Read Wancho Naga 1 Korin 15 Bible Online

1 Korin 15 - Wancho Naga bible

1 Korin 15

¹Oja hünzome pongle kop ilaxle oja ma hünzom mongong shingmongle ajongle ngopuix, kue hünzom hato apukkya Kaxho Müikya ija bama, tüinaohom, kue hünzom hama tamchatle wünse texpu.

²Hünzome ija Kaxho Müikya to mongle khexkya khoma hünzom azangle ngopu. Chichang thüikoxba hünzome mongongkya muato maxse.

³Kue kopkya, okhüzax ang laxlaxle kue hünzom hato taile fakya a: Otsao Lai ma zale tüikya ningle, Khrista kem ochax khoma zipu;

⁴Otsao Lai ma zale tüikya ningle chix akhün füima nyix azom lükya to chatle azangle zopu;

⁵chix Pitar hato üntoxlechu wangshem bün anyi pangnu hato ngaile ahopu.

⁶Ifüima chix noxta bama, chix füito azuile hüikya ho-aga füi süluikya khünaknu hato laile ahopu. Hwom kha angkya züizüi zikoxlechu süchong tukux athaxchu ozün ma tüile.

⁷Ifüima chix Jakop hato lai, ilaxlechu wangshembu pangnu hato laile aho.

⁸Oshukma chix, hanpak manguiba puxkya nao ningle tüikoxchu, ku hato laile aho.

⁹Ku a wangshembu khama oshuk oza tix changlax a, ilaxle kue Zang müimüithom zothup daokya khoma, ku ang wangshem le nyak koxlechu chiasu.

¹⁰Ikoxlechu Zang chingcha tokhange anyix ku wangshem tuita ang achangle ngopu, ilaxle chixe ku ang fakya chingcha mwot ma chithaple chichang. Itülüi thüikox, ku tatae mokle lea münchang, Zang chingchae ku füi tomle mokpu, ikoxlechu wangshem mamabu füi kue wüi azongle mokpu.

¹¹Kue wüi changlax chichangba hwome wüi changlax, kwome apuk-apuakya a ija ilaxle hünzome pongle kopkyachu ija wüi changle.

¹²Athax, Khrista chatle azangle zo ang koxle le kwom kaxho, jangchang thüiba hünzom khama züizüie zidaokya chatle azangle münzo le büthüikoxle akax ang tho?

¹³ija kax otsing jangchangba, Khrista chatle azangle münzo le changa nyi?

¹⁴Üntoxle Khrista chatle azangle zokya chichang thüiba, kwome apuk-apua angkya chemchu müntüi ilaxle hünzome pongle kopkyachu chem müntüi.

¹⁵Tamtailechu Zang bama kwom atsekya ang changüi, chemthüikoxle Zange Khrista chatle azangle zo ang tomle le kwome akaxdaoa. Idaile zidaokya chatle azangle zokya chitüiangba, Khrista chatle azangle zokya kaxwa changa.

¹⁶Chemthüikoxle zidaokyabu chatle azangle chizoangba, Khrista chuwüi chatle azangle münzodao changa.

¹⁷Khrista chatle azangle chiazwot thüikoxle, hünzom mongong a oba to ilaxle athaxchu hünzom ochax ma wüi tüia.

¹⁸Ilaxle Khrista ma zidaokya mongong mixbuchu samkya changa.

¹⁹Ozün ma ngotanto fünmüi angkya tata bama keme Khrista to monghomkya jangchang thüiba, chaxwan ma chingcha ashukkyabu a kem changa.

²⁰Ikoxle otsingtsing a ija changle: Khrista zidaokya chatle azangle zokya changle, idaile zipu le shuile ngokyabuchu azangle zo angkya jao changle.

²¹Mixhuak tuita makhange zi angkya chemle hüipuix, ilailaile mixhuak tuita makhange zidaokya chatle azangle zo angkyachu wüi hüiüi.

²²Chemthüikoxle Adam ma pangnu zipu, ilailaile Khrista ma zidaokya pangnu wüi chatle azangle zo ang koxüi.

²³Ikoxlechu pangnu wüi olom ma leüi; Pongwang ma Khrista; ifüima chix nguikya zuma, chix to ongkyabu pangnu.

²⁴Ifüima oshuk nguile hüiüi; Khrista-e apünle ngokya chasabu, pünpa-chongwangbu ilaxle tsakzong pangnu to anaoüi, ilaxle Zange Wangting Hopa chak to danüi.

²⁵Chemthüikoxle Zange zan pangnu to anaolaxle chix chifa fangma mathom tanto Khrista-e apün angkya changle.

²⁶Anao angkya akiakya zan a zik changle.

²⁷Chemthüikoxle Otsao Lai-e akaxle: “Zange pangnu li chix cha fangma thom.” Ikoxlechu “Pangnuli”, le thüikya kaxhuak ma Zang münwom, chemthüikoxle pangnuli Khrista fangma thomkya a chix changle.

²⁸Otue Zange pangnu li Khrista-e apünkya fangma thomüihex, ile pangnuli chix fangma thom ang koxkya Zang fangma Khrista-e chixchu wüi thomüi, ilaxle Zange pangnu thakma apünüi.

²⁹Athax, zikya mün ma baptikyabu a büle? Hwome chemkha lünüi le monghom? Züizüie akaxkya ningle, zidaokyabu tamchatle azangle münzo, le thüikya kax otsingtsing jangchang thüiba, zikya mix mün ma bapti laxkyabu ang lap chem tüi?

³⁰Zidaokya chatle azangle chizoangba, ojento kwome thomzün maklax ang chemto among ngoüi?

