Read Wancho Naga 1 Korin 8 Bible Online

1 Korin 8 - Wancho Naga bible

1 Korin 8

¹Athax, chapa ang koxkya süt bama hünzome zakya a ile: Changle, kwome wünkya ningle kem pangnu ma wüi je-hwom tüile. Ikoxlechu iningkya je-hwone khünak tuita ongam füi tsaichong-kaxbong ang koxle; ikoxle mongküne zong adünle.

²Owawae chixe hidaole tsingwanpule jangtex thüiba, chixe chem tsingwanse hex ija chixe ojao matsing ma-awan.

³Ikoxle owawae Zang to mongkün jangtüi, Zange chix awanle.

⁴Idaile chapa ang koxkya süt saxkya bama; keme awanpu chapa ma ozün müntüi; ikoxle keme awankya a, Zang a tuita wüi.

⁵Chemthüikoxle ding hia hax ma khünake “Zang”, le nyakkyabu tüihu koxlax ilaxle ibu zangbu hia baozangbu tüihu koxlechu

⁶kem hanpakma Zang, chix a Hopa, owae zünmok zingle alaipuix, ilaxle owa hanpakma kem ozün ma ngolaxpuix, chix tuita wüi; üntoxle zünmok zingkya mix owa makhange kem ozün ma ngopuix, ija Jisu Khrista Jowanpa chix tata wüi.

⁷Ikoxlechu ija noke awankya münchang. Züizüie ami chapa shwomle ngokya asyen laxle iningkya süt saxkya zuma, ija chapa ang koxkya süt changtomtapu le hwome thütle; ile hwom khangka ma chisukya hia sukya süi ang chitho laxle, ija süt makhange hwom chitsaokya ang achangdaoale hwome thütle.

⁸Süt makhange kem Zang füi wonkya ofün sümüiüi le münchang; chisaxba kem fün sümaüi, ilaxle saxkoxle kem fün sümüiüi le münchang.

⁹Nang woktex ma moktsuak ang pankya zong twonkyae mongong ma zong aluile chitüikyabu ochax to chiadüt angkya kuxma likhünlax.

¹⁰Thütba khangka ma jekho manguikyabu thüntho ma nang jetüi hwonlang daokya mix tuita, chapa shwomkya tsap ma thungle jangngün thüiba; ijae hwom ang chapa ang koxkya fong saxkoxchu chem münchangle zong adünkya tuita ang münachangüi hia?

¹¹Nang ma jetüi hwonlangkya makhange, mongong ma zong matüikya nang zongto khristan tüinao tuita, khrista owa hanpakmachu wüi zilaxpuix, chix amaüi.

¹²Ile Khrista ma nang zongma tüinaohom, mongong ma zong matüikya, ibu khangka thomzün ang tomkya a Khrista zongto nang mixe ochax lyenkya ang achangüi.

¹³Ikoxle, ku tüinao tuita adüt angkya süt ma tüikya jangchang thüikoxle, ile ku tüinao tuita adüt ang chikox angkya hanpakma, kue müi otuechu münsax.