Read Wancho Naga 1 Korin 11 Bible Online

1 Korin 11 - Wancho Naga bible

1 Korin 11

¹Kue chemle Khrista thüi anopuix, ilailaile hünzomechu kuthüi anolax.

²Othuithuima ku texle atakkya üntoxle kue hünzom ang fakya hwon-nwot olom tole ngokya khoma kue hünzom achuakpu.

³Ikoxle ibibi zangwün olom hünzom pangnue wüi awan kopkoxle müiüile kue mongto thütkya a: Khünak zongma okhang Khrista changle, kakonu zongma okhang a kakopa changle, ilaxle Khrista zongma okhang a Zang changle.

⁴Mixwün owae khang akholaxle noknu zangshwom nui to zangjop ilaxle Zang kax apuk-apuale changüihex, chixe ma khang thüikoxle Khrista tha ajaopu,

⁵ikoxle mixcha owae ma khang chiakho homtoxle noknu zangshwom nui to zangjop üntoxle Zang kax apuk-apuale changüihex, she-e ma okhang thüikoxle kakopa tha ajaopu; khang onglaxle ngokya mixcha hokhi tuitata wüi.

⁶Chemthüikoxle sheko tuita khang chiakho le jangchangba, she-e kho ongle awütkox; ikoxle sheko tuita zongma khang ongle awüt angkya a thünzak ang jangchang thünba, she-e khang akho ang laxkox.

⁷Lüka tuitae khang akho angkya mwot münchang, chemthüikoxle chix a Zang chakzing changle. Ikoxle sheko tuitae lükapa füi azakkya ocha ahole;

⁸chemthüikoxle lüka a sheko tuita makhange zingkya münchang ikoxle sheko mix lüka makhange zingpu.

⁹Ilaxlechu lüka a sheko kuxmale zingkya münchang, ikoxle sheko a lüka hanpakmale zingpu.

¹⁰Ile haxshix chasa to lüt angkya bama, she kakopa zangfang ma ngokya aho ang, sheko tuitae khang akho angkya changle.

¹¹Ikoxlechu Jowanpa ma kem tsün a sheko a lüka zangfang ma ngopu, ilaxle lükachu wüi sheko ziamong ma ngopu, opupuchu tata zünkai to ngokya münchang.

¹²Chemle sheko a lüka makhange zinglaxpuix, ija ningle lüka a sheko makhange puxpaipu; üntoxle pangnu ozün ma ngo ang tomkya a Zang changle.

¹³Sheko tuitae noknu zangshwom nui to khang chiakho homle zangjop angkya olom chichang hia changpuix hünzom lualua to wünle tsuaklax.

¹⁴Chemthüikoxle lükae kho panle thomkya chix wünhai le,

¹⁵ikoxle sheko zongma kho alwotle thomkya she sünmüi tuita changpu le jaopoe ngaxchu apuale. Chemthüikoxle she kho a khang to o angkya hanpakma koxle thompu.

¹⁶Shekobue khang akho angkya zangwün bama owawae ku kax ija changbasu le jangtex thüikoxle kue akax angkya ibibi wüi kwomechu ilaxle Zang müimüithomechu Zang shwom pongma twon angkya changkox a le thüi angkya mama olom müntüi.

¹⁷Ibu zünkax-saikax fakya zuma kue hünzom münachuak, chemthüikoxle hünzom zangshwom ang asox ngokyae omüi füi oma wüi süchongle mokle.

¹⁸Pongwang ma, kue atat ang kopkya a, hünzom tu asoxkya zuma tata füi mongtex apüikya tokhange mathom-mathomle zingle tüile, ilaxle ija zangwün to süifi süitex kux otsingtsing changpu le kue ongkya tüile.

¹⁹(Chem mongaoüi, otsingtsing ma sukyabu atsingsho le ngaile aho ang hünzom ile ahak ahan angkya jao changle).

²⁰Hünzome tu asoxkya zuma saxkya a Jowanpa fongsüt münchang.

²¹Chemthüikoxle hünzome fong saxkya zuma, tata chitan homle saxlaxle, ikhoma züita a woknuak ma ikoxle mamabua toktok ngale le changle.

²²Chem! Saxling angkya hünzom ang mahom mapung müntüi hia? Chichangba hünzome zangshwomkya ada üntoxle chitüi chinangkyabu ang thünzak kox angle ile hwonpia? Kue hünzom füi chemle akaxüi? Ija khoma kue hünzom achuak angcha? Münchang, otuechu kue hünzom münachuak.

²³Kue hünzom hato taile apuk-apuakya a kue Zang tokhange kopkya kax changle. Ija a ile: Jowanpa Jisu-e chix dyenkya ja ankhao tuita lax,

²⁴üntoxle chixe münchong fa laxle chixe ija ashik, ilaxle thüi: “Ija a hünzom hanpakma ashixkya ku tsangtsa changle. Ku texle atak angkya hanpakma ile moklax.”

²⁵Ilailaile, fongsax füima wansa kop ilaxle thüi: “Ija a ku aji ma Zang füi hozün Tsaotsüt changpu. Hünzome ija otukux lingpuix itukux ku texle atak angkya hanpakma moklax.”

²⁶Ile thüikoxle, hünzome ija an sax üntoxle wansa angkya lingkya dang to chix mangui nguiba Jowanpa zikya apuk-apuapu.

²⁷Idaile nguiwangle chitüi khato owawae Jowanpa an hia wansa saxling le otue changüihex, chix Jowanpa tsangtsa hia aji zongto thaikya ang achangüi.

²⁸Idaile noke wüi pongwangma ma thwon shongtsing koplax, ilaxletix an sax ilaxle wansa angkya linglax.

²⁹Chemthüikoxle an saxle hia wansa angkya lingle changpongma chixe Jowanpa tsangtsa hanpak tsingle chikop jangthüiba, chixe ija saxling le changkya tokhange ma hato alüile shoma ahyenle laxle.

³⁰Ija khoma hünzom shonaile hia kakle max ngokyabu tüile, ilaxle züizüi a zibaküna.

³¹Ikoxle keme mathwon müile tsingle jangchang daoba, Jowanpa-e shoma khato uakya khato kem münhak.

³²Ikoxle chaxwannu füi tomle kem shoma khato chiua angkya kuxma Jowanpa-e ku kaxfün ilaxle zunle.

³³Ikhoma, kutüi-kunaohom, otue hünzom Jowanpa fongsax ang asoxüihex, tata atankox.

³⁴Owawa ang wok anole jangchangba, hünzom asoxkya zuma Jowanpa-e oma to uakya khato hakkya lima chitüi angkya kuxma, chixe mahom to fongsaxle kopkox. Mama zangwün bama ku tamchatle nguikya zuma tix wünle tsuakhax.