³¹Kutüi kunaohom, kue zik nyixfole apongle! Jowanpa Jisu Khrista ma kem khüzün tuita ang achangkya tokhange, hünzom bama ku mongngamkyae ija angaile ahopu.

³²Ifüima fao müi füi ahokkya bütukuxle ku müi-hi-aji mongtex ma azankya jangchang thüiba, ku ang lap chemtüi? Zidaokya chatle azangle zokya chitüi angkya jangchangba, oman, saxhax linghax; ngainyix a kem ziünüi.

³³Nang mixe dyen ang taxtom. “Üitho chimüikyae, zanglom müikyabu tsün amaüi.”

³⁴Nang tutex changkya hato chatlax, ilaxle chatle ochax tam taxmok. Kue hünzom zak akople ngaipu, hünzom khama Zang chitüikya mix züizüi tüile.

³⁵Owawae atwonüi “Zidaokya chatle chemle azangle zoüi? Hwom tsangtsa chemningle changüi?.”

³⁶Nang ongat! Nange hax ma küikya otsang tuita, ija mazi tanto otuechu münnyemüi.

³⁷Ilaxle nange küikya a nyem daokya opün küikya chichang, ikoxle tsaxtsang wüi changlax chichangba mama tütali tsang wüi changlax, otsang zaza küiwüi.

³⁸Chix chatsu monglua ma Zange ija otsang ma hopupa fapu ilaxle majat-majat otsang ma mapopo fapu.

³⁹Ilaxle ozün ma ngokya müi nok angwüi mapumpum fapu; khünak ang chixlili pum, müi ang chixlili pum, ilaxle nyax ang chixlili pum.

⁴⁰Ilaxle ding angkya pumbu hia chaxwan angkya pumbu le tüipu; ding angkya pumbu sün müikya chaxwannu angkya pumbu sün müikya füi chixlili.

⁴¹Zanghan sün chixlili to müi, lyetnu sün chixlili to müi, ilaxle lyettsibu sünchu hwom lomlom to müi; üntoxle lyettsibu khama ngaxchu osün malili to müikyabu tüihupu.

⁴²Zidaokya chatle azangle zo ningle ile chang angkya changle. Otue pum tuita hax ma akhünpuix, ija a zile shanün angkya; otue ija zo ang koxüihex, ija a tuita tamchu chizi chimax angkya changle.

⁴³Otue akhünpuix, ija a osün makya tamchu shonaikya changpu; otue chatle zoüihex, ija osün müikya üntoxle tsakzong füikya changüi.

⁴⁴Akhünkya a müi-hi-aji pum; otue zoüihex, ija a chasa pum tuita ang changüi. Müi-hi-aji pum tüikya daile, chasa pumchu wüi tüi angkya changle.

⁴⁵Chemthüikoxle Otsao Lai-e thüile: “Pongwang angkya Adam a ozün ma ngokya tuita ang zingle alai; ikoxle oshuk angkya Adam a khüzün koxkya chasa tsün tuita ang changle”.

⁴⁶Ikoxle owange hüikya a chasa tsün münchang ikoxle müi-hi-aji tsün changle, ifüima tix chasa tsün.

⁴⁷Pongwang angkya Adam a, hax makhange zingkya, haxwannu angkya; anyi lükya Adam a zangkangting tokya.

⁴⁸Haxwannu kux ang achangle ngokyabu a haxwannu makhange zingkya mix tuita ningle; zangkangting kux ang achangle ngokyabu a zangkangting tokhange nguikya mix tuita ningle changle.

⁴⁹Keme chemle haxwan makhange zingkya sünjo laxpuix, ija ningle keme zangkangting tokya nguikya khünak tuita sünjochu lax angkya changle.

⁵⁰Tüinaohom, ku kax ija a ile changle: Oja müi-hi-aji makhange zingle tüipuix, ijae Zang Wangting ma süntswon angkya müntüi, oja zile maxün angkya hex ija a chizi chimax angkya koplaxle ngo ang müntho.

⁵¹Ija huxsa zangwün to otsing ma natha hüi: Kem pangnu wüi zi angkya le münchang, ikoxle oshuk nyazong mütkya zuma, mik ajepkya tukux momle,

⁵²lebama wüi kem pangnu lüiüi. Chemthüikoxle nyazong mütle angaokya zuma, chatle tam chizi angkya hanpakma, zidaokyabu chatle azangle zo ang koxüi, ilaxle kem pangnu wüi lüiüi.

⁵³Chemthüikoxle oja zi-max angkya hex ija chizi chimax angkya ang lüi angkya changle; oja maxsam angkya hex ija a chimax chisam angkya ang lüi angkya changle.

⁵⁴Idaile otue ija changüihex, ilaxle zi-max angkya chizi chimax angkya ang otue lüiüihex, izuma Otsao Lai kax ija changle ngaile hüiüi: “Zikya oli thudaoa; anaokya ashukdaoa!”

⁵⁵“Zik, nange anaokya ojong to tüi? Zik, nange thama angkya ojong to tüi?.”

⁵⁶Zike makkha angkya zong ochax angkya kople, üntoxle ochaxe ma zong wanlom angkya kople.

⁵⁷Ikoxlechu Khrista Jisu makhange kem ang lütkya koxkya Zang ang münchong fakox.

⁵⁸Idaile, kutüi-kunaohom, shingmongle ajonglax ilaxle zaxhun ma ahamkox. Jowanpa mwottho ma nange mokkya chemlichu muato münmax le nange awan angkya daile, Jowanpa hanpakma chak ojao chingaile mwot mokkox.