Read Wancho Naga 1 Korin 2 Bible Online

1 Korin 2 - Wancho Naga bible

1 Korin 2

¹Tüinaohom, ku hünzom hato Zang jojüi apukle hüikya zuma, tsaichong-kaxbong hia kue tsingwankyabu kax chemchu chiakax.

²Ipue ku hünzom füi ngopongma, Jisu Khrista üntoxle tamnüilechu chix pünsak ma zikya boma mama pangnu alakle awüt angkya ku mongto texdaoa.

³Idaile ku hünzom füi tüipongma ku shonaile hia zakyae pangnu kha abünle süt,

⁴ilaxle ku hwon-nwot hia kaxho a tsainox-kaxnua tole hia khünake je-hwon makhange fakya chichang, ikoxle changpu le laxtsuak angkya hia Zang Chasa makhange fapu.

⁵Idaile nang mongong chifün a khünak je-hwon münchang ikoxle Zang tsakzong changle.

⁶Bachutix chasa ma tsün atyadaokyabu hato kue je-hwon kaxho apukpu. Ikoxlechu otam amütdao angkya athax pongkyabu din-pan tamchu ma apün-awangkyabu je-hwon bama münchang.

⁷Ikoxlechu kue apukkya a khünak hato chiaho le pyen thomkya ikoxlechu ijae kem fuazang angkya hexo le chaxwannu mazing tanto wüi Zange tsuakle thomdaokya Zang je-hwon bama changpu.

⁸Ija chaxwannu ma apün-awangkya opupuechu ija je-hwon chitsing. Hwome ija tsingkoxba fuazangkya Jowanpa takle chilangse.

⁹Ikoxlechu tix zale thomkya tüikya ningle, “Oja mike chingün tsuak, nae chiatat tsuak; Zange chix to künkyabu hanpakma, achwon thomkya; opupu mong tochu, ajangle lax ang chitho.”

¹⁰Ikoxlechu Zange kem hato chix Chasa makhange ngaile aho. Chemthüikoxle zukya Zang tutex to lünle Chasae pangnu lomle.

¹¹Khünake chix bama pangnu awankya a chix ma tüikya chix Chasa makhange tix changpu; ija lailaile opaktikle Zang thwonlop angkya a chix Chasa etix changle.

¹²Athax Zange kem ang koxle thomkya hinghobu tsingle lax angkya hanpakma keme Chasa Zang tokhange koppu, ija chaxwannu angkya münchang.

¹³Idaile Chasa tüikyabu hama Chasa otsingtsing kaxtai ang, kwome khünak je-hwone anwot-anokya ningle akaxpu.

¹⁴Chasa chitüikya khünake Zang Chasa hingho münkop, ibu chix zongma ongat changle, ilaxle chixe ibu tsingle lax ang müntho, chemthüikoxle ibu a Zang Chasa otsao chikao makhange tix azut ajangle lax angkya changle.

¹⁵Chasa tüikya mixe pangnuli kaxfün ang thoüi, ikoxlechu chix kaxfün ang owaechu müntho.

¹⁶Otsao Lai-e akaxle, “Zang mongthwon owae lopdao? Chix a owae zünthoüi?” Ibachu, kem ma Khrista mongjang tüile.