Read Wancho Naga Rom 8 Bible Online

Rom 8 - Wancho Naga bible

Rom 8

¹Idaile athax a Khrista ma ngokyabu hanpakma thaile le thüi angkya müntüi.

²Chemthüikoxle Chasa wanlom ojae Khrista ma kem hato khüzün apüipuix, ijae ochax hia zikmüt-mangkho chak tokya ku dandaoa.

³Khünak müi-hi-aji shonaikya khoma, wanlome chitsuakkya Zange mok ang tsuakle. Chix Hosa owa khünak müi-hi-aji tsün ningle achang ilaxle ochax hanpakma zom ang kox ang ajo puix, chixe khünak müi-hi-aji ma tüikya ochax münsule ajao.

⁴Khünak müi-hi-aji olom ma chichang homle Chasa mongtex ma ngokya lima wanlome jukya otsao mongtex ma sha angkya hanpakma Zange ija ile mok.

⁵Ma tsangtsa kax ma laxle opang ngolaxpuix, hwom mongkha a müi-hi-ajie saxse laxsele tsukyae akumathumle tüile. Opang tsün Otsao Chasa kax ma laxle ngopuix, hwom khangka a Chasa mongtsukyae akumathumle tüile.

⁶Hünzom khangka müi-hi-ajie apün laxle ngokyae zi angkya laiüi; hünzom khangka Chasae apünle ngokyae ozün ma hia mongsom ma ngo angkya laiüi.

⁷Idaile khünak tuita khangka müi-hi-ajie apünkya tokhange chix Zang zongto zan ang achangle; chemthüikoxle chixe Zang wanlom kax ma chilax, ilaxlechu ija kax ma laxtsuak angkya münchang.

⁸Ma tsangtsa kax ma laxkyabue Zang mong amüi ang müntho.

⁹Ikoxle otsing tomtata ma Zang Chasa nang ma jangngo thüiba, nang ma müi-hi-aji kax ma laxle münngoüi; ikoxle chasae chemle akaxpuix ija kax ma laxle nang ngoüi.

¹⁰Ikoxlechu Khrista nang ma jangngo thüikoxle, ochax khoma nang tsangtsa zi angkya changkoxlechu, nang Zang füi muamüi daokya daile nang tsün a chasa ma ozün changpu.

¹¹Zang Chasa, owae Jisu chatle azang ang koxpuix, chix nang ma jangngo thüikoxle, chix Chasa nang ma ngo ang koxkya tokhange, owae zidaokya Khrista chatle azünpuix, chixe ziün angkya nang tsangtsa angchu tsün khüzün koxüi.

¹²Idaile kutüi-kunaohom, kem a thashe füikyabu changle, ikoxlechu tix kem müi-hi-aji mongtex ma ngo angkya münchang.

¹³Chemthüikoxle hünzom müi-hi-aji mongtex ma jangngo thüiba, hünzom zi angkya laiüi; ikoxlechu chasa makhange hünzome hünzom ochax mwot janglang, hünzom ozün ma ngoüi.

¹⁴Opang Zang Chasae zunle tüilaxpuix hwom a Zang susabu changle.

¹⁵Chemthüikoxle Zange hünzom ang koxkya Chasae hünzom da ang münachang ilaxle hünzom zazyen angchu müntom; itülüi, ija Chasae hünzom Zangsu Zangsabu ang achangle, tamchu ija Chasa zong füi keme Zang ang “Apa! Ku Apa!”, le nyakle akhongle.

¹⁶Kem Zangsu Zangsabu le aho ang kem chasa füi Zang Chasa, chix jao athutle.

¹⁷Kem chixsu chixsabu daile, chix khünaknu hanpakma chixe thomkya mohiman keme kopüi, ilaxlechu Khrista füi tomle Zange chix hanpakma thomkyachu wüi keme kopüi; chemthüikoxle keme chix sikngün ahanle janglaxba, chix fuazangchu wüi ahanle laxüi.

¹⁸Iponge kem sikngünle ngokya a athax füichi ma kem hato angaile aho angkya fuazang füi ojao apyen angkya münchangle keme ele.

¹⁹Zang chakzing pangnue wüi Zange Hosa angaile ahokya ngün ang mong ma sungle tanle ngole.

