Read Wancho Naga 1 Korin 10 Bible Online

1 Korin 10 - Wancho Naga bible

1 Korin 10

¹Kutüi kunaohom, Mosa füito azuikya kem pupa hwom zangfwom zangkhung fang to ngokya, ilaxle tinu akaile azangle ta,

²ilaxle zangfwom hia tinu khato Mosa ma hwom bapti lax, ija kax hünzom mongto namkopbae le kue texkya changa.

³Hwome pangnue wüi talailaikya chasa süt sax,

⁴ilaxle taningkya ti ling; chemthüikoxle hwome, hwom füifüi to azuikya Otsao Chasa long angkya ti ling; ilaxle ija long a Khrista chix tomtata changkya.

⁵Ibachu hwom sülui tukux füi Zang mong chimüi; idaile hwom mangbu faokha to chiakle asam.

⁶Hwom ningle ochax lom to mongtsukya chitüi angkya hanpakma ibu a kem khünli angkya zangwünbu changpu.

⁷Hwom züita ningle chapa to shwomkya mix ang taxachang; ija zale tüikya ningle: “Khünaknu sax-hi-ling ang thung ilaxle azüi ang laoxle zo.”

⁸Hwom züizüie ochax lom to hwom kün-mong kox, ilaxle hajat tsübün azom nyixtakya fangma zi. Ibu ningle kem chichangüi.

⁹Hwom züizüie Zang to thwontsing, ilaxle hwom pu chak ma max; ija ningle keme Jowanpa thwontsing le chichangüi.

¹⁰Hwom züizüie hwom mongma ahole za-aman üntoxle hwom langkya kaxtaimix chak to max; kem a ile chichangüi.

¹¹Mix hato aho angkya hanpakma hwom füi ile chang, ilaxle oshuk tsün ma ngole asukya kem naxli naxkhün ang ibu kem thoma zale bangpu.

¹²Idaile owae ma shingmongle ajongle ngole le texlaxpuix, chidüt angkya kuxma khünli lax.

¹³Nok hato chihüikya thwontsing nang tata hato ahuakle tüma hüi. Zang to mongao angkya müntüi, ilaxle nang ma tüikya zong tok to tsakkya thwontsing chixe otuechu hüi ang münfa, ikoxle nang to thwonle anokya zuma, chixe nang ang adu tsuak angkya zong faüi, ilaxle paole azang angkya olom daple koxüi.

¹⁴Idaile kue mongkünkya zuikhuibu, chapabu shwomkya füi atsaile ngolax.

¹⁵Kue jetüi hwonlangkyabu ningle akaxpu; ija ku kax bama nange azut ajang tsuaklax.

¹⁶Jowanpa fongsüt ma keme twonkya wansa oja hanpakma keme Zang ang münchong fapuix; ija angkya keme lingkya zuma, keme Khrista aji ma süntswonpu. Ilaxle keme ashikkya an; otue keme ija saxpuix, keme Khrista tsangtsa ma süntswonpu.

¹⁷An tüta wüi changle, kem pangnusae ija ashik-ahanpu, iningle kem obiobi ikoxlechu tompo tuita.

¹⁸Müi-hi-aji chikao ma Israel khünaknu to hunolax; opange tö koxkya saxpuix, ija a hwome tö koxkya ma Zang thothakya süntswon changpu.

¹⁹Ija ku kax a, chapa chichangba ija ang koxkya süt lita thakho nguile le thüikya kax changdaicha?

²⁰Münchang! Kue a, tö oja songsaribue koxpuix, hwome Zang ang koxkya münchang ikoxle bao ang koxpu, le thüiwüi. Idaile hünzom baobu füi üitho ang achang angkya to kue münlua.

²¹Hünzome Jowanpa wansa tamchu bao wansa le anyi ling ang müntho angkya changle. Hünzom Jowanpa tsap ma anaolechu bao tsap ma othom anyi ma süntswon angkya müntüi.

²²Chichangba keme Jowanpa ma nüfux tüi ang koxsele hia? Chix füi kem wüi sütsak süzongpu le texpia?

²³Pangnu li mok ang tsuaküi, ikoxle pangnu li ma lap tüi angkya le münchang. Pangnu li mok ang tsuaküi, ikoxle pangnu lie wüi fün amüiüi le münchang.

²⁴Owaechu mafün müikyakya to taxhu, ikoxle tomzi fün müikya to hukox.

²⁵Ma mongto aokya tokhange kax atwonle chingo homle hat ma hangkya müi saxkox.

²⁶Chemthüikoxle chaxwannu üntoxle ima atüitüi komle Jowanpa kux changle.

²⁷Songsari khünak owawae nang fongsax ang jangse thüiba ilaxle pao ang nang mongto texle jangchang daoba, nang mongto aokya tokhange kax atüile chingole, nang ang chem fexle fapuix ija saxkox.

²⁸Ikoxle ija chapa ang tökya ma koxdaokya changpu le nang hama owawae apuale jangchang daoba, ija apuale fakya mix tuitex laxle, tamchu mongao khoma,

²⁹thüikoxle ija mixsün mongao khoma nange ija süt taxsax. Changle, owawae thüikoxlax: “Tütalichu moktsuak angkya ma ang tüikya mongtex pankya mix mongao khoma hexle chem ziatsyen ngo angkya tüipu?.”

³⁰Ma süt hanpakma kue Zang ang münchong fakoxle, kue Zang ang münchong fakya süt khoma hexle owawae ku tha ajao angkya chemtüi?

³¹Idaile, nang saxkya ma wüi changlax chichangba lingkya ma wüi changlax, nange chem moklaxpuix, tütalichu Zang fuazang angkya hanpakma mokkox.

³²Jehudi nok wüi changlax chichangba mixnok wüi changlax chichangba Zang müimüithom wüi changlax, owawa angchu tingtui chiadün le ngolax.

³³Hwom khosün angkya kuxma, ma zongma müikya chithüt homle, ikoxle nok zongma müikya thütlaxle, ku mwottho ma kue nok mong wüi amüipu; ile kue mokkya ningle moklax.