Read Wancho Naga 1 Korin 9 Bible Online

1 Korin 9 - Wancho Naga bible

1 Korin 9

¹Ku a mongtex ma ngo ang dankya mix münchang hexnyi? Ku a wangshem tuita münchang hexnyi? Kue kem Jowanpa Jisu Khrista mangün hexnyi? Jowanpa ma hünzom ku füi tomle üitho münchang hexnyi?

²Mix zongto chichang koxlechu hünzom zongto ku wangshem tuita changle; chemthüikoxle hünzom a Jowanpa ma ku wangshem ang achangkya münwan changle.

³Ku thwonle anokyabu zongto, kue ma khosekya olom ija changpu:

⁴Ku mwot hanpakma ku ang sütling kox angkya mongtex pankya müntüi hexnyi?

⁵Wangshem mamabu ilaxle Jowanpa ma tüinaohom ilaxle Pitar hwom ningle, ku füi tomle khristan kakonu tuita ku füito laxlaxle aham angkya mongtex pankya ku ang a müntüi hia?

⁶Chichangba mokle ngun achaklaxo lükya a Barnaba kukhi lanwüi hexnyi?

⁷Masüt-maling füi süpahi ang achang ngokya owa tüi? Grep haxtok manzai laxle ikha angkya oziak chisaxkya mix owa tüi? Tsomti chiling homtoxle chun nyele ngokya nyetmix owa tüi?

⁸Kue ija khünak mongtex ma akaxkya münchang, chemthüikoxle wanlomechu ile wüi akaxle.

⁹Mosa wanlom ma zakya tüile: “Tsaxnak ang kop pongma maihupong tun ma taxhux.” Zange ija maihupong tuitex laxpia?

¹⁰Chixe ibibi kem kuxmale akaxkya münchang hexnyi? Ija a kem kuxmale zale thomkya changle. Tsaxtong mokya hia manzai mix pangnyie wüi matsyentsyen tsax atu ang ataküile onglaxle mokpu.

¹¹Kwome hünzom khama chasa ma oli tsaokya saidaopu. Ikoxle kwome müi-hi-aji lap jangzüt thüikoxle ija a olom ma münchang.

¹²Mamabue ngaxchu hünzom bama hwom ang mongtex pangkya süntom tüile le thüi ang jangtsuak thüikoxle, ikhato kwom sisie münthüi tsuaküi hexnyi? Ikoxlechu kwome ija mongtex pankya müntwon. Itülüi, khrista hanpakma Kaxho Müikya apuk-apuakya olom to poxpyen angkya chitüi angkya bama kwome pangnusa adupu.

¹³Zangshwom-Hom ma thothakyabue zangshwom-hom angkya süt koppu, ilaxle tö koxkya khato mokkyabue tö ang koxkya kha angkya süntom koppu, ija hünzome matsing hexnyi?

¹⁴Ilailaile kem Kaxho Müikya apukkyabue Kaxho Müikya ma hwom ozün ma ngo angkya atak angkya Jowanpa kaxtom changle.

¹⁵Ikoxlechu kue iningkya mongtex pankya chak ma müntwon, ilaxle kue iningkya ma hanpakma naxatak le, ija laiza zakya münchang. Owawae, olom ma ku tsaichong-kaxbongkya tha ajaole changkya füi ku hanpak zikya wüi sümüi.

¹⁶Kaxho Müikya apuk-apuakya bama hexle ku bong-chong angkya müntüi. Chemthüikoxle ku a ile moklaxo lekya kaxtom fangma ngopu. Ilaxle Kaxho Müikya apuk-apuakya chitüi thüikoxle wüi ku a maxsaxpu!

¹⁷Kue ija ku mongtex ma mokpuix thüikoxba, kue otha kopüi le ongkya tüise; ikoxle Zange ku ija mwottho hanpakma ma tsankya tüikoxle, kue ija ma hünlix ang laxle mokpu.

¹⁸Kaxho Müikya apuk-apuakya mwot bama omün kop angkya wüile ku ang mongtex pankya olom chitwon homle, amuamua le Kaxho Müikya apuk-apua angkya a osho-juawan tuita changpu.

¹⁹Ku a mongtex ma ngo ang dankya, tuita opupu dachu chichangkya mix; ikoxlechu otsuaktsuak ma khünaknu khristan ang achang angkya hanpakma, ku kulualua to noknu da ang achangpu.

²⁰Jehudi nok khristan ang achang ang ku hwom zongto Jehudi khünak tuita ang achangpu; ku huak a wanlom fangma chitüi, ikoxlechu wanlom fangma ngokyabu khristan ang achang angkya hanpakma, ku wanlom fangma ngokya mix tuita ang achang.

²¹Ilailaile mixnok khato mokkya zuma, mixnokbu khristan ang achang angkya kuxma, Jehudi nok wanlom fangma chichang homtoxle mixnok tuita ningle ngopu.

²²Shonaikyabu khato ku, hwom khristan ang achang angkya kuxma, shonai le maxkya mix tuita ang achangpu. Owawa thüingaxchu sünle tsuak angkya kuxma, ku nok khato pangnu li ang achangpu.

²³Ija mohiman süntswon ang kop angkya kuxma, kue ibu pangnu wüi Kaxho Müikya hanpakmale mokpu.

²⁴Azikzik pangnuwüi zik ma apanpu, ikoxle hingho tuitae wüi kople le hünzome münawan hexnyi? Jangchang thüiba nange ija hingho kop ang thole ole zikkox.

²⁵Zap ma zong apankyabue pangnuli lom towüi malailai to akumathum tsuak angkya azongle. Hwome ile male paoün angkya khohom kop ang mokpu, ikoxle keme ile mokkya a tamchu chima angkya khohom atak angkya hanpakma mokpu.

²⁶Idaile ziakop ang-ole ku tangthole zikpu; idaile kue zangwin to chakthome müntop;

²⁷Ile mix hato apua anolaxle mawüi thaile nakbang le kue ku tsangtsa to chakthome tople atsak laxle akumathum ang tsuakpu.