Read Wancho Naga 1 Korin 12 Bible Online

1 Korin 12 - Wancho Naga bible

1 Korin 12

¹Athax hünzome zakya Otsao Chasa ba angkya tsaikax bama, kue hünzom hama otsingtsing chiwün homle ngose müntex.

²Hünzom songsari ang ngotanto ozün ma ngax chitüikya chapa shwomkya ochei lom to hünzom paole asam thomkya hünzome awan ngopu.

³Zang Chasae zunlaxle ahamkya mix owaechu “Jisu thomün-mwonün”, le münthüi tsuak ilaxle Otsao Chasae lom chizunkya mix owaechu “Jisu a Jowanpa changpu”, le ngai ang müntsuak. Ija hünzome awan kopkoxle müi angkya oli changpu.

⁴Hinghobu malom-malom tüihupu, ikoxlechu ibu pangnu Chasa tuitatae wüi fapu.

⁵Thotha angkya olom-olom tüihupu, ikoxlechu Jowanpa tuita thothapu.

⁶Mok angkya olom-olom tüihupu, ikoxlechu ibu pangnu li hanpakma mok angkya zong a Zang tuitae wüi fapu.

⁷Nok füi müi angkya hanpakma mixhuak pangnu ang wüi Chasa mwottho mali-mali angaile aho ang koxle.

⁸Chasae mixhuak tuita ang je-hwone awang angkya kaxho koxle, ilaxle ata mixsün ang ija chasasae wüi tsingwankyae awangkya kaxho koxle.

⁹Ija chasa tuitatae wüi tuita ang mongong hingho koxle, ilaxle mama mix ang kak amüi angkya hingho koxle.

¹⁰Ija Chasa tuitatae wüi mixhuak tuita ang ohünotün mwot mok angkya zong koxle, mama mix ang Zang Kaxho bama akax angkya hingho koxle; ilaxle ata mix ang Zang Chasa tokhange hüikya hia mamachi tokhange hüikya oba süile aho tsuak angkya hingho koxle. Tuita ang chitsingkya kax ma zangwün angkya zong koxle, ilaxle ata mix ang a ija zangwün taile fa angkya zong koxle.

¹¹Ibu pangnusa Chasa tuitata makhange wüi mokkya changpu. Chix küntsu monglua ma chixe mixhuak ang mahinghoho koxle.

¹²Khrista a omik ochak mafanfan füikya tompo tuita changpu; ile malomlom ocha-ochakbu füi zingle tüikoxlechu ija tompo tuita wüi changle.

¹³Ija lailaile, kem pangnusa, Jehudi nok wüi changlax chichangba mixnok wüi changlax, tuita Chasa makhange tompo tuita ma bapti laxkyakya wüi changpu; ilaxle kem pangnusa ang wüi tuita Chasa ti ling ang koxle.

¹⁴Chemthüikoxle tompo tuita omik ochak tuita füi zingkya münchang ikoxle malom lom füi zingpu.

¹⁵Cha-e “Ku chak chichang khato, idaile ku tompo ma müntüi”, le jangthüi: ija khomale chix tompo ang chichang homle münngo.

¹⁶Üntoxle nae “Ku mik chichang khato, idaile ku tompo ma müntüi”. Le jangthüi: ikhoma hexle chix tompo ang chichang le münngo.

¹⁷Tompo bakle mik-mik wüi hex thüikoxle, ijae chemle atatse? Üntoxle tompo bakle na-na wüi hex thüikoxle ijae chemle atum se?

¹⁸Ikoxlechu chix mongto thütkya ningle Zange tompo ma omik ochak malom-malom zingle alaipu.

¹⁹Tsangtsa ma olom tuita wüihex thüikoxle tompo chitüise!

²⁰Ikoxlechu tüikya ningle, tompo tuita ma omik ochak malom-malom tüile.

²¹Idaile mike chak ang “Nang chitüipuix tüipuix”, le münthüi tsuak. Iningle khangechu cha ang “Nang chitüipuix tüipuix”, le thüi ang müntsuak.

²²Itülüi thüikox tompo angkya “Chem mwot to thap ang”, le wünhai le hukya omik ochak tuita chilax homtoxle keme chem mwot müntho;

²³Üntoxle omik ochak khama chem mwot to thap angle texkya jongkha changle keme süchongle apu-achang angkya a; ilaxle osün müile koto ngün ang koxkya füi ataxle keme aza-apua thomkya a osün amakya pyenle thomkya kha changle.

²⁴Tsangtsa ma süichapkya chitüile omik ochak pangnue wüi tomwüi tata tuitex le tüi angkya kuxma,

²⁵chem mwot to münthappu le tüikya omik ochak tuita to süchongle apu-achang angkya lima Zange tsangtsa athut apongle zingkya changle.

²⁶Tuita sik jangngün thüikoxle omik ochak pangwüi sik tomwüi ngünüi; tuita achuak achenle jangchang thüichu pangnu ang tomwüi mongmüi.

²⁷Athax hünzom pangnu wüi Khrista tompo, ilaxle ija ma mixhuak a omik ochak tupong changpu.

²⁸Müimüithom ma Zange chifün tankya a: Pongwang angkya chifün ma wangshembu, anyi lükya ma ajebu, azom lükya ma anwot-anokyabu, ifüima ohünotün mwot mokkyabu, ifüima kaklak amüikyabu, mix to fongtsox angkyabu, apün-awang angkyabu, chitsingkya kax ma zangwünkyabu.

²⁹Hwom pangnu wüi wangshemshem wüi chichangba ajeje wüi chichangba anwot-ano angkyabubu wüile chichang.

³⁰Ohünotün mwot mok angkya chichangba kaklak amüi angkya chichangba chitsingkya kax ma zangwün angkya chichangba chem akaxpuix ija taile apua angkya zong nok ma tüipule chichang.

³¹Ikoxle ataxkya hingho kop ang nang mong ma ashingkya tüilax. Mongkün shingmong angkya a, füichi angkya olom tokoxle bangüi.