laxkya da ang wüi changlax.

¹⁷Ikoxlechu Zang ang münchong fahax! Chemthüikoxle hanpak tuita ma hünzom ochax dabu changkya; ikoxle hünzome pongle kopkya hwon-nwot ma bangkya otsingtsing kax ma hünzome kün-mong tokhange bakle lax.

¹⁸Hünzom a ochax tokya dan ilaxle otsao da ang achang.

¹⁹Hünzom müi-hi-aji ma zong chitüikya khoma kue khünak zangwün ma wünpu. Tam a chichang-chizangkya mwot hanpakma hünzome chitsaokya hia chichang-chizangkya chak to da ang hünzome ma abakle koxle thomkya. Ija lailaile athax a otsao mwotbu hanpakma hünzome ma abakle otsao ang kox angkya changle.

²⁰Hünzom ochax da ang ngopongma, otsao angkya hünzom danle thomkya.

²¹Athax chempang khoma hünzom azakle ngopuix ijabue hünzom ang lap chemchu münfa. Iningkyabu mwot mokkyae khünak zi ang koxle!

²²Ikoxle athax a hünzom ochax tokya dandaoa ilaxle Zang dabu ang achangüna; ija khülüix to hünzome mongzom müikya atakle ilaxle oshuk ma oshuk chitüikya tsün khüzün ataküi.

²³Chemthüikoxle ochax omün a zikya changle; ikoxle Zange amuale fakya hingho a Jowanpa Jisu Khrista füikya notom ma oshuk chitüikya tsün khüzün changle.