Read Wancho Naga 1 Korin 3 Bible Online

1 Korin 3 - Wancho Naga bible

1 Korin 3

¹Changle, kutüi-kunaohom, Chasa füikya khünakbu füi zangwünkya ningle kue hünzom füi akax ang müntsuak; hünzom füi kue Khrista ma naosom füi hia chaxwannu khünakbu füi wünkya ningle akax angkya laile.

²Kue hünzom tsomti füi tuxpu, saxzan füi münchang; chemthüikoxle hünzome ija sax ang matho; athax kople hünzom ija saxtsuak tang machang,

³chemthüikoxle athax kople hünzom chaxwannu khünak ngwot ma ngotan changle. Ongai hünzome tata to atsak akhu puix ilaxle atsi-alaxpuix, ijae hünzom chaxwannu chifün ma ngolaxle zangjang khünak ningle müi-hi-aji ma tüile le ahokya münchang hexnyi?

⁴Otue hünzom khama owawae: “Kupi Pol füikya changpu” ilaxle mama mixe: “Kupi Apolo füikya changpu”, le thüikya zuma, hünzome chaxwannu khünak ningle mokle ahokya münchang hexnyi?

⁵Jangchang thüiba, Apolo a owa? Üntoxle Pol a owa? Kwom nang, hünzom mongong hato zunle ahüi angkya hanpakma ngokya Zang da muakyabu changwüi. Kwom pangnusasae wüi Zange ma ang akoxkox mwot mokwüi.

⁶Kue otsang küipu, Apolo-e opün to tie lipu, ikoxlechu opün tsong ang koxkya a Zang-tix changle.

⁷Owae otsang küipuix ilaxle owae opün to tie lipuix, hokhi chemchu münchang, ikoxle opün tsong ang koxkya Zang akhokya changle.

⁸Owae otsang küi üntoxle owae tie li, hokhi a tuitata wüi changle, ilaxle hokhi pangnyie wüi, chix mwot ma thütle ma hingchak kop angkya changle.

⁹Chemthüikoxle kukhi a Zang mwottho ma üitho changle; hünzom a Zang haxtok. Hünzom a Zang shwom Homchu changle.

¹⁰Zange ku ang fakya hingho twonlaxle, homzing manpa mwot kue mok ilaxle hom tale toxdaoa, ilaxle mama mixe ija ma zingle ngole. Ikoxlechu pangnunue wüi mae chemle zinglaxpuix, ija bama khünkhi angkya changle,

¹¹chemthüikoxle tale thomdaokya hom owa Khrista changpuix, chix boma mama hom owaechu münta angkya changle.

¹²Athax hom takya ma owawae hun, khop, thalix longbu, ibu laxüi; mamabue pün, hingzang, chichangba tsaxtsa laxüi.

¹³Khrista zanghan dongkya Nyix mixhuak nok mwot wüi ngün ang ataküi, chemthüikoxle ija nyix wün makhange noknusa mwot wüi angaile ahoüi; ile wün füi wanüi ilaxle ija chimüikya hia müikya oli otsingtsing ahoüi.

¹⁴Owawa khünake takya hom wün to chishunle otya na jangngoba, zingkya mixe chix mwot müikya otha kopüi.

¹⁵Ikoxle owawae takya wün to shunle jangle thüiningle, chix ang Ija hingho müntüiüi, bachutix chix huak a wünkha tokya paole azangkya ningle sünle kopüi.

¹⁶Nang a zangshwom-hom changle ilaxle Zang Chasa nang ma ngole le nange awanchahex?

¹⁷Owawae zangshwom-hom jang ama thüiningle Zange chix amaüi. Chemthüikoxle zangshwom-hom a otsao changle, ilaxle nang a ija zangshwom-hom changle.

¹⁸Owaechu ma alüile taxdyen, owawae athaxpongkya chaxwannu chifün ma chix a jetüi hwonzaikya mix tuita changpu le jangtex, otsing tomtata ma je-hwon füikya mix ang achang angkya kuxma, chix a ongat ang achang angkya changle.

¹⁹Chemthüikoxle ija chaxwannu je-hwon a Zang zongto ongat changle. Otsao Lai-e thüile: Hwom angangle tsing zai tüipongma, jetüi hwonlangkyabu, Zange tsünle amanle.

²⁰Tamchu Otsao Lai mama khama thüile, Je-hwon füikyabu mongjang laxli münchangle Zange awanle.

²¹Khünake chem mok ang thopuix, ija khoma owachu bong-chong angkya müntüi. Chemthüikoxle pangnu li wüi hünzom kux changle:

²²Pol, Apolo, Pitar; ija chaxwannu, ozün hia omang, athax tüikya hia füichi, ibu pangwüi hünzom kux,

²³ilaxle hünzom a Khrista kux, Khrista a Zang kux changle.