Read Wancho Naga Rom 9 Bible Online

Rom 9 - Wancho Naga bible

Rom 9

¹Kue chem akaxpuix ija a otsing tomtata changle; Ku Khrista kux changle ilaxle ku münatse. Otsao Chasae awang laxle ngokya ku khangkaechu münatse lüwüi thüile.

²Kue ma khünaknu bama, ku müi-hi-aji bama ku mong ma kakkya otukux chong ilaxle tamchiashuk toxle tüipuix!

³Hwom hanpakma ku a Zang thuakzom fangma ngo tamchu Khrista füi atsaile changkoxchu chem münchangle kue texpu.

⁴Hwom a Zange zünle kopkya khünaknu changle; chixe hwom chixsu chixsabu ang achang ilaxle chix fuazangkya hwom füi tom-han, chixe hwom füi tsaosax ilaxle wanlom kox; changle, chix shwom angkya olom Zange hwom hama aho; hwome Zang kaxtsaobu kop;

⁵hwom a putong makhange hüikyabu changle, ilaxle khünak tuita ningle Khrista chuwüi hwom züjen angkya changle. Pangnu thakma apün-awangkya Zang jento achuakkox! Amen.

⁶Israel khünak pangnu wüi Zange zünle kopkyabu chichangkya khoma; kue Zang kaxtsao thaiüna le thüi angkya münchang.

⁷Ilaxle Abraham sixli pangnu wüi Haxsu-Zangsasa wüile münchang. Zange Abraham ang thüi: “Isak sixli tix nang sixli le eüi.”

⁸Thüikoxle naosombu khünak poma puxkyabua Zangsu Zangsabu münchang; itülüi, Zang kaxtsao makhange puxpaikya naosombu tix otsingtsing sixli le eüi.

⁹Chemthüikoxle ibibi kaxfa füitix Zange tsaosaxle: “Tunu-wansa nguikya zuma ku tamchatle nguiüi ilaxle Sarah-e sasün tuita ngünüi.”

¹⁰Ilaxle itata le münchang, chemthüikoxle kem putong Isak a Rebika sasün nyi hanpakmachu hopa changle.

¹¹Tuita wüi kamle kopkya olom ma Jowanpa chix chaktung otya ma naxngolax ang, Zange she ang thüi: “Hotüi mixe honao thothaüi.”

¹²Chixe ija hwom mapux tanto wüi, hwome omüi hia oma mwot chemchu mamokba wüi akax; idaile Zange zünle kopkya a chixe ahyenle laxkya chichangba nyakkya füifüi changle, hwome mokkya hwom mwot füifüile münchang.

¹³Otsao Lai kax ma tüikya ningle, “Kue Jakop to mongkünle, ikoxle ku Esau thua anule.”

¹⁴Athaxpi keme chemle thüiüi? Zange süisüichaple mokle le thüiüi hia? Ile otuechu münchang!

¹⁵Chemthüikoxle chixe Mosa ang thüi: “Ku monge atsutsu to kue chingchaüi, ku monge atsutsu to kue jajaüi.”

¹⁶Ikhoma khünak mongtex hia mokkya mwot füifüile münchang ikoxle Zang chingcha füifüile changüi.

¹⁷Chemthüikoxle Otsao Lai-e Farao füi ile akax: “Chaxwan pangnu khato wüi ku mün tsing ang kox angkya hia ku tsakzong aho angkya olom ma nang twon angkya zongma le khütkhaxkya ku tuthüt ija khoma kue nang wanghom ang zingpu.”

¹⁸Idaile chixe chingchase le texkya mix to Zange chingchale, ilaxle chixe mong akhüi ang koxse lükya mix ang chixe mong khüi ang koxle.

¹⁹Hünzom owawae ku ang thüiüi: “Ile jangchang thüiningle Zange khünak ma thaikya kha büthüi ang atak ngo? Zang mongtex owae abax tsuaküi?”

²⁰Ku zuikhui, Zang kax to anongle lan angkya mix nang a owa changlax? “Nange ku ile büthüikoxle zingpu?”, le hax tikkuxe jaopupa füi münakax.

²¹Tikjaomix-e haxthom chix mongtextex ma twon ang tsuaküi; ilaxle tuita a ija-o lükya pongma twon ang ilaxle ata a jansu ma twon angle haxthom dwonta makhange wüi tik mali-mali anyi jaole chix mongtsutsu ma zing ang tsuaküi.

²²Zange mokkyachu ija lailaile changpu. Chixe chix mongtsik aho ilaxle ma tsakzong awan ang koxse thüt. Amüt ang achwonle thomkya chix mongtsik pebu füi adu angkya chix monglo.

²³Kem opang chix fuazangkya kop angkya hanpakma chixe achwon, kem chix mohiman pe ang thokle koxkya chix fuazangkyachu wüi chixe ngaile ahose le tex.

²⁴Chemthüikoxle Jehudi khünakbu kha angkya tata chichangle mixnokbu kha angkyachu wüi chixe nyakle kopkya kem changle.

²⁵Ija a Hosea ma chixe akax ngokya kax changle, “Ku khünaknu chichangkyabu ang, kue ‘ku khünakbu’ le nyaküi. Kue mong chikünkya chaxwan ang, kue ‘Ku mongkün’ le nyaküi.

²⁶‘Hünzom a ku khünaknu münchang’ le kue hwom füi akaxkya kax khama wüi; kue hwom ang Khüzün Zang susabu le nyaküi.”

²⁷Ilaxle Israel khünaknu hanpakma khuapu: “Israel khünaknu fa angkya saktsang büta tüibachu, hwom kha angkya hidaole wüi azangüi;

²⁸Chemthüikoxle Jowanpa-e janta bama ilaxle tamfang ma wüi zangfang angkya khünaknu kaxfünüi.”

²⁹Ija a amiba wüi Isaia-e akax daokya ningle, “Khüthak Zange kem oli chitox thüikoxle, kem a Sodom ningle achangünse, kem a Gomorah ningle changdaose.”

³⁰Ikoxle keme chemle thüi? Ija mixnokbu Zang füi muamüi ang chiazong, ikoxlechu hwome chix to mongongkya khoma Zang, chixe hwom füi muamüi;

³¹Ikoxle wanlom tokya makhange Zang füi muamüi ang wanlom lomkya Israel khünakbue a ija atak ang chitho.

³²Hwome ija büthüikoxle chiatak? Chemthüikoxle hwome chem mokpuix ija a mongong ma chichang homle mokkya mwot ma afün laxle mok. “Chikho asua angkya long” ma hwom chikho asuale lax.

³³Ija bama Otsao Lai ma akax ngokya a ija: “Hulax, Zaion ma kue long tuita danpu, ijae khünaknu chikho asua ang koxüi, Ija longnu tuitae hwom so ang koxüi. Ikoxlechu chix to mongongkyabu, mong münatho.”