Read Wancho Naga 2 Korin 2 Bible Online

2 Korin 2 - Wancho Naga bible

2 Korin 2

¹Idaile hünzom mong ama ang chatle ku hünzom hato münngui ngoüi le kue ku mongto wünle tsuakdaoa.

²Ile hünzom pangwüi mong amale thomkoxle, ku mong amüi angkya mix owa tamtüi?

³Kue hünzom waise chitsu laxle ija lai zapu, chemthüikoxle ipongkhae kue hünzom waikoxle ku ang mongma angkya ataküi. Ku mong amüise a hünzom changhupu ikoxle hünzom mong ama ang ku chemto nguiüi; chemthüikoxle ku mongmüi füi tomle hünzom pangnu ang wüi mongmüi angkya atsingsho.

⁴Kue ija laiza pongma ku ang mong ojao chimüi ilaxle ku mongsik ngünle sop ngokya; ku mongtex a hünzom mong naxma le chichangle kue hünzom pang towüi obukuxle künpuix, hünzome ija tsingle naxlaxlax le texkya changpu.

⁵Athax owawae tututa mong jang amadao thüiba, chixe ija kutata mong amakya chichang ikoxle hidaopong changkoxchu chixe hünzom pangnu mong amapu. (Chix to khünzule nakpo ünkox le kue ija akaxpu).

⁶Ile chix to hünzom othome itukux zothupkya wüi nguidaoa.

⁷Ikoxle athax a, mongtsik athukkya zuma aküile chihu le chix chatle nakmax le chix azün angkya hanpakma, hünzome chix ang thailak fa angkya ilaxle mong achen angkya changle.

⁸Idaile hünzome chix to otsing tomta ma mongkünle le chixe hünzom mongkün awan ang laxkoxle kue hünzom füi akaxpu.

⁹Hünzom thwontsing apongkya tukma chemle ajongpuix ilaxle kue adangle fakyabu kax ma lax ang achwonle tüilaxma hex le opaktik angkya hanpakma kue ija laiza fapu.

¹⁰Otue hünzome owawa ang chixe mokdaokya ochax thailak falaxpuix, kuechu chix ang thailak fapu. Changle, kue thailak fa angkya oli chemchem jangtüi thüiba, hünzom lap kuxmale kue ija Khrista thüntho ma mokpu.

¹¹Ile chichang thüikoxle haxshixe kem to anaoüi; chemthüikoxle chix mong katzuabu keme awanpu.

¹²Khrista bama Kaxho Müikya apuk-apua ang ku Troas to nguikya zuma, kue ikhato chix mwot otua ma süt tsuak angkya hanpakma, Jowanpa-e ku ang lom zangle bang.

¹³Ikoxle kem tüinao Tita chibangkya khoma ku huanuma abanle mongmax. Ikhoma ikha tokya khünakbu ang ngodao-ole thüilaxle ku Mesidonia to pao.

¹⁴Ikoxlechu Zang ang münchong naxtüi! Chemthüikoxle Khrista füikya notom ma Khrista ma tholünkya sungdün ngadongle lekya jenthom Zange othuithuima thothut. Khrista bama tsingwankya ongan müile pangnu khato apuk-apua kox angkya Zange kem twonle.

¹⁵Sünle kopdaokyabu hia maxsamle ngokyabu pangnu tham to apukkya Khrista-e ongan müikya füi Zang ang tö koxkya so a kem changpu.

¹⁶Maxsamle ngokyabu zongma ija a lang angkya zik hing ongan ningle; ikoxle khosün koplaxle ngokyabu zongto a ija a azün angkya ongan müikya so-ngan ningle changle. Jangchang thüiba, iningkya mwot moktsuak angkya mix a owa tüi?

¹⁷Kem a, shiksheple thahangkya khünakbu lailaile küzi-küza le Zang kax apukle ahamkya züitabu ningle chichang; ikoxle Zange kwom tsankya khoma, tuita Khrista da ningle, chix miksho ma kwome mongkoxle akaxpu.