²⁰Chemthüikoxle Zang chakzing a, küntsu monglua male chichangle, ikoxle Zang mongtsu laxle, tüta tha angchu chichang le ahai. Ikoxlechu ija mongsom tüikya,

²¹Ija a: nyixta a Zang chakzing pangnu wüi da ang ngokya hia shanle maxkya dantoxüi ilaxle Zangsu Zangsabu fuazang süntswonüi.

²²Chemthüikoxle athax kopkya bama Zang chakzing pangnu wüi naongün pongma sikngün le akhongkya ningle sikngün laxle akhong ngokya keme awanle.

²³Ikoxlechu Zang chakzing tata le münchang; kem opange pongwang angkya Zang hingho ningle Otsao Chasa koplaxle tüipuix, Zange kem chix susabu ang achang angkya ilaxle kem ozün abakle dan angkya tanle ngopongma kemechu kem mongsik ngünle akhongle.

²⁴Chemthüikoxle kem khosünkya a monghom makhange; ikoxlechu keme monghom jangngün dao thüiba, ija a monghom tsingtsing münchang. Chemthüikoxle ma mike ngün ang kopkya to owae monghom tüi?

²⁵Ikoxlechu keme ngün ang chikopkya to monghomkya jangchang thüiba, keme ija hanpakma adule tan angkya changle.

²⁶Ija ningle kem shonaikya to fong ang Chasa kem hato nguile. Chemthüikoxle zangjop chemle jopüihexle keme chiawan; ilaxle kax ma ngai ang chithokyabu Chasae akhongle chixe alüile kem hanpakma zangjople.

²⁷Üntoxle Zang, owae khünak mongtsang to hulaxpuix, chixe Chasa tutex awanle lax; chemthüikoxle Zang mongtex füi ashemkhak le chix khünaknu hanpakma Chasae Zang ma chingcha ju.

²⁸Chix to mongkünkyabu, kem opang Zange chix mwot mok ang ahyenpuix, hwom füi Zange omüi hanpak paktikle mwot mokkya keme awanle.

²⁹Tüi-hi-naohom khama Zang Hosa puxkya owang ang achang angkya bama, Zange opang kamle kopdao laxpuix, tamchu chix Hosa ningle achang ang süile danle.

³⁰Idaile Zange, chixe süile dandaokyabu nyakle; ilaxle chixe opang nyak laxpuix, chix füi muamüi ang tomle; ilaxle opang chix füi muamüi ang koxpuix, hwom füi chixe chix fuazangchu wüi tomhanle.

³¹Jangchangba ibu zangwün bama keme chemle thüiüi? Kem hanpakma Zang jangtüi thüiba, kem zan to ka angkya owa tamtüi?

³²Chixe Hosa tomtata ngaxchu chitui le kem ang kox! Chix Hosa ngaxchu kox: chixe mamabu tomning komkaile münfa pia?

³³Zang, chixe ngaxchu münthaile thüi! Ikoxle chixe kamle kopkyabu ma thaile le huxfe angkya mix owa tüi?

³⁴Jisu Khrista zikya changpu, ikoxle anaole zolaxle athax chix Zang tsaxchi ma thungle tüile. Chixe kem hanpakma Zang ma chingcha jule ngole. Ingale kem ma owawae oma huxfe ang tsuaküi lea?

³⁵Jangchang thüiba, Khrista mongkün füi kem owae ajan tsuak angkya? Sikngün tuitai, thang dangkya, zothupkya, chichangba woknuak tilan, otui onuak, thomzün maklax, zikya thama, iningkyabue ajan ang thoüi hia?

³⁶Otsao Lai ma tüikya ningle, “Hünzom kuxma nyixtungta, zik thomzün ma kwom ngole; lang ang paokya chun to hwonpupu, kwom to ile hwonle.”

³⁷Changle, ibu pangnu ma kem to mongkünkya chix makhange keme anaokya tüile.

³⁸Chemthüikoxle chix mongkün füi kem tütaechu ajan ang münthole kue ongtomtale; zike wüi changlax, ochax-ozane wüi changlax, kaxtaimixbue wüi changlax, mama ding ma apünkya tsakzongbue wüi changlax, ipongkhae wüi changlax chichangba athax füichi mawüi changlax,

³⁹thak tokya zangfange wüi changlax chichangba fang tokya zangfange wüi changlax: Jisu Khrista ma kem kux ang ngokya Zang mongkün füi kem ajan ang tho angkya Zang chakzing khama athax kople chemchu matüi.